ਸ਼ਰਾਬ ਪੀਣ ਵਾਲਿਆਂ ਨੂੰ ਕਰਨਾਟਕ ਸਰਕਾਰ ਨੇ ਵੱਡਾ ਝਟਕਾ ਦਿੱਤਾ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਕਰਨਾਟਕ ਸਰਕਾਰ ਨੇ ਵਾਧੂ ਐਕਸਾਈਜ਼ ਡਿਊਟੀ (AED) ਨੂੰ ਵਧਾ ਦਿੱਤਾ ਹੈ ਜਿਸ ਕਾਰਨ ਬੀਅਰ ਦੀਆਂ ਕੀਮਤਾਂ ਵਧਣ ਵਾਲੀਆਂ ਹਨ। ਇਹ ਡਿਊਟੀ 195 ਪ੍ਰਤੀਸ਼ਤ ਤੋਂ ਵਧਾ ਕੇ 200 ਪ੍ਰਤੀਸ਼ਤ ਕਰ ਦਿੱਤੀ ਗਈ ਹੈ। ਇੰਨਾ ਹੀ ਨਹੀਂ, ਸਸਤੇ ਇੰਡੀਅਨ ਮੇਡ ਲਿਕਰ (IML) ਬ੍ਰਾਂਡਾਂ ਦੀਆਂ ਕੀਮਤਾਂ ਵੀ 180 ਮਿਲੀਲੀਟਰ ਦੀ ਕੁਆਰਟਰ ਬੋਤਲ ‘ਤੇ ₹15 ਤੋਂ ₹20 ਤੱਕ ਵਧਣਗੀਆਂ। ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਮੁੱਖ ਮੰਤਰੀ ਸਿੱਧਰਮਈਆ ਦੀ ਅਗਵਾਈ ਵਾਲੀ ਕਰਨਾਟਕ ਸਰਕਾਰ ਨੇ ਅਧਿਕਾਰਤ ਤੌਰ ‘ਤੇ ਬੀਅਰ ਅਤੇ ਬਜਟ ਆਈਐਮਐਲ ਬ੍ਰਾਂਡਾਂ ‘ਤੇ ਵਾਧੂ ਐਕਸਾਈਜ਼ ਡਿਊਟੀ ਵਿੱਚ ਵਾਧੇ ਦੀ ਪੁਸ਼ਟੀ ਕੀਤੀ ਹੈ।
ਸਰਕਾਰ ਦੇ ਫੈਸਲੇ ‘ਤੇ ਕੀ ਆ ਰਿਹਾ ਹੈ ਰਿਸਪੌਂਸ ?
ਫੈਡਰੇਸ਼ਨ ਆਫ ਵਾਈਨ ਮਰਚੈਂਟਸ ਐਸੋਸੀਏਸ਼ਨ, ਕਰਨਾਟਕ ਅਤੇ ਬਰੂਅਰਜ਼ ਐਸੋਸੀਏਸ਼ਨ ਆਫ ਇੰਡੀਆ (BAI) ਨੇ ਸਰਕਾਰ ਦੇ ਫੈਸਲੇ ਦਾ ਵਿਰੋਧ ਕੀਤਾ ਹੈ ਅਤੇ ਲੈਟਰ ਆਫ਼ ਆਬਜੈਕਸ਼ਨ ਪੇਸ਼ ਕੀਤਾ ਹੈ। ਬੀਏਆਈ ਦੇ ਡਾਇਰੈਕਟਰ ਜਨਰਲ ਵਿਨੋਦ ਗਿਰੀ ਦੇ ਅਨੁਸਾਰ, ਕੀਮਤਾਂ ਵਿੱਚ ਇਹ ਵਾਧਾ ਆਮ ਲੋਕਾਂ ‘ਤੇ ਪਵੇਗਾ ਜਾਂ ਨਹੀਂ, ਇਹ ਸ਼ਰਾਬ ਅਤੇ ਬੀਅਰ ਕੰਪਨੀਆਂ ਦੇ ਫੈਸਲਿਆਂ ‘ਤੇ ਨਿਰਭਰ ਕਰੇਗਾ। ਉਨ੍ਹਾਂ ਕਿਹਾ ਕਿ ਪਿਛਲੀ ਵਾਰ ਜਦੋਂ ਐਕਸਾਈਜ਼ ਡਿਊਟੀ ਵਧਾਈ ਗਈ ਸੀ, ਤਾਂ ਕੁਝ ਮਹੀਨਿਆਂ ਲਈ ਬੀਅਰ ਮਾਰਕੀਟ ਵਿੱਚ ਗਿਰਾਵਟ ਆਈ ਸੀ। ਵਿਕਾਸ ਦਰ ਵੀ 1% ‘ਤੇ ਸਥਿਰ ਰਹੀ। ਵਿਨੋਦ ਗਿਰੀ ਦਾ ਕਹਿਣਾ ਹੈ ਕਿ ਜੇਕਰ ਬੀਅਰ ਦੀ ਵਿਕਰੀ ਹੋਰ ਘਟਦੀ ਹੈ, ਤਾਂ ਅਜਿਹਾ ਫੈਸਲਾ ਸਰਕਾਰ ਦੇ ਮਾਲੀਏ ਨੂੰ ਘਟਾ ਸਕਦਾ ਹੈ।
ਫੈਡਰੇਸ਼ਨ ਆਫ ਵਾਈਨ ਮਰਚੈਂਟਸ ਐਸੋਸੀਏਸ਼ਨ ਕਰਨਾਟਕ, ਬੰਗਲੁਰੂ ਨੇ ਵੀ ਰਾਜ ਦੇ ਮਾਲ ਵਿਭਾਗ ਦੇ ਮੁੱਖ ਸਕੱਤਰ ਨੂੰ ਇੱਕ ਪੱਤਰ ਲਿਖ ਕੇ ਆਪਣਾ ਵਿਰੋਧ ਪ੍ਰਗਟ ਕੀਤਾ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਿਫਾਇਤੀ ਸਲੈਬ ਲਈ AED ਵਿੱਚ ਵਾਰ-ਵਾਰ ਵਾਧੇ ਕਾਰਨ 2024 ਤੋਂ 2025 ਤੱਕ IML ਦੀ ਵਿਕਰੀ ਵਿੱਚ 3% ਦੀ ਗਿਰਾਵਟ ਆਈ ਹੈ। ਫੈਡਰੇਸ਼ਨ ਨੇ ਸਰਕਾਰ ਨੂੰ ਕੀਮਤਾਂ ਵਿੱਚ ਵਾਧੇ ਦੇ ਫੈਸਲੇ ‘ਤੇ ਮੁੜ ਵਿਚਾਰ ਕਰਨ ਅਤੇ ਇਸਨੂੰ ਘਟਾਉਣ ਦਾ ਸੁਝਾਅ ਦਿੱਤਾ ਹੈ। ਫੈਡਰੇਸ਼ਨ ਦਾ ਕਹਿਣਾ ਹੈ ਕਿ ਲਗਾਤਾਰ ਵਾਧੇ ਕਾਰਨ ਗੁਆਂਢੀ ਰਾਜਾਂ ਤੋਂ ਕਰਨਾਟਕ ਵਿੱਚ ਨਾਜਾਇਜ਼ ਸ਼ਰਾਬ ਆ ਸਕਦੀ ਹੈ। ਹਾਲਾਂਕਿ ਉਨ੍ਹਾਂ ਦੀ ਅਪੀਲ ਸਫਲ ਨਹੀਂ ਹੋਈ।
