BCCI ਨੂੰ ਕਿਉਂ ਬਦਲਣਾ ਪਿਆ IPL ਨਿਲਾਮੀ ਦਾ ਸਮਾਂ? ਹੁਣ ਖਿਡਾਰੀਆਂ ‘ਤੇ ਕਿੰਨੇ ਵਜੇ ਲੱਗੇਗੀ ਬੋਲੀ?

ਆਈਪੀਐਲ ਦੀ ਮੈਗਾ ਨਿਲਾਮੀ ਲਈ ਕਾਊਂਟਡਾਊਨ ਸ਼ੁਰੂ ਹੋ ਗਿਆ ਹੈ। ਖਿਡਾਰੀਆਂ ਦੀ ਨਿਲਾਮੀ 24-25 ਨਵੰਬਰ ਨੂੰ ਸਾਊਦੀ ਅਰਬ ਦੇ ਜੇਦਾਹ ਸ਼ਹਿਰ ਵਿੱਚ ਹੋਵੇਗੀ। ਭਾਰਤੀ ਸਮੇਂ ਮੁਤਾਬਕ ਪਹਿਲਾਂ ਖਿਡਾਰੀਆਂ ਦੀ ਨਿਲਾਮੀ ਦੁਪਹਿਰ 3 ਵਜੇ ਸ਼ੁਰੂ ਹੋਣੀ ਸੀ ਪਰ ਹੁਣ ਇਸ ਵਿੱਚ ਬਦਲਾਅ ਕੀਤਾ ਗਿਆ ਹੈ। ਬੀਸੀਸੀਆਈ ਨੂੰ ਨਿਲਾਮੀ ਦਾ ਸਮਾਂ ਬਦਲਣ ਲਈ ਮਜਬੂਰ ਹੋਣਾ ਪਿਆ ਹੈ। ਨਵੇਂ ਸਮੇਂ ਮੁਤਾਬਕ ਖਿਡਾਰੀਆਂ ਦੀ ਬੋਲੀ ਹੁਣ 3:30 ਵਜੇ ਸ਼ੁਰੂ ਹੋਵੇਗੀ। ਭਾਵ ਨਿਲਾਮੀ ਪਹਿਲਾਂ ਦਿੱਤੇ ਗਏ ਸਮੇਂ ਤੋਂ ਅੱਧੇ ਘੰਟੇ ਦੀ ਦੇਰੀ ਨਾਲ ਸ਼ੁਰੂ ਹੋਵੇਗੀ। ਇਸ ਵਾਰ 575 ਖਿਡਾਰੀ ਮੈਦਾਨ ਵਿੱਚ ਉਤਰਨਗੇ, ਜਿਨ੍ਹਾਂ ਵਿੱਚੋਂ 204 ਦੀ ਬੋਲੀ ਹੋਵੇਗੀ। ਬਾਕੀ ਬਿਨਾਂ ਵੇਚੇ ਹੀ ਰਹਿਣਗੇ।

ਆਈਪੀਐਲ 2025 ਮੈਗਾ ਨਿਲਾਮੀ ਦੇ ਪ੍ਰਸਾਰਕ ਨੇ ਬੀਸੀਸੀਆਈ ਨੂੰ ਨਿਲਾਮੀ ਦਾ ਸਮਾਂ ਬਦਲਣ ਦੀ ਬੇਨਤੀ ਕੀਤੀ ਸੀ। ਨਿਲਾਮੀ ਦੇ ਪ੍ਰਸਾਰਕਾਂ ਨੂੰ ਡਰ ਸੀ ਕਿ ਮੇਗਾ ਨਿਲਾਮੀ ਭਾਰਤ ਬਨਾਮ ਆਸਟਰੇਲੀਆ ਵਿਚਾਲੇ ਪਹਿਲੇ ਟੈਸਟ ਮੈਚ ਨਾਲ ਟਕਰਾ ਜਾਵੇਗੀ। 24 ਨਵੰਬਰ ਨੂੰ ਇਸ ਟੈਸਟ ਮੈਚ ਦਾ ਤੀਜਾ ਦਿਨ ਹੋਵੇਗਾ। ਇਹ ਟੈਸਟ ਮੈਚ ਭਾਰਤੀ ਸਮੇਂ ਅਨੁਸਾਰ ਸਵੇਰੇ 7:50 ਵਜੇ ਸ਼ੁਰੂ ਹੋਵੇਗਾ ਅਤੇ ਦਿਨ ਦਾ ਖੇਡ ਦੁਪਹਿਰ 2:30 ਵਜੇ ਸਮਾਪਤ ਹੋਵੇਗਾ। ਅਕਸਰ, ਮੌਸਮ ਜਾਂ ਖਰਾਬ ਰੋਸ਼ਨੀ ਜਾਂ ਹੌਲੀ ਓਵਰਾਂ ਵਰਗੇ ਹਾਲਾਤਾਂ ਕਾਰਨ ਮੈਚ ਦਾ ਸਮਾਂ ਵਧਾਇਆ ਜਾਂਦਾ ਹੈ।

1574 ਖਿਡਾਰੀਆਂ ਨੇ ਕਰਵਾਈ ਰਜਿਸਟ੍ਰੇਸ਼ਨ
ਆਈਪੀਐਲ ਦੀ ਮੈਗਾ ਨਿਲਾਮੀ ਲਈ 1574 ਖਿਡਾਰੀਆਂ ਨੇ ਰਜਿਸਟ੍ਰੇਸ਼ਨ ਕਰਵਾਈ ਸੀ। ਇਨ੍ਹਾਂ ਵਿੱਚੋਂ 574 ਖਿਡਾਰੀਆਂ ਨੂੰ ਸ਼ਾਰਟਲਿਸਟ ਕੀਤਾ ਗਿਆ ਸੀ। ਬਾਅਦ ਵਿੱਚ ਜੋਫਰਾ ਆਰਚਰ ਨੂੰ ਨਿਲਾਮੀ ਸੂਚੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਜੋਫਰਾ ਸਮੇਤ ਖਿਡਾਰੀਆਂ ਦੀ ਕੁੱਲ ਗਿਣਤੀ 575 ਹੋ ਜਾਂਦੀ ਹੈ। ਇਨ੍ਹਾਂ ਵਿੱਚ 366 ਭਾਰਤੀ ਅਤੇ 209 ਵਿਦੇਸ਼ੀ ਖਿਡਾਰੀ ਸ਼ਾਮਲ ਹਨ।

ਪੰਜਾਬ ਕਿੰਗਜ਼ ਕੋਲ ਸਭ ਤੋਂ ਵੱਧ 110.5 ਕਰੋੜ ਰੁਪਏ ਦਾ ਪਰਸ
ਪੰਜਾਬ ਕਿੰਗਜ਼ ਦੇ ਪਰਸ ਵਿੱਚ ਸਭ ਤੋਂ ਵੱਧ 110.5 ਕਰੋੜ ਰੁਪਏ ਬਚੇ ਹਨ। ਉਸ ਨੇ ਸਭ ਤੋਂ ਘੱਟ 9.5 ਕਰੋੜ ਰੁਪਏ ਰਿਟੇਨਸ਼ਨ ਵਿੱਚ ਖਰਚ ਕੀਤੇ। ਪ੍ਰੀਟੀ ਜ਼ਿੰਟਾ ਦੀ ਮਲਕੀਅਤ ਵਾਲੀ ਕਿੰਗਜ਼ ਇਲੈਵਨ ਪੰਜਾਬ ਦੀ ਟੀਮ ਨਿਲਾਮੀ ਵਿੱਚ ਸਭ ਤੋਂ ਉੱਚੇ ਪਰਸ ਦੇ ਨਾਲ ਮੇਜ਼ ‘ਤੇ ਬੈਠੇਗੀ। ਉਹ ਕਿਸੇ ਵੀ ਖਿਡਾਰੀ ‘ਤੇ 25-30 ਕਰੋੜ ਰੁਪਏ ਦੀ ਬੋਲੀ ਲਗਾ ਸਕਦੀ ਹੈ। ਹੋਰ ਟੀਮਾਂ ਨੂੰ ਇੰਨੀ ਵੱਡੀ ਬੋਲੀ ਲਗਾਉਣ ਤੋਂ ਪਹਿਲਾਂ ਦੋ ਵਾਰ ਸੋਚਣਾ ਹੋਵੇਗਾ।