7th Pay Commission: ਦੇਸ਼ ਦੇ 1 ਕਰੋੜ ਤੋਂ ਵੱਧ ਕੇਂਦਰੀ ਕਰਮਚਾਰੀ ਅਤੇ ਪੈਨਸ਼ਨਰ ਨੂੰ ਅੱਜ ਮਹਿੰਗਾਈ ਭੱਤੇ (DA) ਅਤੇ ਮਹਿੰਗਾਈ ਰਾਹਤ (DR) ਵਿੱਚ ਵਾਧੇ ਦਾ ਤੋਹਫ਼ਾ ਮਿਲ ਸਕਦਾ ਹੈ। ਕੇਂਦਰ ਸਰਕਾਰ ਇਸ ਫੈਸਲੇ ਦਾ ਐਲਾਨ ਹੋਲੀ ਤੋਂ ਪਹਿਲਾਂ ਬੁੱਧਵਾਰ, 12 ਮਾਰਚ ਨੂੰ ਯਾਨੀ ਅੱਜ ਕਰ ਸਕਦੀ ਹੈ। ਮਹਿੰਗਾਈ ਭੱਤੇ ਵਿੱਚ ਵਾਧੇ ਬਾਰੇ ਅੰਤਿਮ ਫੈਸਲਾ ਕੈਬਨਿਟ ਦੀ ਮੀਟਿੰਗ ਤੋਂ ਬਾਅਦ ਲਿਆ ਜਾਵੇਗਾ। ਸਰਕਾਰ ਹਰ ਸਾਲ 1 ਜਨਵਰੀ ਅਤੇ 1 ਜੁਲਾਈ ਨੂੰ ਡੀਏ ਵਿੱਚ ਸੋਧ ਕਰਦੀ ਹੈ, ਪਰ ਇਸਦਾ ਐਲਾਨ ਬਾਅਦ ਵਿੱਚ ਕੀਤਾ ਜਾਂਦਾ ਹੈ।
ਕਿੰਨਾ ਵਧ ਸਕਦਾ ਹੈ ਡੀਏ ?
ਮੀਡੀਆ ਰਿਪੋਰਟਾਂ ਅਨੁਸਾਰ, ਇਸ ਵਾਰ ਮਹਿੰਗਾਈ ਭੱਤਾ 2% ਵਧ ਸਕਦਾ ਹੈ, ਜਿਸ ਕਾਰਨ ਡੀਏ 53% ਤੋਂ ਵਧ ਕੇ 55% ਹੋ ਜਾਵੇਗਾ। ਹਾਲਾਂਕਿ, ਕੁਝ ਕਰਮਚਾਰੀ ਸੰਗਠਨ 3% ਵਾਧੇ ਦੀ ਮੰਗ ਕਰ ਰਹੇ ਹਨ ਪਰ ਇਸ ਬਾਰੇ ਅੰਤਿਮ ਫੈਸਲਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਹੋਣ ਵਾਲੀ ਕੈਬਨਿਟ ਮੀਟਿੰਗ ਵਿੱਚ ਲਿਆ ਜਾਵੇਗਾ। ਇਸ ਤੋਂ ਪਹਿਲਾਂ, ਅਕਤੂਬਰ 2024 ਵਿੱਚ ਡੀਏ ਵਿੱਚ 3% ਵਾਧਾ ਕੀਤਾ ਗਿਆ ਸੀ, ਜਿਸ ਨਾਲ ਇਹ 50% ਤੋਂ 53% ਹੋ ਗਿਆ ਸੀ।
ਡੀ.ਏ ਵਧਣ ਨਾਲ ਕਿੰਨੀ ਵਧੇਗੀ ਤਨਖਾਹ ?
ਜੇਕਰ ਮਹਿੰਗਾਈ ਭੱਤਾ (DA) 2% ਵਧਦਾ ਹੈ, ਤਾਂ 18,000 ਰੁਪਏ ਦੀ ਬੇਸਿਕ ਤਨਖਾਹ ਵਾਲੇ ਕਰਮਚਾਰੀ ਦੀ ਤਨਖਾਹ ਵਿੱਚ ਪ੍ਰਤੀ ਮਹੀਨਾ 360 ਰੁਪਏ ਦਾ ਵਾਧਾ ਹੋਵੇਗਾ। ਵਰਤਮਾਨ ਵਿੱਚ, ਉਸਨੂੰ 53% ਡੀਏ ਦੀ ਦਰ ਨਾਲ 9,540 ਰੁਪਏ ਮਿਲ ਰਹੇ ਹਨ, ਪਰ 2% ਵਾਧੇ ਤੋਂ ਬਾਅਦ, ਇਹ 9,900 ਰੁਪਏ ਹੋ ਜਾਵੇਗਾ। ਜੇਕਰ 3% ਵਧਾਇਆ ਜਾਂਦਾ ਹੈ, ਤਾਂ ਕੁੱਲ ਡੀਏ 540 ਰੁਪਏ ਤੋਂ ਵਧ ਕੇ 10,080 ਰੁਪਏ ਹੋ ਜਾਵੇਗਾ। ਇਸ ਨਾਲ ਕਰਮਚਾਰੀਆਂ ਨੂੰ ਉਨ੍ਹਾਂ ਦੀ ਤਨਖਾਹ ਵਿੱਚ ਸਿੱਧਾ ਫਾਇਦਾ ਹੋਵੇਗਾ।
