ਕੀ ਤੁਸੀਂ YouTuber ਹੋ ਅਤੇ ਵਧੇਰੇ ਵਿਯੂਜ਼ ਲਈ ਨਵੀਂ ਸਮੱਗਰੀ ਦੀ ਖੋਜ ਕਰਦੇ ਰਹਿੰਦੇ ਹੋ, ਤਾਂ ਇਹ ਖਬਰ ਤੁਹਾਡੇ ਲਈ ਹੈ। ਯੂਟਿਊਬ ਨੇ ਆਪਣੇ ‘ਇੰਡੀਆ’ ਬਲਾਗ ‘ਚ ਜਾਣਕਾਰੀ ਦਿੱਤੀ ਹੈ ਕਿ ਸਾਲ 2024 ‘ਚ ਕਿਸ ਵੀਡੀਓ ਨੂੰ ਉਸ ਦੇ ਪਲੇਟਫਾਰਮ ‘ਤੇ ਭਾਰਤੀ ਦਰਸ਼ਕਾਂ ਨੇ ਸਭ ਤੋਂ ਵੱਧ ਦੇਖਿਆ। ਇਸ ਤੋਂ ਤੁਹਾਨੂੰ ਇਹ ਵੀ ਪਤਾ ਲੱਗੇਗਾ ਕਿ ਭਾਰਤੀ ਦਰਸ਼ਕਾਂ ਨੂੰ ਆਕਰਸ਼ਿਤ ਕਰਨ ਲਈ ਕਿਸ ਤਰ੍ਹਾਂ ਦੀ ਵੀਡੀਓ ਬਣਾਉਣੀ ਚਾਹੀਦੀ ਹੈ।
‘ਇੰਡੀਆ’ ਬਲਾਗ ‘ਚ ਇਨ੍ਹਾਂ ਪ੍ਰਚਲਿਤ ਵਿਸ਼ਿਆਂ ਦੀ ਸੂਚੀ ਦਿੰਦੇ ਹੋਏ ਯੂ-ਟਿਊਬ ਨੇ ਕਿਹਾ ਕਿ ਪਿਛਲੇ ਸਾਲ ਭਾਰਤੀ ‘ਕੰਟੈਂਟ ਕ੍ਰਿਏਟਰ’ ਅਤੇ ਪ੍ਰਸ਼ੰਸਕਾਂ ਨੇ ਆਪਣੀ ਵਿਲੱਖਣ ਆਵਾਜ਼ ਅਤੇ ਰਚਨਾਤਮਕਤਾ ਨਾਲ ਇੰਟਰਨੈੱਟ ਨੂੰ ਨਵਾਂ ਰੂਪ ਦੇਣ ਦਾ ਕੰਮ ਕੀਤਾ ਹੈ। ਯੂਟਿਊਬ ਨੇ ਆਪਣੇ ਬਲਾਗ ‘ਚ ਕਿਹਾ ਕਿ ਸਾਲ 2024 ‘ਚ ਸਭ ਤੋਂ ਜ਼ਿਆਦਾ ਦੇਖੇ ਜਾਣ ਵਾਲੇ ਸਮਾਗਮਾਂ ‘ਚ ਰਾਧਿਕਾ-ਅਨੰਤ ਅੰਬਾਨੀ ਦਾ ਵਿਆਹ, ਆਈ.ਪੀ.ਐੱਲ., ਗੇਮਰ ਅੱਜੂ ਭਾਈ ਦੀ ਮਨੋਰੰਜਕ ਕਮੈਂਟਰੀ ਅਤੇ ‘ਮੋਏ ਮੋਏ’ ਦੀ ਦਿਲਚਸਪ ਟਿਊਨ ਸਨ। ਇਹਨਾਂ ਸਾਰਿਆਂ ਨੇ ਸਭ ਤੋਂ ਵੱਧ ਰੁਝਾਨ ਵਾਲੇ ਵਿਸ਼ਿਆਂ ਵਿੱਚ ਇੱਕ ਸਥਾਨ ਪਾਇਆ ਹੈ।
ਤੁਸੀਂ ਸਭ ਤੋਂ ਵੱਧ ਕੀ ਦੇਖਿਆ?
ਬਲਾਗ ਦੇ ਅਨੁਸਾਰ, ਯੂਟਿਊਬ ‘ਤੇ ‘ਅੰਬਾਨੀ’ ਅਤੇ ‘ਸ਼ਾਦੀ’ ਟਾਈਟਲ ਵਾਲੇ ਵੀਡੀਓਜ਼ ਨੂੰ 2024 ਵਿੱਚ ਭਾਰਤ ਵਿੱਚ 6.5 ਬਿਲੀਅਨ ਤੋਂ ਵੱਧ ਵਾਰ ਦੇਖਿਆ ਗਿਆ ਸੀ। ਪ੍ਰਸ਼ੰਸਕਾਂ ਨੇ ਇਸ ਸ਼ਾਨਦਾਰ ਵਿਆਹ ਨਾਲ ਜੁੜੇ ਹਰ ਪਹਿਲੂ ਨੂੰ ਬੜੀ ਦਿਲਚਸਪੀ ਨਾਲ ਦੇਖਿਆ। ਇਸ ਤੋਂ ਇਲਾਵਾ ਟੋਟਲ ਗੇਮਿੰਗ ਦੇ ਨਾਂ ਨਾਲ ਮਸ਼ਹੂਰ ਅੱਜੂ ਭਾਈ ਨੇ ਵੀ ਇਸ ਸੂਚੀ ‘ਚ ਜਗ੍ਹਾ ਬਣਾਈ ਹੈ। ਆਪਣੀ ਮਨੋਰੰਜਕ ਆਵਾਜ਼ ਅਤੇ ਆਕਰਸ਼ਕ ਧੁਨ ਕਾਰਨ ਪ੍ਰਸਿੱਧ ਹੋਏ ਗੀਤ ‘ਮੋਏ ਮੋਏ’ ਨੂੰ ਵੀ 4.5 ਬਿਲੀਅਨ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ।
ਕ੍ਰਿਕਟ ਨੇ ਵੀ ਬਣਾਈ ਆਪਣੀ ਥਾਂ
ਕ੍ਰਿਕਟ ਨਾਲ ਜੁੜੇ ਵੀਡੀਓਜ਼ ਵੀ ਭਾਰਤ ਵਿੱਚ ਬਹੁਤ ਦੇਖੇ ਗਏ। ਇਨ੍ਹਾਂ ਵਿੱਚੋਂ, ਆਈਸੀਸੀ ਪੁਰਸ਼ਾਂ ਦੇ ਟੀ-20 ਵਿਸ਼ਵ ਕੱਪ ਅਤੇ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐਲ) ਨਾਲ ਸਬੰਧਤ ਸਮੱਗਰੀ ਨੂੰ ਸੱਤ ਅਰਬ ਤੋਂ ਵੱਧ ਵਾਰ ਦੇਖਿਆ ਗਿਆ। ਇਸ ਲਿਸਟ ‘ਚ ਇਕ ਹੋਰ ਮਸ਼ਹੂਰ ਨਾਂ ਹੈ ਗਾਇਕ ਤੇ ਅਦਾਕਾਰ ਦਿਲਜੀਤ ਦੋਸਾਂਝ ਦਾ। ਦਿਲਜੀਤ ਦੇ ਕੰਸਰਟ ਨਾਲ ਜੁੜੀ ਇਸ ਕਲਿੱਪ ਨੂੰ ਸੋਸ਼ਲ ਮੀਡੀਆ ‘ਤੇ ਕਾਫੀ ਪਸੰਦ ਕੀਤਾ ਗਿਆ ਸੀ।
ਲੋਕਾਂ ਨੇ ਰਤਨ ਟਾਟਾ ਨੂੰ ਵੀ ਬਹੁਤ ਦੇਖਿਆ
ਇਨ੍ਹਾਂ ਤੋਂ ਇਲਾਵਾ 2024 ਦੀਆਂ ਲੋਕ ਸਭਾ ਚੋਣਾਂ, ਅਕਤੂਬਰ ‘ਚ ਦਿਹਾਂਤ ਹੋ ਗਏ ਉੱਘੇ ਉਦਯੋਗਪਤੀ ਰਤਨ ਟਾਟਾ ਅਤੇ ਦਿੱਗਜ ਕਲਾਕਾਰਾਂ ਵਾਲੀ ਫਿਲਮ ‘ਕਲਕੀ 2898’ ਵੀ ਇਸ ਸੂਚੀ ‘ਚ ਸ਼ਾਮਲ ਹਨ। ਇਸ ਸਾਲ ਯੂਟਿਊਬ ‘ਤੇ ਪ੍ਰਚਲਿਤ ਵਿਸ਼ਿਆਂ ‘ਚ ‘ਪਿੰਕ ਸਾੜੀ’, ‘ਤੇਰੀ ਬਾਤੋਂ ਮੈਂ ਐਸਾ ਉਲਝਾ ਜੀਆ’, ‘ਆਜ ਕੀ ਰਾਤ’ ਅਤੇ ਵਿੱਕੀ ਕੌਸ਼ਲ ਦਾ ‘ਤੌਬਾ ਤੌਬਾ’ ਡਾਂਸ ਸ਼ਾਮਲ ਹਨ।
