ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ (Donald Trump) ਦੇ ਮਾਰ-ਏ-ਲਾਗੋ ਰਿਜ਼ੋਰਟ ਦੇ ਹਵਾਈ ਖੇਤਰ (mar-a-lago airspace breach) ਦੀ ਉਲੰਘਣਾ ਹੋਈ ਹੈ। ਤਿੰਨ ਜਹਾਜ਼ਾਂ ਨੇ ਹਵਾਈ ਖੇਤਰ ਦੀ ਉਲੰਘਣਾ ਕੀਤੀ, ਜਿਸ ਨੂੰ ਰੋਕਣ ਲਈ ਐੱਫ-16 ਲੜਾਕੂ ਜਹਾਜ਼ਾਂ ਨੂੰ ਤਾਇਨਾਤ ਕੀਤਾ ਗਿਆ। ਇਹ ਘਟਨਾ ਫਲੋਰੀਡਾ ਦੇ ਪਾਮ ਬੀਚ ਦੀ ਹੈ, ਜਿੱਥੇ ਟਰੰਪ ਦਾ ਮਸ਼ਹੂਰ ਰਿਜ਼ੋਰਟ ਸਥਿਤ ਹੈ। ਉੱਤਰੀ ਅਮਰੀਕੀ ਏਰੋਸਪੇਸ ਡਿਫੈਂਸ ਕਮਾਂਡ (NORAD) ਨੇ ਤਿੰਨੇ ਜਹਾਜ਼ਾਂ ਨੂੰ ਮੋੜਨ ਲਈ F-16 ਲੜਾਕੂ ਜਹਾਜ਼ ਭੇਜੇ। ਰਿਪੋਰਟਾਂ ਮੁਤਾਬਕ ਇਨ੍ਹਾਂ ਜਹਾਜ਼ਾਂ ਨੂੰ ਰੋਕਦੇ ਹੋਏ ਐੱਫ-16 ਨੂੰ ਫਲੇਅਰਜ਼ (ਚਮਕਦਾਰ ਰੌਸ਼ਨੀ) ਵੀ ਛੱਡਣੀ ਪਈ। ਤਿੰਨੋਂ ਜਹਾਜ਼ਾਂ ਨੂੰ ਬਾਅਦ ਵਿੱਚ ਪਾਮ ਬੀਚ ਹਵਾਈ ਖੇਤਰ ਤੋਂ ਸੁਰੱਖਿਅਤ ਬਾਹਰ ਕੱਢ ਦਿੱਤਾ ਗਿਆ।
ਇਹ ਘਟਨਾ ਸਥਾਨਕ ਸਮੇਂ ਮੁਤਾਬਕ ਸਵੇਰੇ 11:05, 12:10 ਅਤੇ 12:50 ਵਜੇ ਵਾਪਰੀ। ਹਾਲਾਂਕਿ ਇਹ ਸਪੱਸ਼ਟ ਨਹੀਂ ਹੈ ਕਿ ਇਹ ਜਹਾਜ਼ ਕਿਸ ਹਾਲਾਤ ‘ਚ ਪਾਮ ਬੀਚ ਦੇ ਹਵਾਈ ਖੇਤਰ ‘ਚ ਦਾਖਲ ਹੋਏ, ਪਰ ਪਿਛਲੇ ਕੁਝ ਹਫਤਿਆਂ ‘ਚ ਅਜਿਹੀਆਂ ਘਟਨਾਵਾਂ ਵਾਰ-ਵਾਰ ਵਾਪਰੀਆਂ ਹਨ। ਪਾਮ ਬੀਚ ਪੋਸਟ ਨੇ 20 ਫਰਵਰੀ ਨੂੰ ਰਿਪੋਰਟ ਦਿੱਤੀ ਸੀ ਕਿ ਪਿਛਲੇ ਮਹੀਨੇ ਟਰੰਪ ਦੇ ਮਾਰ-ਏ-ਲਾਗੋ ਵਿੱਚ ਛੇ ਦਿਨਾਂ ਵਿੱਚ ਤਿੰਨ ਵਾਰ ਹਵਾਈ ਖੇਤਰ ਦੀ ਉਲੰਘਣਾ ਕੀਤੀ ਗਈ ਸੀ। ਅਜਿਹੀ ਘਟਨਾ ਦੋ ਵਾਰ 15 ਫਰਵਰੀ ਅਤੇ ਇੱਕ ਵਾਰ 17 ਫਰਵਰੀ ਨੂੰ ਵਾਪਰੀ। ਇਸ ਤੋਂ ਇਲਾਵਾ 18 ਫਰਵਰੀ ਨੂੰ ਸਵੇਰੇ 10:49 ਵਜੇ ਇਕ ਹੋਰ ਨਾਗਰਿਕ ਜਹਾਜ਼ ਪਾਮ ਬੀਚ ‘ਤੇ ਉਡਾਣ ਭਰਦਾ ਪਾਇਆ ਗਿਆ, ਜਿਸ ਨੂੰ ਰੋਕਣ ਲਈ ਐੱਫ-16 ਤਾਇਨਾਤ ਕੀਤੇ ਗਏ ਸਨ।
NORAD ਦਾ ਕਹਿਣਾ ਹੈ ਕਿ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਫਲੇਅਰਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਹ ਫਲੇਅਰਾਂ ਜਲਦੀ ਅਤੇ ਪੂਰੀ ਤਰ੍ਹਾਂ ਸੜ ਜਾਂਦੀਆਂ ਹਨ ਅਤੇ ਜ਼ਮੀਨ ‘ਤੇ ਮੌਜੂਦ ਲੋਕਾਂ ਲਈ ਕੋਈ ਖਤਰਾ ਨਹੀਂ ਬਣਾਉਂਦੀਆਂ। ਇਕ ਵਿਅਕਤੀ ਨੇ ਉਸ ਦਿਨ ਤਾਇਨਾਤ ਐੱਫ-16 ਜਹਾਜ਼ ਦੀ ਵੀਡੀਓ ਰਿਕਾਰਡ ਕੀਤੀ। ਵੀਡੀਓ ਬੌਇਨਟਨ ਬੀਚ ਉੱਤੇ ਲਿਆ ਗਿਆ ਸੀ, ਜੋ ਪਾਮ ਬੀਚ ਦੇ ਦੱਖਣ ਵਿੱਚ ਹੈ।
ਜਦੋਂ ਵੀ ਟਰੰਪ ਮਾਰ-ਏ-ਲਾਗੋ ਦਾ ਦੌਰਾ ਕਰਦੇ ਹਨ, ਉੱਥੇ ਅਸਥਾਈ ਫਲਾਈਟ ਪਾਬੰਦੀਆਂ (TFRs) ਲਗਾਈਆਂ ਜਾਂਦੀਆਂ ਹਨ। ਇਨ੍ਹਾਂ ਪਾਬੰਦੀਆਂ ਕਾਰਨ ਹਵਾਈ ਜਹਾਜ਼ ਅਤੇ ਡਰੋਨ ਬਿਨਾਂ ਇਜਾਜ਼ਤ ਦੇ ਹਵਾਈ ਖੇਤਰ ਵਿੱਚ ਦਾਖਲ ਨਹੀਂ ਹੋ ਸਕਦੇ ਹਨ। TFR ਦਾ ਅੰਦਰੂਨੀ ਜ਼ੋਨ 10 ਸਮੁੰਦਰੀ ਮੀਲ ਤੱਕ ਫੈਲਿਆ ਹੋਇਆ ਹੈ ਅਤੇ ਬਾਹਰੀ ਜ਼ੋਨ 30 ਸਮੁੰਦਰੀ ਮੀਲ ਤੱਕ ਫੈਲਿਆ ਹੋਇਆ ਹੈ।
