ਆਮ ਲੋਕਾਂ ਨੂੰ ਮਹਿੰਗਾਈ ਤੋਂ ਮਿਲੀ ਵੱਡੀ ਰਾਹਤ ! ਲਗਾਤਾਰ ਦੂਸਰੇ ਮਹੀਨੇ ਘੱਟ ਹੋਈ ਮਹਿੰਗਾਈ ਦਰ, ਇਹ ਕੁੱਝ ਹੋਇਆ ਸਸਤਾ
ਅਸੀਂ ਅਕਸਰ ਸੁਣਦੇ ਹਾਂ ਕਿ ਆਮ ਆਦਮੀ ਦੀ ਕਮਰ ਮਹਿੰਗਾਈ ਨੇ ਤੋੜ ਦਿੱਤੀ ਹੈ। ਪਰ ਅਜਿਹੇ ਵਿੱਚ ਚੰਗੀ ਖ਼ਬਰ ਨਿਕਲ ਕੇ ਆਈ ਹੈ। ਸਬਜ਼ੀਆਂ, ਖਾਣ-ਪੀਣ ਦੀਆਂ ਵਸਤਾਂ ਅਤੇ ਈਂਧਨ ਦੇ ਸਸਤੇ ਹੋਣ ਕਾਰਨ ਥੋਕ ਮਹਿੰਗਾਈ ਦਰ ਲਗਾਤਾਰ ਦੂਜੇ ਮਹੀਨੇ ਘਟੀ ਅਤੇ ਅਗਸਤ ਵਿੱਚ ਇਹ 1.31 ਫ਼ੀਸਦੀ ਰਹੀ। ਸਰਕਾਰ ਨੇ ਮੰਗਲਵਾਰ ਨੂੰ ਅੰਕੜੇ ਜਾਰੀ ਕਰਕੇ ਇਹ ਜਾਣਕਾਰੀ ਦਿੱਤੀ ਹੈ। ਇਸ ਵਿਚ ਦੱਸਿਆ ਗਿਆ ਹੈ ਕਿ ਥੋਕ ਮੁੱਲ ਸੂਚਕ ਅੰਕ (Wholesale Price Index) ਆਧਾਰਿਤ ਮਹਿੰਗਾਈ ਜੁਲਾਈ ਵਿਚ 2.04 ਫੀਸਦੀ ਸੀ, ਜਦੋਂ ਕਿ ਅਗਸਤ 2023 ਵਿਚ ਇਹ (-) 0.46 ਫੀਸਦੀ ਸੀ।
ਉਦਯੋਗ ਮੰਤਰਾਲੇ ਵੱਲੋਂ ਜਾਰੀ ਬਿਆਨ ‘ਚ ਕਿਹਾ ਗਿਆ ਹੈ ਕਿ ਅਗਸਤ 2024 ‘ਚ ਖਾਣ-ਪੀਣ ਦੀਆਂ ਵਸਤੂਆਂ, ਪ੍ਰੋਸੈਸਡ ਫੂਡ ਪ੍ਰੋਡਕਟਸ, ਹੋਰ ਨਿਰਮਾਣ, ਟੈਕਸਟਾਈਲ ਮੈਨੂਫੈਕਚਰਿੰਗ ਅਤੇ ਮਸ਼ੀਨਰੀ ਅਤੇ ਉਪਕਰਨਾਂ ਆਦਿ ਦੀਆਂ ਕੀਮਤਾਂ ‘ਚ ਵਾਧਾ ਹੋਇਆ ਹੈ। ਅੰਕੜਿਆਂ ਮੁਤਾਬਕ ਖੁਰਾਕੀ ਵਸਤਾਂ ਦੀ ਮਹਿੰਗਾਈ ਅਗਸਤ ‘ਚ 3.11 ਫੀਸਦੀ ਰਹੀ, ਜਦਕਿ ਜੁਲਾਈ ‘ਚ ਇਹ 3.45 ਫੀਸਦੀ ਸੀ। ਇਸ ਦਾ ਮਤਲਬ ਹੈ ਕਿ ਇਨ੍ਹਾਂ ਉਤਪਾਦਾਂ ਦੀਆਂ ਕੀਮਤਾਂ ‘ਚ ਗਿਰਾਵਟ ਆਈ ਹੈ।
ਸਸਤੀਆਂ ਹੋ ਗਈਆਂ ਸਬਜ਼ੀਆਂ
ਅਗਸਤ ‘ਚ ਸਬਜ਼ੀਆਂ ਦੀਆਂ ਕੀਮਤਾਂ ‘ਚ 10.01 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ, ਜਦਕਿ ਜੁਲਾਈ ‘ਚ ਇਹ 8.93 ਫੀਸਦੀ ਸੀ। ਅਗਸਤ ‘ਚ ਆਲੂ ਅਤੇ ਪਿਆਜ਼ ਦੀ ਮਹਿੰਗਾਈ ਦਰ ਕ੍ਰਮਵਾਰ 77.96 ਫੀਸਦੀ ਅਤੇ 65.75 ਫੀਸਦੀ ‘ਤੇ ਰਹੀ। ਈਂਧਨ ਅਤੇ ਬਿਜਲੀ ਸ਼੍ਰੇਣੀ ਵਿੱਚ ਮਹਿੰਗਾਈ ਜੁਲਾਈ ਵਿੱਚ 1.72 ਪ੍ਰਤੀਸ਼ਤ ਦੇ ਮੁਕਾਬਲੇ ਅਗਸਤ ਵਿੱਚ 0.67 ਪ੍ਰਤੀਸ਼ਤ ਰਹੀ। ਭਾਵ ਇੱਥੇ ਗਿਰਾਵਟ ਆਈ ਸੀ।
ਪ੍ਰਚੂਨ ਮਹਿੰਗਾਈ ਨੇ ਕੀਤਾ ਸੀ ਪਰੇਸ਼ਾਨ
ਪਿਛਲੇ ਹਫਤੇ ਜਾਰੀ ਅੰਕੜਿਆਂ ਮੁਤਾਬਕ ਸਬਜ਼ੀਆਂ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਅਗਸਤ ‘ਚ ਪ੍ਰਚੂਨ ਮਹਿੰਗਾਈ ਦਰ 3.65 ਫੀਸਦੀ ਰਹੀ। ਇਹ ਜੁਲਾਈ ‘ਚ 3.60 ਫੀਸਦੀ ਤੋਂ ਜ਼ਿਆਦਾ ਸੀ। ਤੁਹਾਨੂੰ ਦੱਸ ਦੇਈਏ ਕਿ ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਮੁਦਰਾ ਨੀਤੀ ਬਣਾਉਣ ਵੇਲੇ ਮੁੱਖ ਤੌਰ ‘ਤੇ ਪ੍ਰਚੂਨ ਮਹਿੰਗਾਈ ਨੂੰ ਧਿਆਨ ਵਿੱਚ ਰੱਖਦਾ ਹੈ। ਅਗਸਤ ਦੀ ਮੁਦਰਾ ਨੀਤੀ ਸਮੀਖਿਆ ਵਿੱਚ, ਆਰਬੀਆਈ ਨੇ ਲਗਾਤਾਰ ਨੌਵੀਂ ਵਾਰ ਨੀਤੀਗਤ ਦਰ ਨੂੰ 6.5 ਪ੍ਰਤੀਸ਼ਤ ‘ਤੇ ਬਰਕਰਾਰ ਰੱਖਿਆ ਸੀ।
ਘੱਟ ਸਕਦੀ ਹੈ ਪ੍ਰਚੂਨ ਮਹਿੰਗਾਈ ਦਰ
ਤੁਹਾਨੂੰ ਦੱਸ ਦੇਈਏ ਕਿ ਥੋਕ ਮਹਿੰਗਾਈ ਦਰ ‘ਚ ਗਿਰਾਵਟ ਤੋਂ ਬਾਅਦ ਇਸ ਦਾ ਅਸਰ ਪ੍ਰਚੂਨ ਮਹਿੰਗਾਈ ‘ਤੇ ਵੀ ਦਿਖਾਈ ਦੇ ਰਿਹਾ ਹੈ। ਜੇਕਰ ਅਗਸਤ ‘ਚ ਥੋਕ ਮਹਿੰਗਾਈ ਦਰ ‘ਚ ਕਮੀ ਆਈ ਹੈ ਤਾਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਸਤੰਬਰ ਮਹੀਨੇ ‘ਚ ਇਸ ਦਾ ਅਸਰ ਪ੍ਰਚੂਨ ਮਹਿੰਗਾਈ ਦਰ ‘ਤੇ ਦਿਖਾਈ ਦੇਵੇਗਾ ਅਤੇ ਇਸ ‘ਚ ਗਿਰਾਵਟ ਆਵੇਗੀ। ਪ੍ਰਚੂਨ ਮਹਿੰਗਾਈ ਦਰ ਨੂੰ ਉਪਭੋਗਤਾ ਮੁੱਲ ਅਧਾਰਤ ਮਹਿੰਗਾਈ ਦਰ ਵੀ ਕਿਹਾ ਜਾਂਦਾ ਹੈ, ਕਿਉਂਕਿ ਇਹ ਸਿੱਧੇ ਤੌਰ ‘ਤੇ ਖਪਤਕਾਰਾਂ ਦੀਆਂ ਜੇਬਾਂ ਨੂੰ ਪ੍ਰਭਾਵਤ ਕਰਦੀ ਹੈ।
