8 ਦਿਨਾਂ ‘ਚ ਚੋਰ ਨੇ ਮੂਰਤੀ ਵਾਪਸ ਮੰਦਰ ‘ਚ ਰੱਖੀ, ਮਾਫੀਨਾਮੇ ‘ਚ ਦੱਸਿਆ ਕਾਰਨ, ਪੜ੍ਹ ਕੇ ਹੈਰਾਨ ਰਹਿ ਗਏ ਪੁਜਾਰੀ The thief returned the idol to the temple in 8 days, gave the reason in the apology, the priest was stunned after reading it – News18 ਪੰਜਾਬੀ

ਸੰਗਮ ਨਗਰੀ ਪ੍ਰਯਾਗਰਾਜ ਸ਼੍ਰਿੰਗਵਰਪੁਰ ਧਾਮ ਦੇ ਇੱਕ ਮੰਦਰ ਵਿੱਚੋਂ ਚੋਰੀ ਕੀਤੀ ਮੂਰਤੀ ਨੂੰ ਚੋਰ ਵਾਪਸ ਰੱਖ ਗਿਆ। ਮੰਦਰ ‘ਚੋਂ ਮੂਰਤੀ ਚੋਰੀ ਹੋਣ ਦੇ ਮਾਮਲੇ ‘ਚ ਨਵਾਬਗੰਜ ਥਾਣੇ ‘ਚ ਐੱਫ.ਆਈ.ਆਰ. ਦਰਜ ਹੋਈ ਸੀ ਪਰ ਪੁਲਿਸ ਮੂਰਤੀ ਬਰਾਮਦ ਨਹੀਂ ਕਰ ਸਕੀ। ਚੋਰ ਖੁਦ ਮੂਰਤੀ ਨੂੰ ਮੰਦਰ ਦੇ ਕੋਲ ਹੀ ਮਾਫੀਨਾਮਾ ਵੀ ਛੱਡ ਗਿਆ।

ਮੰਦਰ ਵਿੱਚੋਂ ਚੋਰੀ ਹੋਈ ਰਾਧਾ-ਕ੍ਰਿਸ਼ਨ ਦੀ ਕੀਮਤੀ ਅਸ਼ਟਧਾਤੂ ਮੂਰਤੀ ਚੋਰੀ ਤੋਂ ਅੱਠ ਦਿਨ ਬਾਅਦ ਵਾਪਸ ਮਿਲਣ ਨੂੰ ਲੈ ਕੇ ਇਲਾਕੇ ਵਿੱਚ ਵੱਖ-ਵੱਖ ਚਰਚਾਵਾਂ ਚੱਲ ਰਹੀਆਂ ਹਨ। ਇਸ ਅਨੋਖੇ ਮਾਮਲੇ ਨੂੰ ਲੈ ਕੇ ਕੁਝ ਲੋਕ ਇਸ ਨੂੰ ਕਲਯੁਗ ਵਿਚ ਭਗਵਾਨ ਦਾ ਚਮਤਕਾਰ ਮੰਨ ਰਹੇ ਹਨ।

ਦੱਸ ਦਈਏ ਕਿ 24 ਸਤੰਬਰ ਨੂੰ ਸ਼ਹਿਰ ਤੋਂ ਕਰੀਬ 45 ਕਿਲੋਮੀਟਰ ਦੂਰ ਸ਼੍ਰਿੰਗਵਰਪੁਰ ਧਾਮ ਦੇ ਗਊ ਘਾਟ ਆਸ਼ਰਮ ਤੋਂ ਰਾਧਾ-ਕ੍ਰਿਸ਼ਨ ਦੀ ਸੈਂਕੜੇ ਸਾਲ ਪੁਰਾਣੀ ਅਸ਼ਟਧਾਤੂ ਮੂਰਤੀ ਮੰਦਰ ਦੇ ਤਾਲੇ ਤੋੜ ਕੇ ਚੋਰੀ ਹੋ ਗਈ ਸੀ। ਇਹ ਐਫਆਈਆਰ ਮੰਦਰ ਦੇ ਪੁਜਾਰੀ ਫਲਾਹਰੀ ਮਹੰਤ ਸਵਾਮੀ ਜੈਰਾਮ ਦਾਸ ਮਹਾਰਾਜ ਨੇ ਦਰਜ ਕਰਵਾਈ ਸੀ। ਪੁਲਿਸ ਨੇ ਦੋ ਸ਼ੱਕੀਆਂ ਨੂੰ ਹਿਰਾਸਤ ਵਿੱਚ ਵੀ ਲਿਆ ਸੀ ਪਰ ਮੂਰਤੀ ਬਾਰੇ ਕੋਈ ਜਾਣਕਾਰੀ ਨਹੀਂ ਮਿਲ ਸਕੀ।

ਮੰਗਲਵਾਰ ਸਵੇਰੇ ਕਰੀਬ 11:30 ਵਜੇ ਕਿਸੇ ਨੇ ਹਰਿਆ ਕੋਖਰਾਜ ਦੀ ਸਰਵਿਸ ਲੇਨ ‘ਤੇ ਆਸ਼ਰਮ ਦੇ ਸਾਹਮਣੇ ਮੂਰਤੀ ਦੇਖੀ। ਉਸ ਨੇ ਇਸ ਬਾਰੇ ਆਸ਼ਰਮ ਦੇ ਮਹੰਤ ਨੂੰ ਸੂਚਿਤ ਕੀਤਾ। ਮੰਦਰ ਦੇ ਮਹੰਤ ਅਤੇ ਪੁਲਿਸ ਮੌਕੇ ‘ਤੇ ਪਹੁੰਚ ਗਈ। ਮੂਰਤੀ ‘ਤੇ ਕਬਜ਼ਾ ਕਰ ਲਿਆ। ਜਦੋਂ ਮੂਰਤੀ ਦੇਖੀ ਤਾਂ ਉਸ ਦੇ ਨਾਲ ਇੱਕ ਚਿੱਠੀ ਵੀ ਮਿਲੀ।

ਇਹ ਚਿੱਠੀ ਆਪਣੇ ਆਪ ਵਿੱਚ ਚੋਰ ਦੀ ਮੁਆਫੀ ਸੀ। ਇਸ ਵਿਚ ਲਿਖਿਆ ਸੀ ਕਿ ਉਸ ਨੇ ਅਗਿਆਨਤਾ ਵਿਚ ਮੰਦਰ ਵਿਚੋਂ ਅਸ਼ਟਧਾਤੂ ਦੀ ਮੂਰਤੀ ਚੋਰੀ ਕਰ ਲਈ ਸੀ ਪਰ ਮੂਰਤੀ ਚੋਰੀ ਕਰਨ ਤੋਂ ਬਾਅਦ ਉਸ ਨੂੰ ਡਰਾਉਣੇ ਸੁਪਨੇ ਆ ਰਹੇ ਸਨ। ਉਸ ਦੇ ਪੁੱਤਰ ਦੀ ਸਿਹਤ ਵੀ ਵਿਗੜ ਗਈ ਜਿਸ ਕਾਰਨ ਉਸ ਨੂੰ ਆਪਣੀ ਗਲਤੀ ਦਾ ਅਹਿਸਾਸ ਹੋਇਆ। ਉਸ ਨੇ ਮੁਆਫੀਨਾਮੇ ਵਿਚ ਇਹ ਵੀ ਲਿਖਿਆ ਹੈ ਕਿ ਉਸ ਨੇ ਭਗਵਾਨ ਰਾਧਾ-ਕ੍ਰਿਸ਼ਨ ਦੀ ਮੂਰਤੀ ਨੂੰ ਵੇਚਣ ਲਈ ਉਸ ਨਾਲ ਛੇੜਛਾੜ ਕੀਤੀ ਹੈ, ਇਸ ਲਈ ਵੀ ਉਹ ਭਗਵਾਨ ਤੋਂ ਮੁਆਫੀ ਮੰਗ ਰਿਹਾ ਹੈ। ਚੋਰ ਨੇ ਮੰਦਰ ਦੇ ਪੁਜਾਰੀ ਤੋਂ ਮੁਆਫੀ ਵੀ ਮੰਗੀ ਅਤੇ ਮੰਦਰ ਵਿਚ ਮੂਰਤੀ ਦੁਬਾਰਾ ਸਥਾਪਿਤ ਕਰਨ ਦੀ ਅਪੀਲ ਕੀਤੀ।