ਰੂਸ ਦੀ ਧਰਤੀ ‘ਤੇ ਯੂਕਰੇਨ ਨੇ ਖੋਲ੍ਹਿਆ ਮਿਲਟਰੀ ਦਫ਼ਤਰ, ਕੀ ਹਾਰ ਵੱਲ ਵੱਧ ਰਹੇ ਪੁਤਿਨ ?

ਯੂਕਰੇਨ ਅਤੇ ਰੂਸ ਵਿਚਾਲੇ ਜੰਗ ਹੁਣ ਖਤਰਨਾਕ ਮੋੜ ਲੈ ਰਹੀ ਹੈ। ਯੂਕਰੇਨ ਨਾ ਸਿਰਫ ਰੂਸ ‘ਚ ਦਾਖਲ ਹੋ ਗਿਆ ਹੈ ਸਗੋਂ ਉਨ੍ਹਾਂ ਨੇ ਪੁਤਿਨ ਦੀ ਜ਼ਮੀਨ ‘ਤੇ ਕਬਜ਼ਾ ਵੀ ਕਰ ਲਿਆ ਹੈ। ਯੂਕਰੇਨ ਹੁਣ ਇਸ ਤੋਂ ਇੱਕ ਕਦਮ ਅੱਗੇ ਨਿਕਲ ਗਿਆ ਹੈ। ਯੂਕਰੇਨ ਨੇ ਰੂਸ ਦੇ ਕੁਰਸਕ ਖੇਤਰ ਦੇ ਸੁਦਜਾ ਸ਼ਹਿਰ ‘ਤੇ ਕਬਜ਼ਾ ਕਰ ਲਿਆ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਖੁਦ ਇਸ ਦੀ ਪੁਸ਼ਟੀ ਕੀਤੀ ਹੈ। ਜ਼ੇਲੇਂਸਕੀ ਨੇ ਕਿਹਾ ਕਿ ਯੂਕਰੇਨ ਦੀ ਫੌਜ ਨੇ ਰੂਸੀ ਸ਼ਹਿਰ ਸੁਦਜਾ ‘ਤੇ ਕਬਜ਼ਾ ਕਰ ਲਿਆ ਹੈ। ਦੱਸ ਦਈਏ ਕਿ ਪਿਛਲੇ ਹਫਤੇ ਹੀ ਯੂਕਰੇਨ ਨੇ ਰੂਸ ‘ਤੇ ਗੰਭੀਰ ਹਮਲੇ ਕੀਤੇ ਸਨ ਅਤੇ ਕੁਰਸਕ ਖੇਤਰ ‘ਚ ਆਪਣੇ ਕਦਮ ਵਧਾਏ ਸਨ। ਯੂਕਰੇਨ ਦੀ ਫੌਜ ਦੀ ਧਮਕੀ ਨੂੰ ਸੁਣ ਕੇ ਰੂਸੀ ਲੋਕ ਆਪਣੇ ਘਰ ਛੱਡ ਕੇ ਭੱਜਣ ਲੱਗੇ ਹਨ। ਯੂਕਰੇਨ ਦੇ ਇਸ ਜਵਾਬੀ ਹਮਲੇ ਨੇ ਵਲਾਦੀਮੀਰ ਪੁਤਿਨ ਲਈ ਤਣਾਅ ਦੀ ਸਥਿਤੀ ਬਣਾ ਦਿੱਤੀ ਹੈ।

ਦਰਅਸਲ, ਕੀਵ ਯਾਨੀ ਯੂਕਰੇਨ ਦੀ ਫੌਜ ਪਿਛਲੇ ਬੁੱਧਵਾਰ ਤੋਂ ਕੁਰਸਕ ਸ਼ਹਿਰ ਤੋਂ 105 ਕਿਲੋਮੀਟਰ ਦੱਖਣ-ਪੱਛਮ ਵਿੱਚ ਸਥਿਤ ਸੁਦਜਾ ਸ਼ਹਿਰ ਵਿੱਚ ਹੈ। ਪਰ ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਪਹਿਲੀ ਵਾਰ ਪੁਸ਼ਟੀ ਕੀਤੀ ਹੈ ਕਿ ਉਨ੍ਹਾਂ ਦੀ ਫੌਜ ਨੇ ਇਸ ਸ਼ਹਿਰ ‘ਤੇ ਪੂਰੀ ਤਰ੍ਹਾਂ ਕਬਜ਼ਾ ਕਰ ਲਿਆ ਹੈ। ਯੂਕਰੇਨ ਦੇ ਫੌਜੀ ਮੁਖੀ ਅਲੈਗਜ਼ੈਂਡਰ ਸਿਰਸਕੀ ਮੁਤਾਬਕ ਯੂਕਰੇਨ ਦੀਆਂ ਫੌਜਾਂ ਰੂਸ ਦੀ ਧਰਤੀ ‘ਤੇ ਲਗਾਤਾਰ ਅੱਗੇ ਵਧ ਰਹੀਆਂ ਹਨ। ਹਮਲੇ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ ਯੂਕਰੇਨੀ ਫੌਜ ਰੂਸ ਵਿੱਚ 35 ਕਿਲੋਮੀਟਰ ਅੰਦਰ ਆ ਚੁੱਕੀ ਹੈ। ਯੂਕਰੇਨ ਨੇ ਹੁਣ ਤੱਕ 1150 ਵਰਗ ਕਿਲੋਮੀਟਰ ਖੇਤਰ ਅਤੇ 82 ਬਸਤੀਆਂ ‘ਤੇ ਕਬਜ਼ਾ ਕਰ ਲਿਆ ਹੈ।

ਰੂਸੀ ਸ਼ਹਿਰ ਵਿੱਚ ਯੂਕਰੇਨੀ ਫੌਜੀ ਦਫ਼ਤਰ: ਯੂਕਰੇਨ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਰੂਸੀ ਸ਼ਹਿਰ ਸੁਦਜਾ ਵਿੱਚ ਆਪਣਾ ਫੌਜੀ ਦਫਤਰ ਵੀ ਖੋਲ੍ਹਿਆ ਹੈ। ਯੂਕਰੇਨ ਦੇ ਆਰਮੀ ਚੀਫ ਸਿਰਸਕੀ ਨੇ ਕਿਹਾ ਕਿ ਸੁਦਜਾ ‘ਚ ਫੌਜੀ ਕਮਾਂਡੈਂਟ ਦਾ ਦਫਤਰ ਬਣਾਇਆ ਗਿਆ ਹੈ। ਇਸ ਦਾ ਉਦੇਸ਼ ਨਿਯੰਤਰਿਤ ਖੇਤਰਾਂ ਵਿੱਚ ਕਾਨੂੰਨ ਅਤੇ ਵਿਵਸਥਾ ਨੂੰ ਬਣਾਈ ਰੱਖਣਾ ਅਤੇ ਆਬਾਦੀ ਦੀਆਂ ਮੁਢਲੀਆਂ ਲੋੜਾਂ ਨੂੰ ਪੂਰਾ ਕਰਨਾ ਹੈ। ਇੱਥੇ ਦਿਲਚਸਪ ਗੱਲ ਇਹ ਹੈ ਕਿ ਯੂਕਰੇਨ ਨੇ ਜਿਸ ਰੂਸੀ ਸ਼ਹਿਰ ‘ਤੇ ਕਬਜ਼ਾ ਕੀਤਾ ਹੈ, ਉਹ ਰੂਸ ਲਈ ਬਹੁਤ ਮਹੱਤਵਪੂਰਨ ਹੈ। ਦੂਜੇ ਸ਼ਬਦਾਂ ਵਿਚ, ਇਹ ਸ਼ਹਿਰ ਰੂਸ ਲਈ ਪੈਸੇ ਦਾ ਸਭ ਤੋਂ ਵੱਡਾ ਸਰੋਤ ਹੈ।

ਸੀਐਨਐਨ ਦੀ ਰਿਪੋਰਟ ਮੁਤਾਬਕ ਯੂਕਰੇਨ ਨੇ ਜਾਣਬੁੱਝ ਕੇ ਸੁਦਜਾ ‘ਤੇ ਕਬਜ਼ਾ ਕੀਤਾ ਹੈ। ਯੂਕਰੇਨ ਇਸ ਸ਼ਹਿਰ ਦੇ ਬਹਾਨੇ ਵਿੱਤੀ ਤੌਰ ਉੱਤੇ ਰੂਸ ਦਾ ਲੱਕ ਤੋੜਨਾ ਚਾਹੁੰਦਾ ਹੈ। ਸੁਦਜਾ ਇੱਕ ਰੂਸੀ ਸ਼ਹਿਰ ਹੈ ਜੋ ਇੱਕ ਗੈਸ ਟਰਮੀਨਲ ਦੇ ਕੋਲ ਸਥਿਤ ਹੈ। ਇਹ ਸ਼ਹਿਰ ਯੂਕਰੇਨ ਰਾਹੀਂ ਰੂਸ ਤੋਂ ਯੂਰਪ ਤੱਕ ਗੈਸ ਸਪਲਾਈ ਕਰਨ ਦਾ ਪ੍ਰਮੁੱਖ ਕੇਂਦਰ ਹੈ। ਜੀ ਹਾਂ, ਇਸ ਸ਼ਹਿਰ ਤੋਂ ਰੂਸ ਪੂਰੇ ਯੂਰਪ ਨੂੰ ਗੈਸ ਵੇਚਦਾ ਹੈ। ਇਸ ਨਾਲ ਇਹ ਅਟਕਲਾਂ ਲਗਾਈਆਂ ਗਈਆਂ ਹਨ ਕਿ ਜ਼ੇਲੇਂਸਕੀ ਦੇ ਟੀਚਿਆਂ ਵਿੱਚੋਂ ਇੱਕ ਮਾਸਕੋ ਲਈ ਫੰਡਿੰਗ ਦੇ ਇੱਕ ਵੱਡੇ ਸਰੋਤ ਨੂੰ ਕੱਟਣਾ ਹੋ ਸਕਦਾ ਹੈ।

ਰੂਸ ਯੂਕਰੇਨ ਦੇ ਸਾਹਮਣੇ ਹਾਰਦਾ ਨਜ਼ਰ ਆ ਰਿਹਾ ਹੈ
ਦਰਅਸਲ, ਯੂਕਰੇਨ ਨੇ ਪਿਛਲੇ ਹਫ਼ਤੇ ਹੀ ਰੂਸ ‘ਤੇ ਜ਼ਮੀਨੀ ਹਮਲਾ ਸ਼ੁਰੂ ਕਰ ਦਿੱਤਾ ਸੀ। ਯੂਕਰੇਨ ਦੇ ਇਸ ਜ਼ਮੀਨੀ ਘੁਸਪੈਠ ਨੇ ਹਜ਼ਾਰਾਂ ਰੂਸੀਆਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਕਰ ਦਿੱਤਾ ਹੈ। ਇਕ ਤਰ੍ਹਾਂ ਨਾਲ, ਯੂਕਰੇਨ ਨੇ ਰੂਸ ਨੂੰ ਬੈਕਫੁੱਟ ਉੱਤੇ ਲਿਆ ਖੜ੍ਹਾ ਕੀਤਾ ਹੈ ਕਿਉਂਕਿ ਪੁਤਿਨ ਨੂੰ ਯੂਕਰੇਨੀ ਫੌਜਾਂ ਨੂੰ ਪਿੱਛੇ ਧੱਕਣ ਦਾ ਕੋਈ ਰਸਤਾ ਨਹੀਂ ਲੱਭ ਰਿਹਾ ਹੈ। ਇਸ ਤੋਂ ਪਹਿਲਾਂ ਬੁੱਧਵਾਰ ਨੂੰ ਯੂਕਰੇਨ ਦੇ ਡਰੋਨਾਂ ਨੇ ਰੂਸ ਦੇ ਚਾਰ ਹਵਾਈ ਖੇਤਰਾਂ ਨੂੰ ਨਿਸ਼ਾਨਾ ਬਣਾਇਆ, ਜੋ ਕਿ ਯੁੱਧ ਵਿੱਚ ਯੂਕਰੇਨ ਦਾ ਸਭ ਤੋਂ ਵੱਡਾ ਹਮਲਾ ਹੈ। ਹਾਲਾਂਕਿ ਰੂਸ ਨੇ ਇਸ ਹਮਲੇ ਨੂੰ ਨਾਕਾਮ ਕਰਨ ਦਾ ਦਾਅਵਾ ਕੀਤਾ ਹੈ।

ਇੱਥੇ ਖਾਸ ਗੱਲ ਇਹ ਹੈ ਕਿ ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ, ਜਦੋਂ ਕਿਸੇ ਵਿਦੇਸ਼ੀ ਫੌਜ ਨੇ ਰੂਸ ਦੀ ਧਰਤੀ ‘ਤੇ ਕਬਜ਼ਾ ਕੀਤਾ ਹੈ। ਰੂਸ ਲਈ ਇਹ ਕਿਸੇ ਵੱਡੇ ਝਟਕੇ ਤੋਂ ਘੱਟ ਨਹੀਂ ਹੈ ਕਿ ਯੂਕਰੇਨ ਨੇ ਲਗਭਗ 1150 ਵਰਗ ਕਿਲੋਮੀਟਰ ਦੇ ਖੇਤਰ ‘ਤੇ ਕਬਜ਼ਾ ਕਰ ਲਿਆ ਹੈ। ਇਹ ਵੀ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਰੂਸ ਨੇ ਯੂਕਰੇਨ ਅਤੇ ਰੂਸ ਦੇ ਕਬਜ਼ੇ ਵਾਲੇ ਕ੍ਰੀਮੀਆ ਦੇ ਮਹੱਤਵਪੂਰਨ ਜੰਗੀ ਖੇਤਰਾਂ ਤੋਂ ਆਪਣੇ ਰਿਜ਼ਰਵ ਸੈਨਿਕਾਂ ਨੂੰ ਹਟਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਯੂਕਰੇਨੀ ਫੌਜ ਮੁਤਾਬਕ ਅਜਿਹਾ ਯੂਕਰੇਨੀ ਫੌਜ ਨੂੰ ਅੱਗੇ ਵਧਣ ਤੋਂ ਰੋਕਣ ਲਈ ਕੀਤਾ ਗਿਆ ਹੈ।