ਨਿਊ ਇੰਡੀਆ ਕੋਪਰੇਟਿਵ ਬੈਂਕ ਤੋਂ ਬਾਅਦ RBI ਨੇ ਦੋ ਹੋਰ ਬੈਂਕਾਂ ‘ਤੇ ਚਲਾਇਆ ਡੰਡਾ…ਠੋਕਿਆ ਮੋਟਾ ਜੁਰਮਾਨਾ
ਵੀਰਵਾਰ ਨੂੰ ਨਿਊ ਇੰਡੀਆ ਕੋ-ਆਪਰੇਟਿਵ ਬੈਂਕ ‘ਤੇ ਕਈ ਪਾਬੰਦੀਆਂ ਲਗਾਉਣ ਤੋਂ ਬਾਅਦ, ਭਾਰਤੀ ਰਿਜ਼ਰਵ ਬੈਂਕ ਨੇ ਸ਼ੁੱਕਰਵਾਰ ਨੂੰ ਵੀ ਦੋ ਬੈਂਕਾਂ ਵਿਰੁੱਧ ਵੱਡੀ ਕਾਰਵਾਈ ਕੀਤੀ। ਨੈਨੀਤਾਲ ਬੈਂਕ ਲਿਮਟਿਡ ਅਤੇ ਉਜੀਵਨ ਸਮਾਲ ਫਾਈਨੈਂਸ ਬੈਂਕ ਰੈਗੂਲੇਟਰੀ ਮਾਪਦੰਡਾਂ ਦੀ ਉਲੰਘਣਾ ਕਾਰਨ ਆਰਬੀਆਈ ਦੇ ਰਡਾਰ ‘ਤੇ ਆ ਗਏ। ਕੇਂਦਰੀ ਬੈਂਕ ਨੇ ਦੋਵਾਂ ਬੈਂਕਾਂ ‘ਤੇ ਭਾਰੀ ਜੁਰਮਾਨੇ ਲਗਾਏ। ਇਸ ਤੋਂ ਇਲਾਵਾ, ਇੱਕ ਗੈਰ-ਬੈਂਕਿੰਗ ਵਿੱਤੀ ਕੰਪਨੀ ਸ਼੍ਰੀਰਾਮ ਫਾਈਨੈਂਸ ‘ਤੇ ਵੀ ਕੇਵਾਈਸੀ ਸਮੇਤ ਹੋਰ ਦਿਸ਼ਾ-ਨਿਰਦੇਸ਼ਾਂ ਦੀ ਉਲੰਘਣਾ ਕਰਨ ਲਈ ਜੁਰਮਾਨਾ ਲਗਾਇਆ ਗਿਆ ਹੈ।
ਆਰਬੀਆਈ ਦੇ ਅਨੁਸਾਰ, ਨੈਨੀਤਾਲ ਬੈਂਕ ਲਿਮਟਿਡ ‘ਤੇ 61.40 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਇਹ ਜੁਰਮਾਨਾ ਬੈਂਕ ਵੱਲੋਂ ‘ਐਡਵਾਂਸ ‘ਤੇ ਵਿਆਜ ਦਰ’ ਅਤੇ ‘ਬੈਂਕਾਂ ਵਿੱਚ ਗਾਹਕ ਸੇਵਾ’ ਨਾਲ ਸਬੰਧਤ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਨਾ ਕਰਨ ਕਾਰਨ ਲਗਾਇਆ ਗਿਆ ਹੈ। RBI ਨੇ ਉਜੀਵਨ ਸਮਾਲ ਫਾਈਨੈਂਸ ਬੈਂਕ ‘ਤੇ 6.70 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਇਹ ਕਾਰਵਾਈ ‘ਕਰਜ਼ੇ ਅਤੇ ਪੇਸ਼ਗੀ – ਕਾਨੂੰਨੀ ਅਤੇ ਹੋਰ ਪਾਬੰਦੀਆਂ’ ਸੰਬੰਧੀ ਆਰਬੀਆਈ ਨਿਰਦੇਸ਼ਾਂ ਦੀ ਉਲੰਘਣਾ ਕਾਰਨ ਕੀਤੀ ਗਈ ਹੈ।
NBFC ਨੂੰ ਵੀ ਲਗਾਇਆ ਜੁਰਮਾਨਾ…
ਸ਼੍ਰੀਰਾਮ ਫਾਈਨੈਂਸ ਨਾਮ ਦੀ ਇੱਕ ਗੈਰ-ਬੈਂਕਿੰਗ ਵਿੱਤੀ ਕੰਪਨੀ (NBFC) ਨੂੰ ਵੀ ਭਾਰਤੀ ਰਿਜ਼ਰਵ ਬੈਂਕ ਨੇ 5.80 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਕੰਪਨੀ ਨੇ “ਕ੍ਰੈਡਿਟ ਜਾਣਕਾਰੀ ਕੰਪਨੀਆਂ ਨੂੰ ਡੇਟਾ ਰਿਪੋਰਟਿੰਗ ਕਰਨ ਲਈ ਨਿਰਧਾਰਤ ਫਾਰਮੈਟ” ਅਤੇ (KYC) ਨਿਯਮਾਂ ਦੀ ਉਲੰਘਣਾ ਕੀਤੀ ਸੀ।
