ਟਰੰਪ ਦੇ ਟੈਰਿਫ਼ ਦੇ ਖ਼ਿਲਾਫ਼ ਡੱਟ ਕੇ ਖੜ੍ਹਾ ਹੋਇਆ ਚੀਨ, ਯੂਰਪ ਨਾਲ ਵਧਾ ਰਿਹਾ ਨੇੜਤਾ, ਜਾਣੋ ਕੀ ਹੋਣਗੇ ਇਸ ਦੇ ਨਤੀਜੇ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਚੀਨ ‘ਤੇ 104% ਟੈਰਿਫ ਲਗਾਉਣ ਦੇ ਫੈਸਲੇ ਨੇ ਦੁਨੀਆ ਭਰ ਦੇ ਬਾਜ਼ਾਰਾਂ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਸ ਦੇ ਜਵਾਬ ਵਿੱਚ, ਚੀਨ ਨੇ ਸਖ਼ਤ ਜਵਾਬ ਦੇਣ ਦਾ ਫੈਸਲਾ ਕੀਤਾ ਹੈ। ਚੀਨ ਅਮਰੀਕਾ ਦੇ ਸਭ ਤੋਂ ਨੇੜਲੇ ਦੋਸਤ ਯੂਰਪ ਵਿੱਚ ਆਪਣੀ ਪਕੜ ਮਜ਼ਬੂਤ ਕਰ ਸਕਦਾ ਹੈ। ਟੈਰਿਫਾਂ ਦੇ ਕਾਰਨ, ਯੂਰਪ ਹੁਣ ਚੀਨ ਦੇ ਨੇੜੇ ਜਾਣਾ ਚਾਹੁੰਦਾ ਹੈ। ਚੀਨ ਦੇ ਪ੍ਰਧਾਨ ਮੰਤਰੀ ਲੀ ਕੇਕਿਆਂਗ ਨੇ ਯੂਰਪੀਅਨ ਕਮਿਸ਼ਨ ਦੀ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਨਾਲ ਫ਼ੋਨ ‘ਤੇ ਗੱਲਬਾਤ ਕੀਤੀ। ਉਨ੍ਹਾਂ ਕਿਹਾ ਕਿ ਬੀਜਿੰਗ ਕੋਲ “ਢੁਕਵੇਂ ਨੀਤੀਗਤ ਉਪਾਅ” ਹਨ ਜੋ ਟਰੰਪ ਦੇ 104% ਟੈਰਿਫ ਕਾਰਨ ਹੋਏ ਨੁਕਸਾਨ ਨੂੰ “ਪੂਰੀ ਤਰ੍ਹਾਂ ਬੇਅਸਰ” ਕਰ ਸਕਦੇ ਹਨ। ਲੀ ਨੇ ਦਾਅਵਾ ਕੀਤਾ ਕਿ ਇਸ ਸਾਲ ਚੀਨ ਦੀਆਂ ਵਿਸ਼ਾਲ ਆਰਥਿਕ ਨੀਤੀਆਂ ਸਾਰੀਆਂ ਅਨਿਸ਼ਚਿਤਤਾਵਾਂ ਨੂੰ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤੀਆਂ ਗਈਆਂ ਹਨ, ਅਤੇ ਦੇਸ਼ ਆਪਣੇ ਸਿਹਤਮੰਦ ਅਤੇ ਟਿਕਾਊ ਆਰਥਿਕ ਵਿਕਾਸ ਬਾਰੇ “ਬਹੁਤ ਜ਼ਿਆਦਾ ਵਿਸ਼ਵਾਸ” ਰੱਖਦਾ ਹੈ।
ਉਨ੍ਹਾਂ ਟਰੰਪ ਦੇ ਇਸ ਕਦਮ ਨੂੰ ‘ਇਕਪਾਸੜਵਾਦ, Protectionism ਅਤੇ ਆਰਥਿਕ ਦਬਾਅ’ ਦੀ ਉਦਾਹਰਣ ਦੱਸਿਆ। ਉਨ੍ਹਾਂ ਨੇ ਵੌਨ ਡੇਰ ਲੇਅਨ ਨੂੰ ਕਿਹਾ, “Protectionism ਤੁਹਾਨੂੰ ਕਿਤੇ ਵੀ ਨਹੀਂ ਲੈ ਕੇ ਜਾਂਦਾ – ਖੁੱਲ੍ਹਾਪਣ ਅਤੇ ਸਹਿਯੋਗ ਸਹੀ ਰਸਤਾ ਹੈ।” ਜਦੋਂ ਅਮਰੀਕਾ ਨੇ ਚੀਨ ‘ਤੇ 34 ਪ੍ਰਤੀਸ਼ਤ ਟੈਰਿਫ ਲਗਾਇਆ ਤਾਂ ਚੀਨ ਨੇ ਵੀ ਜਵਾਬ ਵਿੱਚ 34 ਪ੍ਰਤੀਸ਼ਤ ਟੈਰਿਫ ਲਗਾਇਆ। ਇਸ ਬਾਰੇ ਚੀਨ ਦਾ ਕਹਿਣਾ ਹੈ ਕਿ ਉਸ ਦੀ ਸਖ਼ਤ ਪ੍ਰਤੀਕਿਰਿਆ ਨਾ ਸਿਰਫ਼ ਉਸ ਦੇ ਹਿੱਤਾਂ ਦੀ ਰੱਖਿਆ ਲਈ ਹੈ, ਸਗੋਂ ਅੰਤਰਰਾਸ਼ਟਰੀ ਵਪਾਰ ਨਿਯਮਾਂ ਨੂੰ ਬਚਾਉਣ ਲਈ ਵੀ ਹੈ। ਟਰੰਪ ਨੇ ਦਾਅਵਾ ਕੀਤਾ ਕਿ ਟੈਰਿਫ ਤੋਂ ਪਰੇਸ਼ਾਨ ਚੀਨ ਹਰ ਕੀਮਤ ‘ਤੇ ਸਮਝੌਤਾ ਚਾਹੁੰਦਾ ਹੈ। ਵ੍ਹਾਈਟ ਹਾਊਸ ਦੀ ਬੁਲਾਰਨ ਕੈਰੋਲੀਨ ਲੇਵਿਟ ਨੇ ਕਿਹਾ ਕਿ ਜੇਕਰ ਚੀਨ ਦੀ ਲੀਡਰਸ਼ਿਪ ਸੰਪਰਕ ਕਰਦੀ ਹੈ ਤਾਂ ਟਰੰਪ “ਉਦਾਰ” ਹੋਣਗੇ। ਪਰ ਚੀਨ ਦੇ ਵਣਜ ਮੰਤਰਾਲੇ ਨੇ ਸਪੱਸ਼ਟ ਤੌਰ ‘ਤੇ ਕਿਹਾ, ‘ਅਸੀਂ ਅੰਤ ਤੱਕ ਲੜਾਂਗੇ।’
ਚੀਨ ਅਤੇ ਯੂਰਪ ਨੇੜੇ ਆ ਰਹੇ ਹਨ
ਟਰੰਪ ਦੇ 20% ਟੈਰਿਫ ਤੋਂ ਯੂਰਪੀ ਸੰਘ ਪ੍ਰਭਾਵਿਤ ਹੋਇਆ ਹੈ, ਜਿਸ ਤੋਂ ਬਾਅਦ ਯੂਰਪੀ ਸੰਘ ਹੁਣ ਚੀਨ ਨਾਲ ਸਬੰਧ ਸੁਧਾਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਸਪੇਨ ਦੇ ਪ੍ਰਧਾਨ ਮੰਤਰੀ ਪੇਡਰੋ ਸਾਂਚੇਜ਼ ਨੇ ਬੁੱਧਵਾਰ ਨੂੰ ਵੀਅਤਨਾਮ ਅਤੇ ਸ਼ੁੱਕਰਵਾਰ ਨੂੰ ਚੀਨ ਦਾ ਦੌਰਾ ਸ਼ੁਰੂ ਕੀਤਾ। ਉਹ ਸ਼ੀ ਜਿਨਪਿੰਗ ਨਾਲ ਮੁਲਾਕਾਤ ਕਰਨਗੇ ਅਤੇ ਨਿਵੇਸ਼ ਦੇ ਮੌਕਿਆਂ ਦੀ ਪੜਚੋਲ ਕਰਨਗੇ। ਸਾਂਚੇਜ਼ ਪਹਿਲਾਂ ਵੀ ਚੀਨ ਪ੍ਰਤੀ ਨਰਮ ਰੁਖ਼ ਦਿਖਾ ਚੁੱਕੇ ਹਨ। ਸਤੰਬਰ 2024 ਵਿੱਚ ਬੀਜਿੰਗ ਵਿੱਚ, ਉਨ੍ਹਾਂ ਨੇ ਯੂਰਪੀ ਸੰਘ ਨੂੰ ਚੀਨੀ ਇਲੈਕਟ੍ਰਿਕ ਵਾਹਨਾਂ ‘ਤੇ ਭਾਰੀ ਟੈਰਿਫ ਲਗਾਉਣ ਦੀਆਂ ਯੋਜਨਾਵਾਂ ‘ਤੇ ਮੁੜ ਵਿਚਾਰ ਕਰਨ ਲਈ ਕਿਹਾ ਸੀ। ਯੂਰਪੀ ਸੰਘ ਤੋਂ ਵੀ ਸਕਾਰਾਤਮਕ ਸੰਕੇਤ ਮਿਲੇ ਹਨ। ਟਰੰਪ ਦੇ ਸੱਤਾ ਵਿੱਚ ਵਾਪਸ ਆਉਣ ਤੋਂ ਬਾਅਦ Ursula von der Leyen ਨੇ ‘ਚੀਨ ਨਾਲ ਰਚਨਾਤਮਕ ਸਬੰਧਾਂ’ ਦੀ ਗੱਲ ਕੀਤੀ। ਇਸ ਨਾਲ ਇਹ ਸਵਾਲ ਉੱਠਦਾ ਹੈ ਕਿ ਕੀ ਦੁਨੀਆ ਅਮਰੀਕਾ ਨੂੰ ਅਲੱਗ-ਥਲੱਗ ਕਰਕੇ ਆਪਸੀ ਸਹਿਯੋਗ ਵੱਲ ਵਧ ਰਹੀ ਹੈ।
