ਪੂਰੀ ਟੀਮ 10 ਦੌੜਾਂ ‘ਤੇ ਆਲ ਆਊਟ, 5 ਗੇਂਦਾਂ ‘ਚ ਜਿੱਤਿਆ ਟੀ-20 ਵਿਸ਼ਵ ਕੱਪ ਕੁਆਲੀਫਾਇਰ, ਖਾਤਾ ਨਹੀਂ ਖੋਲ੍ਹ ਸਕੇ 5 ਬੱਲੇਬਾਜ਼

ICC T-20 ਪੁਰਸ਼ ਏਸ਼ੀਆ ਕੁਆਲੀਫਾਇਰ ਵਿੱਚ 5 ਸਤੰਬਰ ਨੂੰ ਖੇਡਿਆ ਗਿਆ ਮੈਚ ਇਤਿਹਾਸ ਦੇ ਪੰਨਿਆਂ ਵਿੱਚ ਦਰਜ ਹੈ। ਮੰਗੋਲੀਆ ਦੀ ਟੀਮ ਸਿੰਗਾਪੁਰ ਖਿਲਾਫ ਸਿਰਫ 10 ਦੌੜਾਂ ‘ਤੇ ਆਲ ਆਊਟ ਹੋ ਗਈ। ਟੀਚੇ ਦਾ ਪਿੱਛਾ ਕਰਨ ਉਤਰੀ ਸਿੰਗਾਪੁਰ ਦੀ ਟੀਮ ਨੇ 5 ਗੇਂਦਾਂ ‘ਚ ਹੀ ਮੈਚ ਸਮਾਪਤ ਕਰ ਲਿਆ। ਸਿੰਗਾਪੁਰ ਲਈ ਭਾਵੇਂ ਇਹ ਟੀਚਾ ਹਾਸਲ ਕਰਨਾ ਆਸਾਨ ਸੀ ਪਰ ਉਸ ਨੇ ਵੀ 1 ਵਿਕਟ ਗੁਆ ਦਿੱਤੀ।

ਮੰਗੋਲੀਆ ਦਾ ਨਾਂ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਦੇ ਇਤਿਹਾਸ ਵਿੱਚ ਸਭ ਤੋਂ ਘੱਟ ਸਕੋਰ ‘ਤੇ ਆਊਟ ਹੋਣ ਵਾਲੀ ਟੀਮ ਦੀ ਸੂਚੀ ਵਿੱਚ ਸ਼ਾਮਲ ਹੋ ਗਿਆ ਹੈ। ਆਈਸੀਸੀ ਟੀ-20 ਪੁਰਸ਼ ਏਸ਼ੀਆ ਕੁਆਲੀਫਾਇਰ ਦੌਰਾਨ 5 ਸਤੰਬਰ ਨੂੰ ਖੇਡੇ ਗਏ ਮੈਚ ਵਿੱਚ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪੂਰੀ ਟੀਮ ਸਿੰਗਾਪੁਰ ਖ਼ਿਲਾਫ਼ ਸਿਰਫ਼ 10 ਦੌੜਾਂ ਹੀ ਬਣਾ ਸਕੀ। ਸਿੰਗਾਪੁਰ ਦੇ ਹਰਸ਼ ਭਾਰਦਵਾਜ ਦੀ ਘਾਤਕ ਗੇਂਦਬਾਜ਼ੀ ਦੇ ਸਾਹਮਣੇ ਵਿਰੋਧੀ ਟੀਮ ਦਾ ਦਮ ਘੁੱਟਦਾ ਨਜ਼ਰ ਆਇਆ, ਇਸ ਗੇਂਦਬਾਜ਼ ਨੇ ਅੱਧੇ ਤੋਂ ਵੱਧ ਮੰਗੋਲੀਆਈ ਟੀਮ ਨੂੰ ਬਾਹਰ ਕਰ ਦਿੱਤਾ। ਹਰਸ਼ ਨੇ 4 ਓਵਰਾਂ ‘ਚ ਸਿਰਫ 3 ਦੌੜਾਂ ਦੇ ਕੇ 6 ਵਿਕਟਾਂ ਲਈਆਂ। 10 ਓਵਰਾਂ ਵਿੱਚ ਮੰਗੋਲੀਆਈ ਟੀਮ 10 ਦੌੜਾਂ ਬਣਾ ਕੇ ਆਲ ਆਊਟ ਹੋ ਗਈ।

ਸਿੰਗਾਪੁਰ ਨੇ 5 ਗੇਂਦਾਂ ਵਿੱਚ ਜਿੱਤ ਲਿਆ ਮੈਚ
ਸਿੰਗਾਪੁਰ ਨੇ ਮੰਗੋਲੀਆ ਵੱਲੋਂ ਦਿੱਤੇ 11 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਸਿਰਫ਼ 5 ਗੇਂਦਾਂ ਵਿੱਚ ਹੀ ਹਾਸਲ ਕਰ ਲਿਆ। ਪਾਰੀ ਦੀ ਸ਼ੁਰੂਆਤ ਕਰਨ ਆਏ ਕਪਤਾਨ ਮਨਪ੍ਰੀਤ ਪਹਿਲੀ ਹੀ ਗੇਂਦ ‘ਤੇ ਆਪਣਾ ਵਿਕਟ ਗੁਆ ਬੈਠੇ ਅਤੇ ਬਿਨਾਂ ਕੋਈ ਦੌੜ ਬਣਾਏ ਵਾਪਸ ਪਰਤ ਗਏ। ਇਸ ਤੋਂ ਬਾਅਦ ਵਿਲੀਅਮ ਸਿੰਪਸਨ ਅਤੇ ਰਾਹੁਲ ਸ਼ਰਮਾ ਨੇ ਮੈਚ ਸਮਾਪਤ ਕੀਤਾ।