ਖਤਰਨਾਕ ਵਾਇਰਸ ਦਾ ਹਮਲਾ, 3 ਦੇਸ਼ਾਂ ਦੀਆਂ ਸਰਹੱਦਾਂ ਸੀਲ, ਕਿਸੇ ਵੱਡੀ ਸਾਜ਼ਿਸ਼ ਦਾ ਵੀ ਸ਼ੱਕ…

Foot and Mouth Disease Latest News: ਇਸ ਸਮੇਂ ਯੂਰਪੀ ਦੇਸ਼ਾਂ ਹੰਗਰੀ, ਆਸਟਰੀਆ ਅਤੇ ਸਲੋਵਾਕੀਆ ਵਿੱਚ ਹਫੜਾ-ਦਫੜੀ ਦਾ ਮਾਹੌਲ ਹੈ। ਇੱਥੇ ਇੱਕ ਵਾਇਰਸ ਫੈਲ ਰਿਹਾ ਹੈ, ਜਿਸ ਕਾਰਨ ਇਨ੍ਹਾਂ ਦੇਸ਼ਾਂ ਨੇ ਆਪਣੀਆਂ ਸਰਹੱਦਾਂ ਸੀਲ ਕਰ ਦਿੱਤੀਆਂ ਹਨ। ਹੰਗਰੀ ਵਿੱਚ 50 ਸਾਲਾਂ ਬਾਅਦ ਪੈਰ-ਅਤੇ-ਮੂੰਹ ਦੀ ਬਿਮਾਰੀ (Foot-and-mouth disease- FMD) ਦਾ ਪ੍ਰਕੋਪ ਸਾਹਮਣੇ ਆਇਆ ਹੈ, ਜਿਸ ਨਾਲ ਯੂਰਪ ਵਿੱਚ ਦਹਿਸ਼ਤ ਫੈਲ ਗਈ ਹੈ। ਇਹ ਬਿਮਾਰੀ ਜਾਨਵਰਾਂ ਰਾਹੀਂ ਫੈਲਦੀ ਹੈ। ਇਸੇ ਲਈ ਸਾਵਧਾਨੀ ਵਜੋਂ ਇਨ੍ਹਾਂ ਜਾਨਵਰਾਂ ਨੂੰ ਮਾਰਿਆ ਜਾ ਰਿਹਾ ਹੈ। ਇਸ ਪਿੱਛੇ ਕਿਸੇ ਵੱਡੀ ਸਾਜ਼ਿਸ਼ ਦਾ ਵੀ ਸ਼ੱਕ ਹੈ। ਹੰਗਰੀ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦਾਅਵਾ ਕੀਤਾ ਹੈ ਕਿ ਵਾਇਰਸ “ਕੁਦਰਤੀ ਨਹੀਂ ਹੋ ਸਕਦਾ”। ਇਸ ਗੱਲ ਦੀ ਸੰਭਾਵਨਾ ਹੈ ਕਿ ਇਸ ਨੂੰ “ਜੈਵਿਕ ਹਮਲੇ” ਵਜੋਂ ਫੈਲਾਇਆ ਗਿਆ ਹੈ।

ਹੰਗਰੀ ਦੇ ਪ੍ਰਧਾਨ ਮੰਤਰੀ ਨੇ ਕੀ ਕਿਹਾ?
ਹੰਗਰੀ ਦੇ ਪ੍ਰਧਾਨ ਮੰਤਰੀ ਵਿਕਟਰ ਓਰਬਨ ਦੇ ਚੀਫ਼ ਆਫ਼ ਸਟਾਫ਼, ਗੇਰਜਲੀ ਗੁਲਿਆਸ ਨੇ ਕਿਹਾ: “ਇਸ ਸਮੇਂ ਅਸੀਂ ਇਸ ਗੱਲ ਤੋਂ ਇਨਕਾਰ ਨਹੀਂ ਕਰ ਸਕਦੇ ਕਿ ਵਾਇਰਸ ਕੁਦਰਤੀ ਨਹੀਂ ਹੈ। ਇਹ ਸੰਭਵ ਹੈ ਕਿ ਅਸੀਂ ਇੱਕ ਨਕਲੀ ਤੌਰ ਉਤੇ ਬਣਾਏ (Artificial) ਗਏ ਵਾਇਰਸ ਨਾਲ ਨਜਿੱਠ ਰਹੇ ਹਾਂ।” ਇਹ ਕਿਹਾ ਗਿਆ ਸੀ ਕਿ ਇਹ ਸ਼ੱਕ ਇੱਕ ਵਿਦੇਸ਼ੀ ਲੈਬ ਤੋਂ ਮਿਲੀ ਮੌਖਿਕ ਜਾਣਕਾਰੀ ਦੇ ਆਧਾਰ ਉਤੇ ਸੀ। ਇਸ ਦੀ ਅਜੇ ਪੂਰੀ ਪੁਸ਼ਟੀ ਨਹੀਂ ਹੋਈ ਹੈ। ਵਿਸ਼ਵ ਪਸ਼ੂ ਸਿਹਤ ਸੰਗਠਨ ਦਾ ਕਹਿਣਾ ਹੈ ਕਿ ਇਹ ਪ੍ਰਕੋਪ ਪਹਿਲੀ ਵਾਰ ਮਾਰਚ ਵਿੱਚ ਹੰਗਰੀ ਦੀ ਉੱਤਰ-ਪੱਛਮੀ ਸਰਹੱਦ ਦੇ ਨੇੜੇ ਇੱਕ ਪਸ਼ੂ ਫਾਰਮ ਵਿੱਚ ਸਾਹਮਣੇ ਆਇਆ ਸੀ। ਫਿਰ ਦੇਸ਼ ਭਰ ਵਿੱਚ ਲਗਭਗ 1,000 ਫਾਰਮਾਂ ਦਾ ਨਿਰੀਖਣ ਕੀਤਾ ਗਿਆ, ਜਿਨ੍ਹਾਂ ਵਿੱਚੋਂ ਚਾਰ ਨਮੂਨਿਆਂ ਵਿੱਚ ਵਾਇਰਸ ਦੀ ਪੁਸ਼ਟੀ ਹੋਈ।

ਸਰਹੱਦੀ ਲਾਂਘੇ ਬੰਦ ਕੀਤੇ ਜਾ ਰਹੇ ਹਨ
ਦਸੰਬਰ 2024 ਤੱਕ ਹੰਗਰੀ ਵਿੱਚ 8.61 ਲੱਖ ਪਸ਼ੂ ਸਨ, ਜੋ ਕਿ ਯੂਰਪੀ ਸੰਘ ਦੇ ਕੁੱਲ ਪਸ਼ੂ ਭੰਡਾਰ ਦਾ 1.2% ਹਨ। ਹੁਣ ਇਸ ਬਿਮਾਰੀ ਨੂੰ ਫੈਲਣ ਤੋਂ ਰੋਕਣ ਲਈ ਹਜ਼ਾਰਾਂ ਜਾਨਵਰਾਂ ਨੂੰ ਮਾਰ ਦਿੱਤਾ ਗਿਆ ਹੈ। ਇਹ ਬਿਮਾਰੀ ਸਲੋਵਾਕੀਆ ਦੇ ਦੱਖਣੀ ਹਿੱਸੇ ਵਿੱਚ ਵੀ ਤੇਜ਼ੀ ਨਾਲ ਫੈਲ ਰਹੀ ਹੈ। ਫਿਰ ਆਸਟਰੀਆ ਨੇ ਹੰਗਰੀ ਨਾਲ ਲੱਗਦੇ 21 ਅਤੇ ਸਲੋਵਾਕੀਆ ਨਾਲ ਲੱਗਦੇ ਦੋ ਸਰਹੱਦੀ ਕ੍ਰਾਸਿੰਗ ਬੰਦ ਕਰ ਦਿੱਤੇ। ਸਰਹੱਦਾਂ ‘ਤੇ ਕੀਟਾਣੂਨਾਸ਼ਕ ਸਟੇਸ਼ਨ ਸਥਾਪਤ ਕੀਤੇ ਗਏ ਹਨ।

ਹੰਗਰੀ ਦੇ ਇੱਕ ਕਿਸਾਨ, ਪਾਲ ਮਿਕਸਨਰ ਨੇ ਕਿਹਾ ਕਿ ਉਸ ਦੇ 3,000 ਪਸ਼ੂ ਮਾਰੇ ਗਏ, ਜਿਸ ਕਾਰਨ ਉਸ ਨੂੰ ਭਾਰੀ ਨੁਕਸਾਨ ਹੋਇਆ। ਇਹ ਕਿਹਾ ਜਾ ਰਿਹਾ ਹੈ ਕਿ ਮੂੰਹ-ਪੈਰ ਦੀ ਬਿਮਾਰੀ ਮਨੁੱਖਾਂ ਲਈ ਖ਼ਤਰਨਾਕ ਨਹੀਂ ਹੈ। ਹਾਲਾਂਕਿ, ਇਹ ਪਸ਼ੂਆਂ, ਭੇਡਾਂ ਅਤੇ ਬੱਕਰੀਆਂ ਵਿੱਚ ਤੇਜ਼ੀ ਨਾਲ ਫੈਲਦਾ ਹੈ, ਜਿਸ ਨਾਲ ਬੁਖਾਰ ਅਤੇ ਮੂੰਹ ਵਿੱਚ ਫੋੜੇ ਹੁੰਦੇ ਹਨ।