ਮਹਿਲਾ ਮੰਤਰੀ ਦਾ ਰਾਜ ਖੁੱਲ੍ਹਣ ਤੋਂ ਬਾਅਦ ਅਸਤੀਫਾ, 15 ਸਾਲਾ ਮੁੰਡੇ ਨਾਲ ਬਣਾਏ ਸਨ ਸਬੰਧ…
ਆਈਸਲੈਂਡ ਦੇ ਬੱਚਿਆਂ ਅਤੇ ਸਿੱਖਿਆ ਵਿਭਾਗ ਬਾਰੇ ਮੰਤਰੀ ਅਸਥਿਲਦੂਰ ਲੋਆ ਥੋਰਸਡੋਟੀਰ (Ásthildur Loa Thorsdóttir) ਨੇ ਹੈਰਾਨ ਕਰਨ ਵਾਲੇ ਖੁਲਾਸੇ ਤੋਂ ਬਾਅਦ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਮਾਮਲਾ ਤਿੰਨ ਦਹਾਕੇ ਪੁਰਾਣਾ ਹੈ, ਪਰ ਇਸ ਦਾ ਅਸਰ ਹੁਣ ਦਿਖਾਈ ਦੇ ਰਿਹਾ ਹੈ। ਮੰਤਰੀ ਨੇ ਮੰਨਿਆ ਕਿ ਜਦੋਂ ਉਹ 22 ਸਾਲ ਦੀ ਸੀ ਤਾਂ ਉਸ ਦੇ 15 ਸਾਲ ਦੇ ਲੜਕੇ ਨਾਲ ਸਬੰਧ ਬਣਾਏ ਸਨ, ਜਿਸ ਨਾਲ ਉਸ ਦਾ ਇੱਕ ਬੱਚਾ ਵੀ ਸੀ। ਇਹ ਖਬਰ ਸਾਹਮਣੇ ਆਉਂਦੇ ਹੀ ਦੇਸ਼ ‘ਚ ਹੜਕੰਪ ਮਚ ਗਿਆ।
ਦੁਨੀਆ ਤੋਂ ਛੁਪਿਆ ਰਿਸ਼ਤਾ!
ਜਿਸ ਲੜਕੇ ਨਾਲ ਥੋਰਸਡੋਟੀਰ ਦਾ ਸਬੰਧ ਸੀ, ਉਹ ਇੱਕ ਚਰਚ ਸਮੂਹ ਨਾਲ ਜੁੜਿਆ ਹੋਇਆ ਸੀ ਜਿੱਥੇ ਉਹ ਇੱਕ ਸਲਾਹਕਾਰ ਵਜੋਂ ਕੰਮ ਕਰਦੀ ਸੀ। ਖਬਰਾਂ ਮੁਤਾਬਕ ਉਸ ਸਮੇਂ ਲੜਕੇ ਦੀ ਉਮਰ 15 ਸਾਲ ਸੀ ਅਤੇ ਕੁਝ ਸਮੇਂ ਬਾਅਦ ਉਹ ਪਿਤਾ ਬਣ ਗਿਆ। 16 ਸਾਲ ਦੀ ਉਮਰ ‘ਚ ਉਸ ਦੇ ਸਿਰ ਬੱਚੇ ਦੀ ਜ਼ਿੰਮੇਵਾਰੀ ਪੈ ਗਈ ਸੀ ਪਰ ਰਿਸ਼ਤੇ ਨੂੰ ਲੁਕੋ ਕੇ ਰੱਖਿਆ ਗਿਆ ਸੀ। ਪਹਿਲਾਂ ਤਾਂ ਉਸ ਨੂੰ ਆਪਣੇ ਬੱਚੇ ਨੂੰ ਮਿਲਣ ਦੀ ਇਜਾਜ਼ਤ ਦਿੱਤੀ ਗਈ ਸੀ ਪਰ ਜਦੋਂ ਬੱਚਾ ਜਵਾਨ ਹੋ ਗਿਆ ਤਾਂ ਉਸ ਨੂੰ ਮਿਲਣ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ। ਹਾਲਾਂਕਿ, ਉਸ ਨੂੰ 18 ਸਾਲਾਂ ਲਈ ਬਾਲ ਸਹਾਇਤਾ ਦਾ ਭੁਗਤਾਨ ਕਰਨ ਲਈ ਮਜਬੂਰ ਕੀਤਾ ਗਿਆ ਸੀ।
ਆਈਸਲੈਂਡ ਵਿੱਚ 15 ਸਾਲ ਦੀ ਉਮਰ ਨੂੰ ਸਹਿਮਤੀ ਦੀ ਕਾਨੂੰਨੀ ਉਮਰ ਮੰਨਿਆ ਜਾਂਦਾ ਹੈ, ਪਰ ਜਦੋਂ ਇਕ ਬਾਲਗ ਅਜਿਹਾ ਕਰਦਾ ਹੈ, ਜੋ ਕਿਸੇ ਨਬਾਲਿਗ ਦੀ ਸਰਪ੍ਰਸਤ ਜਾਂ ਮੇਂਟਰਸ਼ਿੱਪ ਦੀ ਸਥਿਤੀ ਵਿੱਚ ਹੈ ਤਾਂ ਇਸ ਨੂੰ ਅਪਰਾਧ ਮੰਨਿਆ ਜਾਂਦਾ ਹੈ। ਇਸ ਮਾਮਲੇ ਵਿਚ ਚਰਚ ਨਾਲ ਸਬੰਧ ਹੋਣ ਕਾਰਨ ਮਾਮਲਾ ਹੋਰ ਵੀ ਗੁੰਝਲਦਾਰ ਹੋ ਗਿਆ।
ਮੰਤਰੀ ਦਾ ਅਹੁਦਾ ਛੱਡਿਆ, ਸੰਸਦ ਮੈਂਬਰ ਬਣੇ ਰਹਿਣਗੇ
ਲੜਕੇ ਨੇ ਆਪਣੇ ਆਪ ਨੂੰ ਪੀੜਤ ਨਹੀਂ ਸਮਝਿਆ, ਪਰ ਇਹ ਕਿਹਾ ਕਿ ਉਹ ਉਸ ਸਮੇਂ ਇੱਕ ਮੁਸ਼ਕਲ ਸਮੇਂ ਵਿੱਚੋਂ ਲੰਘ ਰਿਹਾ ਸੀ ਅਤੇ ਉਸ ਨੂੰ ਚਰਚ ਤੋਂ ਸਮਰਥਨ ਪ੍ਰਾਪਤ ਹੋਇਆ ਸੀ। ਜਦੋਂ ਇਹ ਮਾਮਲਾ ਮੀਡੀਆ ‘ਚ ਆਇਆ ਤਾਂ ਥੋਰਸਡੋਟੀਰ ‘ਤੇ ਦਬਾਅ ਵਧ ਗਿਆ। ਉਸ ਨੇ ਵੀਰਵਾਰ ਨੂੰ ਅਚਾਨਕ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ, ਹਾਲਾਂਕਿ ਉਹ ਸੰਸਦ ਮੈਂਬਰ ਬਣੇ ਰਹਿਣਗੇ।
ਇਸ ਮੁੱਦੇ ਉਤੇ ਟਿੱਪਣੀ ਕਰਦਿਆਂ ਆਈਸਲੈਂਡ ਦੇ ਪ੍ਰਧਾਨ ਮੰਤਰੀ ਕ੍ਰਿਸਟਨ ਫਰੋਸਟਡੋਟਿਰ ਨੇ ਕਿਹਾ ਕਿ ਇਹ ਮਾਮਲਾ ਮੰਦਭਾਗਾ ਹੈ, ਪਰ ਇਸ ਦਾ ਸਰਕਾਰ ਦੇ ਕੰਮਕਾਜ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ। ਪ੍ਰਧਾਨ ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਇਹ ਥੋਰਸਡੋਟਿਰ ਦਾ ਨਿੱਜੀ ਫੈਸਲਾ ਸੀ ਅਤੇ ਉਨ੍ਹਾਂ ਨੇ ਤੁਰੰਤ ਅਸਤੀਫਾ ਦੇ ਦਿੱਤਾ ਅਤੇ ਜ਼ਿੰਮੇਵਾਰੀ ਲਈ।
