ਕਿਵੇਂ ਇੱਕ ਟਵੀਟ ਨਾਲ ਸਿਰਫ 74 ਰੁਪਏ ਵਿੱਚ ਵੇਚਣੀ ਪਈ ਕਰੋੜਾਂ ਰੁਪਏ ਦੀ ਕੰਪਨੀ ? ਰਾਤੋ-ਰਾਤ ਬਰਬਾਦ ਹੋ ਗਿਆ ਸੀ ਇਹ ਕਾਰੋਬਾਰੀ…
ਇਹ ਇੱਕ ਭਾਰਤੀ ਉਦਯੋਗਪਤੀ ਦੀ ਕਹਾਣੀ ਹੈ ਜੋ ਰਾਤੋ-ਰਾਤ ਅਰਸ਼ ਤੋਂ ਫ਼ਰਸ਼ ‘ਤੇ ਆ ਗਿਆ ਅਤੇ ਉਹ ਵੀ ਸਿਰਫ਼ ਇੱਕ ਟਵੀਟ ਕਰਕੇ। ਇਸ ਟਵੀਟ ਨੇ ਕਰੋੜਾਂ ਦੀ ਕੰਪਨੀ ਨੂੰ ਬਹੁਤ ਘੱਟ ਕੀਮਤ ‘ਤੇ ਵੇਚਣ ਲਈ ਮਜਬੂਰ ਕਰ ਦਿੱਤਾ ਸੀ। ਅਸੀਂ ਗੱਲ ਕਰ ਰਹੇ ਹਾਂ ਬੀ.ਆਰ. ਸ਼ੈੱਟੀ ਬਾਰੇ ਜਿਨ੍ਹਾਂ ਦਾ ਜਨਮ ਭਾਰਤ ਦੇ ਕਰਨਾਟਕ ਰਾਜ ਦੇ ਉਡੂਪੀ ਜ਼ਿਲ੍ਹੇ ਵਿੱਚ ਹੋਇਆ ਸੀ।
ਬੀਆਰ ਸ਼ੈੱਟੀ ਸਿਰਫ਼ 665 ਰੁਪਏ ਨਾਲ ਬਿਹਤਰ ਮੌਕਿਆਂ ਦੀ ਭਾਲ ਵਿੱਚ ਗਲਫ਼ ਦੇਸ਼ ਪਹੁੰਚ ਗਏ ਸੀ। ਜੋ ਉਸਦੇ ਸੰਘਰਸ਼ ਦੀ ਕਹਾਣੀ ਦੱਸਦਾ ਹੈ।ਗਲਫ ਦੇਸ਼ ਵਿੱਚ ਪਹਿਲਾਂ ਉਨ੍ਹਾਂ ਨੇ ਫਾਰਮਾਸਿਸਟ ਵਜੋਂ ਕੰਮ ਕੀਤਾ। ਇਸ ਤੋਂ ਬਾਅਦ, ਬੀਆਰ ਸ਼ੈੱਟੀ ਨੇ NMC Health ਦੀ ਸਥਾਪਨਾ ਕੀਤੀ ਸੀ, ਜੋ UAE ਵਿੱਚ ਸਭ ਤੋਂ ਵੱਡੀ ਨਿੱਜੀ ਸਿਹਤ ਸੇਵਾ ਪ੍ਰਦਾਤਾ ਕੰਪਨੀ ਬਣ ਗਈ।
ਉਨ੍ਹਾਂ ਦੀ ਕੰਪਨੀ ਨੇ ਕਈ ਦੇਸ਼ਾਂ ਵਿੱਚ ਆਪਣੀਆਂ ਸੇਵਾਵਾਂ ਸ਼ੁਰੂ ਕੀਤੀਆਂ ਅਤੇ ਹਰ ਰੋਜ਼ ਨਵੀਆਂ ਉਚਾਈਆਂ ਨੂੰ ਛੂਹਦੀ ਰਹੀ। ਤੁਸੀਂ ਬੀਆਰ ਸ਼ੈੱਟੀ ਦੀ ਸਫਲਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾ ਸਕਦੇ ਹੋ ਕਿ ਉਨ੍ਹਾਂ ਕੋਲ ਦੁਬਈ ਦੇ ਮਸ਼ਹੂਰ ਬੁਰਜ ਖਲੀਫਾ ਦੀਆਂ ਦੋ ਪੂਰੀਆਂ ਮੰਜ਼ਿਲਾਂ ਸਨ। ਜਿਸਦੀ ਕੀਮਤ ਲਗਭਗ 207 ਕਰੋੜ ਰੁਪਏ ਸੀ।
ਉਸ ਕੋਲ ਦੁਬਈ ਵਰਲਡ ਟ੍ਰੇਡ ਸੈਂਟਰ ਅਤੇ ਪਾਮ ਜੁਮੇਰਾਹ ਵਿੱਚ ਵੀ ਜਾਇਦਾਦਾਂ ਸਨ। ਉਨ੍ਹਾਂ ਦੀ ਕਾਰਾਂ ਕੁਲੈਕਸ਼ਨ ਵਿੱਚ Rolls Royce ਅਤੇ Maybach ਵਰਗੀਆਂ ਮਹਿੰਗੀਆਂ ਕਾਰਾਂ ਸ਼ਾਮਲ ਸਨ। ਉਨ੍ਹਾਂ ਨੇ ਇੱਕ ਪ੍ਰਾਈਵੇਟ ਜੈੱਟ ਵਿੱਚ 50% ਹਿੱਸਾ ਵੀ ਖਰੀਦਿਆ ਸੀ, ਜਿਸਦੀ ਕੀਮਤ ਲਗਭਗ 34 ਕਰੋੜ ਰੁਪਏ ਸੀ।
ਹਾਲਾਂਕਿ, 2019 ਵਿੱਚ ਸ਼ੈੱਟੀ ਦਾ ਸਾਮਰਾਜ ਦਾ ਪਤਨ ਸ਼ੁਰੂ ਹੋ ਗਿਆ। ਦਰਅਸਲ, ਯੂਕੇ-ਸਥਿਤ ਇਨਵੈਸਟਮੈਂਟ ਰਿਸਰਚ ਫਰਮ ‘Muddy Waters”, (ਜਿਸ ਦੀ ਅਗਵਾਈ ਕਾਰਸਨ ਬਲਾਕ ਕਰਦੇ ਸਨ) ਨੇ ਇੱਕ ਟਵੀਟ ਰਾਹੀਂ ਸ਼ੈੱਟੀ ‘ਤੇ ਆਪਣੇ ਕੈਸ਼ ਫਲੋਅ ਨੂੰ ਵਧਾ-ਚੜ੍ਹਾ ਕੇ ਦਿਖਾਉਣ ਅਤੇ ਕਰਜ਼ੇ ਨੂੰ ਘੱਟ ਅੰਕਣ ਦਾ ਦੋਸ਼ ਲਗਾਇਆ।
ਇਸ ਟਵੀਟ ਤੋਂ ਬਾਅਦ, ਸ਼ੈੱਟੀ ਦੀ ਕੰਪਨੀ ਦੇ ਸ਼ੇਅਰ ਬਹੁਤ ਡਿੱਗ ਗਏ। ਕੰਪਨੀ ‘ਤੇ ਵੱਡੇ ਪੱਧਰ ‘ਤੇ ਧੋਖਾਧੜੀ ਦੇ ਦੋਸ਼ ਵੀ ਲੱਗੇ। ਜਾਂਚ ਦੌਰਾਨ, ਪਤਾ ਲੱਗਾ ਕਿ ਕੰਪਨੀ ‘ਤੇ 4 ਬਿਲੀਅਨ ਡਾਲਰ (ਲਗਭਗ 29,500 ਕਰੋੜ ਰੁਪਏ) ਦਾ ਕਰਜ਼ਾ ਸੀ, ਜਿਸ ਨੂੰ ਸਹੀ ਤਰੀਕੇ ਨਾਲ ਦਰਜ ਨਹੀਂ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ, ਸ਼ੈੱਟੀ ਨੂੰ ਆਪਣੀ 12,478 ਕਰੋੜ ਰੁਪਏ ਦੀ ਕੰਪਨੀ ਸਿਰਫ਼ 74 ਰੁਪਏ ਵਿੱਚ ਇੱਕ ਇਜ਼ਰਾਈਲੀ-ਯੂਏਈ ਕੰਸੋਰਟੀਅਮ ਨੂੰ ਵੇਚਣੀ ਪਈ ਸੀ। ਹਾਲਾਂਕਿ, ਬੀਆਰ ਸ਼ੈੱਟੀ ਨੇ ਧੋਖਾਧੜੀ ਦੇ ਦੋਸ਼ਾਂ ਨੂੰ ਰੱਦ ਕਰਦੇ ਹੋਏ ਕਾਨੂੰਨੀ ਕਾਰਵਾਈ ਸ਼ੁਰੂ ਕੀਤੀ । ਉਨ੍ਹਾਂ ਨੇ ਇਸਨੂੰ ਇੱਕ ਸਾਜ਼ਿਸ਼ ਕਰਾਰ ਦਿੱਤਾ ਸੀ।
