Saif Ali Khan ਦੇ ਮਾਮਲੇ ਵਿਚ ਆਇਆ ਨਵਾਂ ਮੋੜ, ਫੋਰੈਂਸਿਕ ਮਾਹਿਰ ਨੇ ਕੀਤਾ ਹੈਰਾਨ ਕਰਨ ਵਾਲਾ ਦਾਅਵਾ
ਬਾਲੀਵੁੱਡ ਸਟਾਰ ਸੈਫ ਅਲੀ ਖਾਨ ‘ਤੇ ਹੋਏ ਹਮਲੇ ਦੇ ਮਾਮਲੇ ਵਿੱਚ ਹਰ ਰੋਜ਼ ਨਵੇਂ ਖੁਲਾਸੇ ਹੋ ਰਹੇ ਹਨ। ਹਾਲ ਹੀ ਵਿੱਚ, ਮੁੰਬਈ ਪੁਲਿਸ ਨੇ ਦੋਸ਼ੀ ਮੁਹੰਮਦ ਸ਼ਰੀਫੁਲ ਇਸਲਾਮ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਉਸ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਉਸਨੇ ਆਪਣਾ ਜੁਰਮ ਵੀ ਕਬੂਲ ਕਰ ਲਿਆ ਹੈ। ਇਸ ਦੌਰਾਨ, ਫੋਰੈਂਸਿਕ ਮਾਹਿਰ ਪ੍ਰੋਫੈਸਰ ਦਿਨੇਸ਼ ਰਾਓ ਨੇ ਸੈਫ ਅਲੀ ਖਾਨ ‘ਤੇ ਹੋਏ ਹਮਲੇ ਸਬੰਧੀ ਇੱਕ ਹੈਰਾਨ ਕਰਨ ਵਾਲਾ ਦਾਅਵਾ ਕੀਤਾ ਹੈ, ਜਿਸ ਕਾਰਨ ਮਾਮਲੇ ਦੀ ਪੂਰੀ ਤਸਵੀਰ ਬਦਲਦੀ ਜਾਪ ਰਹੀ ਹੈ।
ਫ੍ਰੀ ਪ੍ਰੈਸ ਜਰਨਲ ਵਿੱਚ ਪ੍ਰਕਾਸ਼ਿਤ ਰਿਪੋਰਟ ਦੇ ਅਨੁਸਾਰ, ਫੋਰੈਂਸਿਕ ਮਾਹਰ ਪ੍ਰੋਫੈਸਰ ਦਿਨੇਸ਼ ਰਾਓ ਨੇ ਹਮਲੇ ਤੋਂ ਬਾਅਦ ਸੈਫ ਅਲੀ ਖਾਨ ਦੇ ਸਰੀਰ ‘ਤੇ ਸੱਟਾਂ ਬਾਰੇ ਗੱਲ ਕੀਤੀ। ਉਨ੍ਹਾਂ ਨੇ ਇੱਕ ਨਿਊਜ਼ ਚੈਨਲ ਨੂੰ ਦੱਸਿਆ ਕਿ ਲੀਲਾਵਤੀ ਹਸਪਤਾਲ ਦੀ ਮੈਡੀਕਲ-ਲੀਗਲ ਰਿਪੋਰਟ (ਐਮਐਲਸੀ) ਵਿੱਚ ਦੱਸੀਆਂ ਗਈਆਂ ਸੱਟਾਂ ਉਸ ਤਰ੍ਹਾਂ ਦੀਆਂ ਨਹੀਂ ਸਨ ਜੋ ਚਾਕੂ ਨਾਲ ਹੋਣਗੀਆਂ। ਉਨ੍ਹਾਂ ਨੇ ਇਹ ਵੀ ਦਾਅਵਾ ਕੀਤਾ ਕਿ ਡਾ. ਭਾਰਗਵੀ ਪਾਟਿਲ ਦੁਆਰਾ ਦਸਤਖਤ ਕੀਤੀ ਗਈ ਰਿਪੋਰਟ ਵਿੱਚ ਦੱਸੀਆਂ ਗਈਆਂ ਸੱਟਾਂ ਇੱਕ ਬਿਨਾ ਧਾਰ ਵਾਲੇ ਭਾਵ ਤੇਜ਼ਧਾਰ ਹਥਿਆਰ ਨਾਲ ਹੀ ਲੱਗੀਆਂ ਹੋ ਸਕਦੀਆਂ ਹਨ।
ਸੈਫ ਅਲੀ ਖਾਨ ਮਾਮਲੇ ਵਿੱਚ ਨਵਾਂ ਮੋੜ
ਸੈਫ ਅਲੀ ਖਾਨ ਦੇ ਪੈਂਟਹਾਊਸ ਵਿੱਚ ਰਹਿਣ ਵਾਲੀ ਸਟਾਫ ਨਰਸ ਨੇ ਆਪਣੇ ਬਿਆਨ ਵਿੱਚ ਕਿਹਾ ਹੈ ਕਿ ਹਮਲਾਵਰ ਆਪਣੇ ਨਾਲ ਇੱਕ ਸੋਟੀ ਵਰਗੀ ਵਸਤੂ ਅਤੇ ਇੱਕ ਪਤਲੀ ਧਾਤ ਕੱਟਣ ਵਾਲੀ ਆਰੀ ਲੈ ਕੇ ਆਇਆ ਸੀ। ਇਸ ਦੇ ਨਾਲ ਹੀ, ਲੀਲਾਵਤੀ ਹਸਪਤਾਲ ਦੇ ਡਾਕਟਰਾਂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਸੈਫ ਅਲੀ ਖਾਨ ਦੀ ਰੀੜ੍ਹ ਦੀ ਹੱਡੀ ਦੇ ਨੇੜੇ ਤੋਂ 2.5 ਇੰਚ ਦਾ ਚਾਕੂ ਦਾ ਟੁਕੜਾ ਕੱਢਿਆ ਹੈ, ਜਿਸ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਵੀ ਵਾਇਰਲ ਹੋਈਆਂ ਸਨ। ਹਾਲਾਂਕਿ, ਪ੍ਰੋਫੈਸਰ ਦਿਨੇਸ਼ ਰਾਓ ਦੇ ਇਸ ਦਾਅਵੇ ‘ਤੇ ਹਸਪਤਾਲ ਵੱਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਆਈ ਹੈ।
ਮੁਹੰਮਦ ਸ਼ਰੀਫੁਲ ਨੇ ਕੀਤਾ ਹੈਰਾਨ ਕਰਨ ਵਾਲਾ ਖੁਲਾਸਾ
ਮੁੰਬਈ ਪੁਲਸ ਸੈਫ ਅਲੀ ਖਾਨ ‘ਤੇ ਹਮਲੇ ਦੀ ਜਾਂਚ ਕਰ ਰਹੀ ਹੈ। ਇਸ ਦੌਰਾਨ, ਦੋਸ਼ੀ ਮੁਹੰਮਦ ਸ਼ਰੀਫੁਲ ਇਸਲਾਮ ਨੇ ਇੱਕ ਹੋਰ ਕਬੂਲਨਾਮਾ ਕੀਤਾ ਹੈ ਜਿਸ ਵਿੱਚ ਉਸ ਨੇ ਦੱਸਿਆ ਕਿ ਉਸ ਨੇ ਸ਼ਾਹਰੁਖ ਖਾਨ ਦੇ ਘਰੋਂ ਵੀ ਚੋਰੀ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ, ਹਾਲਾਂਕਿ, ਉਹ ਉੱਥੇ ਅਸਫਲ ਰਿਹਾ। ਇਸ ਕਾਰਨ ਉਸਨੇ ਦੂਜੇ ਘਰ ਵਿੱਚ ਚੋਰੀ ਕਰਨ ਦੀ ਯੋਜਨਾ ਬਣਾਈ। ਦੋਸ਼ੀ ਨੇ ਕਿਹਾ ਕਿ ਉਸਨੂੰ ਪੈਸਿਆਂ ਦੀ ਲੋੜ ਹੈ। ਉਸਨੂੰ ਕੁਝ ਦਸਤਾਵੇਜ਼ ਬਣਾਉਣੇ ਸੀ।
ਚੋਰੀ ਦੀ ਯੋਜਨਾ ਕਿਉਂ ਬਣਾਈ?
ਪੁੱਛਗਿੱਛ ਦੌਰਾਨ, ਦੋਸ਼ੀ ਨੇ ਦੱਸਿਆ ਕਿ ਕਿਸੇ ਨੇ ਉਸਨੂੰ ਭਾਰਤੀ ਦਸਤਾਵੇਜ਼ ਬਣਾਉਣ ਦਾ ਵਾਅਦਾ ਕੀਤਾ ਸੀ ਅਤੇ ਬਦਲੇ ਵਿੱਚ ਪੈਸੇ ਮੰਗੇ ਸਨ। ਦੋਸ਼ੀ ਨੇ ਪੁਲਸ ਨੂੰ ਦੱਸਿਆ ਕਿ ਉਸਨੂੰ ਆਧਾਰ ਕਾਰਡ ਅਤੇ ਹੋਰ ਦਸਤਾਵੇਜ਼ ਬਣਾਉਣ ਲਈ ਪੈਸਿਆਂ ਦੀ ਲੋੜ ਸੀ, ਜਿਸ ਲਈ ਉਸਨੇ ਚੋਰੀ ਦੀ ਯੋਜਨਾ ਬਣਾਈ ਸੀ। ਪੁਲਸ ਨੇ ਕਿਹਾ ਕਿ ਉਸ ਵਿਅਕਤੀ ਦੀ ਭਾਲ ਕੀਤੀ ਜਾ ਰਹੀ ਹੈ ਜਿਸਨੇ ਉਸ ਲਈ ਦਸਤਾਵੇਜ਼ ਤਿਆਰ ਕਰਨ ਦਾ ਵਾਅਦਾ ਕੀਤਾ ਸੀ।
