Foxconn ਅਤੇ Pegatron ਤੋਂ ਬਾਅਦ ਇੱਕ ਹੋਰ ਕੰਪਨੀ ਚੀਨ ਨੂੰ ਛੱਡ, ਭਾਰਤ ‘ਚ ਲਾਵੇਗੀ ਮੈਨੂਫੈਕਚਰਿੰਗ ਪਲਾਂਟ
Foxconn ਅਤੇ Pegatron ਤੋਂ ਬਾਅਦ ਆਈਫੋਨ ਬਣਾਉਣ ਵਾਲੀ ਕੰਪਨੀ ਐਪਲ ਦੀ ਇਕ ਹੋਰ ਸਪਲਾਇਰ ਹੁਣ ਭਾਰਤ ‘ਚ ਫੈਕਟਰੀ ਲਗਾਉਣ ਜਾ ਰਹੀ ਹੈ। ਐਪਲ ਕਾਂਟ੍ਰੇਕਟਰ Jabil Inc ਨੇ ਤਿਰੂਚਿਰਾਪੱਲੀ, ਤਾਮਿਲਨਾਡੂ ਵਿੱਚ ਇੱਕ ਨਵਾਂ ਇਲੈਕਟ੍ਰੋਨਿਕਸ ਮੈਨੂਫੈਕਚਰਿੰਗ ਪਲਾਂਟ ਸਥਾਪਤ ਕਰਨ ਦਾ ਫੈਸਲਾ ਕੀਤਾ ਹੈ। ਜਬਿਲ ਦਾ ਭਾਰਤ ਵਿੱਚ ਪਹਿਲਾਂ ਹੀ ਇੱਕ ਪਲਾਂਟ ਹੈ।
ਇਹ ਪੁਣੇ, ਮਹਾਰਾਸ਼ਟਰ ਵਿੱਚ ਸਥਿਤ ਹੈ ਅਤੇ ਇੱਥੇ ਲਗਭਗ 2,500 ਕਰਮਚਾਰੀ ਕੰਮ ਕਰਦੇ ਹਨ। 8.58 ਲੱਖ ਵਰਗ ਫੁੱਟ ਵਿੱਚ ਫੈਲੇ ਪੁਣੇ ਪਲਾਂਟ ਵਿੱਚ, ਜਬਿਲ ਐਪਲ ਲਈ ਏਅਰਪੌਡਜ਼ ਦੀ ਪਲਾਸਟਿਕ ਬਾਡੀ ਵਰਗੇ ਪੁਰਜ਼ੇ ਬਣਾਉਂਦਾ ਹੈ। ਹੁਣ ਤੱਕ ਜਬਿਲ ਨੇ ਨਿਰਮਾਣ ਲਈ ਚੀਨ ਅਤੇ ਵੀਅਤਨਾਮ ਨੂੰ ਪਹਿਲ ਦਿੱਤੀ ਹੈ। ਪਰ ਹੁਣ ਉਹ ਭਾਰਤ ਨੂੰ ਵੀ ਅਹਿਮੀਅਤ ਦੇਣ ਲੱਗ ਪਿਆ ਹੈ।
ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਐਮ ਕੇ ਸਟਾਲਿਨ ਦੀ ਅਮਰੀਕਾ ਫੇਰੀ ਦੌਰਾਨ ਮੰਗਲਵਾਰ ਨੂੰ Jabil ਅਤੇ ਸੂਬਾ ਸਰਕਾਰ ਵਿਚਾਲੇ ਇਸ ਡੀਲ ‘ਤੇ ਦਸਤਖਤ ਕੀਤੇ ਗਏ ਸਨ। ਜਬਿਲ ਤਿਰੂਚਿਰਾਪੱਲੀ ਯੂਨਿਟ ‘ਤੇ 2,000 ਕਰੋੜ ਰੁਪਏ ਦਾ ਨਿਵੇਸ਼ ਕਰੇਗੀ ਅਤੇ ਜਬਿਲ ਦੀ ਇਹ ਫੈਕਟਰੀ 5,000 ਲੋਕਾਂ ਨੂੰ ਰੁਜ਼ਗਾਰ ਪ੍ਰਦਾਨ ਕਰੇਗੀ। ਐਪਲ ਦੇ ਨਾਲ, ਜਬਿਲ ਸਿਸਕੋ ਅਤੇ ਐਚਬੀ ਦਾ ਵੀ ਇੱਕ ਪ੍ਰਮੁੱਖ ਸਪਲਾਇਰ ਹੈ। ਸਟਾਲਿਨ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X ‘ਤੇ ਲਿਖਿਆ, “ਗਲੋਬਲ ਈਐਮਐਸ ਦਿੱਗਜ ਜਬਿਲ ਤਿਰੂਚਿਰਾਪੱਲੀ ਵਿੱਚ 2 ਹਜ਼ਾਰ ਕਰੋੜ ਰੁਪਏ ਦਾ ਵੱਡਾ ਨਿਵੇਸ਼ ਕਰੇਗੀ। “ਇਸ ਨਾਲ 5 ਹਜ਼ਾਰ ਨੌਕਰੀਆਂ ਪੈਦਾ ਹੋਣਗੀਆਂ ਅਤੇ ਇਲੈਕਟ੍ਰੋਨਿਕਸ ਨਿਰਮਾਣ ਲਈ ਇੱਕ ਨਵਾਂ ਕਲਸਟਰ ਬਣੇਗਾ।”
ਰੌਕਵੈਲ ਆਪਰੇਸ਼ਨਾਂ ਦਾ ਵਿਸਥਾਰ ਕਰੇਗਾ
ਰੌਕਵੈਲ ਆਟੋਮੇਸ਼ਨ ਕਾਂਚੀਪੁਰਮ ਵਿੱਚ 666 ਕਰੋੜ ਰੁਪਏ ਦੇ ਨਿਵੇਸ਼ ਨਾਲ ਆਪਣੇ ਨਿਰਮਾਣ ਪਲਾਂਟ ਦਾ ਵਿਸਤਾਰ ਵੀ ਕਰੇਗੀ, ਜਿਸ ਨਾਲ 365 ਨਵੀਆਂ ਨੌਕਰੀਆਂ ਪੈਦਾ ਹੋਣਗੀਆਂ। ਤਾਮਿਲਨਾਡੂ ਸਰਕਾਰ ਨੇ ਨੌਜਵਾਨਾਂ ਨੂੰ ਹੁਨਰ ਪ੍ਰਦਾਨ ਕਰਨ ਅਤੇ MSMEs ਅਤੇ ਸਟਾਰਟਅੱਪ ਨੂੰ ਉਤਸ਼ਾਹਿਤ ਕਰਨ ਦੇ ਨਾਲ-ਨਾਲ ਪੂਰੇ ਉਦਯੋਗਿਕ ਵਾਤਾਵਰਣ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ Autodesk ਨਾਲ ਇੱਕ ਸਮਝੌਤੇ ‘ਤੇ ਹਸਤਾਖਰ ਕੀਤੇ ਹਨ।
ਤਾਮਿਲਨਾਡੂ ਤੋਂ ਇਲੈਕਟ੍ਰੋਨਿਕਸ ਦੀ ਬਰਾਮਦ ਨੂੰ ਮਿਲੀ ਰਫਤਾਰ: ਹਾਲ ਹੀ ਦੇ ਸਮੇਂ ਵਿੱਚ, ਤਾਮਿਲਨਾਡੂ ਤੋਂ ਇਲੈਕਟ੍ਰੋਨਿਕਸ ਦੀ ਬਰਾਮਦ ਵਿੱਚ ਵਾਧਾ ਹੋਇਆ ਹੈ, ਜਿਸਦਾ ਮੁੱਖ ਕਾਰਨ ਆਈਫੋਨ ਨਿਰਯਾਤ ਵਿੱਚ ਵਾਧਾ ਹੈ। ਹੁਣ ਰਾਜ ਦੇਸ਼ ਦਾ ਸਭ ਤੋਂ ਵੱਡਾ ਇਲੈਕਟ੍ਰੋਨਿਕਸ ਬਰਾਮਦਕਾਰ ਬਣ ਗਿਆ ਹੈ। ਇਸ ਦਾ ਨਿਰਯਾਤ ਵਿੱਤੀ ਸਾਲ 2024 ਵਿੱਚ $9.56 ਬਿਲੀਅਨ ਤੱਕ ਪਹੁੰਚ ਗਿਆ ਹੈ, ਜੋ ਕਿ ਵਿੱਤੀ ਸਾਲ 2023 ਵਿੱਚ $5.37 ਬਿਲੀਅਨ ਤੋਂ 78 ਪ੍ਰਤੀਸ਼ਤ ਵੱਧ ਹੈ।
ਬਰਾਮਦ ਦੇ ਮੋਰਚੇ ‘ਤੇ, ਤਾਮਿਲਨਾਡੂ ਹੁਣ ਕਰਨਾਟਕ ਅਤੇ ਉੱਤਰ ਪ੍ਰਦੇਸ਼ ਤੋਂ ਬਹੁਤ ਅੱਗੇ ਨਿਕਲ ਗਿਆ ਹੈ। ਉਦਯੋਗ ਮਾਹਿਰਾਂ ਦਾ ਕਹਿਣਾ ਹੈ ਕਿ ਬਰਾਮਦ ਵਧਣ ਦਾ ਵੱਡਾ ਕਾਰਨ ਐਪਲ ਵਰਗੀਆਂ ਕੌਮਾਂਤਰੀ ਕੰਪਨੀਆਂ ਦੀ ਚਾਈਨਾ ਪਲੱਸ ਵਨ ਰਣਨੀਤੀ ਹੈ। ਇਸ ਤੋਂ ਬਾਅਦ, ਫੌਕਸਕਾਨ ਅਤੇ ਪੇਗਟ੍ਰੋਨ ਵਰਗੇ ਕੰਟਰੈਕਟ ਨਿਰਮਾਤਾਵਾਂ ਅਤੇ ਸੈਲਕੌਂਪ ਵਰਗੇ ਸਪਲਾਇਰਾਂ ਨੇ ਪਿਛਲੇ ਸਾਲ ਤਾਮਿਲਨਾਡੂ ਨੂੰ ਦੇਸ਼ ਦਾ ਇਲੈਕਟ੍ਰੋਨਿਕਸ ਹੱਬ ਬਣਾਉਣ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ।
