ਭਾਰਤ ਵਿੱਚ ਮੋਬਾਈਲ ਉਪਭੋਗਤਾਵਾਂ ਨੂੰ ਜਲਦੀ ਹੀ ਝਟਕਾ ਲੱਗ ਸਕਦਾ ਹੈ। ਮੋਬਾਈਲ ਗਾਹਕਾਂ ਉਤੇ ਮਹਿੰਗੇ ਟੈਰਿਫ ਦਾ ਬੋਝ ਵਧਣ ਵਾਲਾ ਹੈ। ਟੈਲੀਕਾਮ ਕੰਪਨੀਆਂ ਸਾਲ 2025 ਦੇ ਅੰਤ ਤੱਕ ਮੋਬਾਈਲ ਰੀਚਾਰਜ ਪਲਾਨ ਮਹਿੰਗੇ ਕਰ ਸਕਦੀਆਂ ਹਨ। ਟੈਲੀਕਾਮ ਸੈਕਟਰ ਨਾਲ ਜੁੜੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਨਵੰਬਰ-ਦਸੰਬਰ 2025 ਦੇ ਨੇੜੇ ਪ੍ਰੀਪੇਡ ਅਤੇ ਪੋਸਟਪੇਡ ਪਲਾਨ 10 ਤੋਂ 20 ਪ੍ਰਤੀਸ਼ਤ ਤੱਕ ਵਧ ਸਕਦੇ ਹਨ। ਪਿਛਲੇ ਛੇ ਸਾਲਾਂ ਵਿੱਚ ਇਹ ਚੌਥੀ ਵਾਰ ਹੋਵੇਗਾ ਜਦੋਂ ਵੱਡੀਆਂ ਟੈਲੀਕਾਮ ਕੰਪਨੀਆਂ ਆਪਣੇ ਟੈਰਿਫ ਵਧਾਉਣਗੀਆਂ।
ਪ੍ਰੀਪੇਡ ਰੀਚਾਰਜ ਪਲਾਨ 10 ਤੋਂ 20 ਪ੍ਰਤੀਸ਼ਤ ਮਹਿੰਗੇ ਹੋ ਜਾਣਗੇ
ਟੈਰਿਫ ਯੋਜਨਾਵਾਂ ਵਧਾਉਣ ਦਾ ਕਾਰਨ ਵਧਦੀਆਂ ਲਾਗਤਾਂ ਅਤੇ 5G ਨੈੱਟਵਰਕ ਦੇ ਵਿਸਥਾਰ ਦੇ ਵਿਚਕਾਰ ਕਮਾਈ ਅਤੇ ਮੁਨਾਫ਼ੇ ਨੂੰ ਬਿਹਤਰ ਬਣਾਉਣਾ ਹੈ। ਭਾਰਤੀ ਏਅਰਟੈੱਲ, ਰਿਲਾਇੰਸ ਜੀਓ ਅਤੇ ਵੋਡਾਫੋਨ ਆਈਡੀਆ ਵਰਗੀਆਂ ਕੰਪਨੀਆਂ ਨੈੱਟਵਰਕ ਵਿਸਥਾਰ, ਸਪੈਕਟ੍ਰਮ ਖਰੀਦ ਅਤੇ ਰੈਗੂਲੇਟਰੀ ਚਾਰਜ ਵਿੱਚ ਭਾਰੀ ਨਿਵੇਸ਼ ਕਰ ਰਹੀਆਂ ਹਨ। ਵੋਡਾਫੋਨ ਆਈਡੀਆ ਨੂੰ ਹਾਲ ਹੀ ਵਿੱਚ 36,950 ਕਰੋੜ ਰੁਪਏ ਦੇ ਸਪੈਕਟ੍ਰਮ ਬਕਾਏ ਨੂੰ ਸਰਕਾਰੀ ਹਿੱਸੇਦਾਰੀ ਵਿੱਚ ਬਦਲਣ ਦੀ ਪ੍ਰਵਾਨਗੀ ਮਿਲੀ ਹੈ, ਜਿਸ ਨਾਲ ਸਰਕਾਰ ਦੀ ਹਿੱਸੇਦਾਰੀ 22.6% ਤੋਂ ਲਗਭਗ 49% ਹੋ ਗਈ ਹੈ।
ਇਸ ਵਜ੍ਹਾ ਕਾਰਨ ਕੰਪਨੀਆਂ ਪਲਾਨ ਮਹਿੰਗੇ ਕਰਨਗੀਆਂ
ਬਰਨਸਟਾਈਨ ਰਿਸਰਚ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਇਹ ਵਾਧਾ ਟੈਲੀਕਾਮ ਕੰਪਨੀਆਂ ਦੀ ਕਮਾਈ ਨੂੰ ਸਥਿਰ ਕਰਨ ਲਈ ਰੇਟ ਰਿਪੇਅਰ ਰਣਨੀਤੀ ਦਾ ਹਿੱਸਾ ਹੈ। ਮਾਹਿਰਾਂ ਦਾ ਅੰਦਾਜ਼ਾ ਹੈ ਕਿ ਅਗਲੇ ਕੁਝ ਸਾਲਾਂ ਵਿੱਚ ਟੈਰਿਫ ਹੌਲੀ-ਹੌਲੀ ਵਧਦੇ ਰਹਿਣਗੇ ਅਤੇ ਪ੍ਰਤੀ ਉਪਭੋਗਤਾ ਔਸਤ ਆਮਦਨ (ARPU) 2027 ਤੱਕ 300 ਰੁਪਏ ਤੱਕ ਪਹੁੰਚ ਸਕਦੀ ਹੈ। 2024 ਦੀ ਆਖਰੀ ਤਿਮਾਹੀ ਵਿੱਚ, ਏਅਰਟੈੱਲ ਦਾ ARPU 5.2% ਵਧ ਕੇ 245 ਰੁਪਏ ਹੋ ਗਿਆ, ਜਦੋਂ ਕਿ Jio ਦਾ ARPU 203 ਰੁਪਏ ਅਤੇ Vodafone Idea ਦਾ 163 ਰੁਪਏ ਰਿਹਾ। 5G ਸੇਵਾਵਾਂ ਅਤੇ ਡਾਟਾ ਵਰਤੋਂ ਵਿੱਚ ਵਾਧੇ ਦੇ ਨਾਲ ਇਹ ਅੰਕੜੇ ਹੋਰ ਵੀ ਵੱਧ ਸਕਦੇ ਹਨ।
ਦਸੰਬਰ ਤੱਕ ਮਹਿੰਗੇ ਹੋ ਜਾਣਗੇ ਮੋਬਾਈਲ ਪ੍ਰੀਪੇਡ ਅਤੇ ਪੋਸਟਪੇਡ ਪਲਾਨ
ਵੋਡਾਫੋਨ ਆਈਡੀਆ ਦੇ ਸੀਈਓ ਅਕਸ਼ੈ ਮੁੰਦਰਾ ਦਾ ਕਹਿਣਾ ਹੈ ਕਿ ਭਾਰਤ ਵਰਗੇ ਬਾਜ਼ਾਰ ਵਿੱਚ, ਨੈੱਟਵਰਕ ਕੁਆਲਿਟੀ ਬਣਾਈ ਰੱਖਣ ਅਤੇ ਆਈਓਟੀ ਅਤੇ ਐਂਟਰਪ੍ਰਾਈਜ਼ ਸੇਵਾਵਾਂ ਵਰਗੀਆਂ ਨਵੀਆਂ ਤਕਨਾਲੋਜੀਆਂ ਨੂੰ ਬਿਹਤਰ ਬਣਾਉਣ ਲਈ ਹਰ 9 ਮਹੀਨਿਆਂ ਬਾਅਦ ਟੈਰਿਫ ਵਿੱਚ ਵਾਧਾ ਜ਼ਰੂਰੀ ਹੈ। ਮੋਬਾਈਲ ਗਾਹਕਾਂ ਨੂੰ ਸਾਲ ਦੇ ਅੰਤ ਵਿੱਚ ਮੋਬਾਈਲ ਰੀਚਾਰਜ ਪਲਾਨ ਵਿੱਚ ਵਾਧੇ ਲਈ ਤਿਆਰ ਰਹਿਣਾ ਚਾਹੀਦਾ ਹੈ, ਹਾਲਾਂਕਿ ਕੰਪਨੀਆਂ ਦਾ ਮੰਨਣਾ ਹੈ ਕਿ ਇਹ ਕਦਮ ਦੇਸ਼ ਭਰ ਵਿੱਚ ਬਿਹਤਰ ਨੈੱਟਵਰਕ ਅਤੇ ਸੇਵਾ ਪ੍ਰਦਾਨ ਕਰਨ ਲਈ ਜ਼ਰੂਰੀ ਹੈ।
