ਇੱਕ ਸਿਗਰਟ ਪੀਣ ਨਾਲ ਤੁਹਾਡੀ ਜ਼ਿੰਦਗੀ ਦੇ 20 ਮਿੰਟ ਹੋ ਜਾਣਗੇ ਘੱਟ, ਔਰਤਾਂ ਨੂੰ ਮਰਦਾਂ ਨਾਲੋਂ ਜ਼ਿਆਦਾ ਖ਼ਤਰਾ
ਸਿਗਰਟ ਪੀਣਾ ਸਿਹਤ ਲਈ ਬਹੁਤ ਹਾਨੀਕਾਰਕ ਹੈ, ਪਰ ਫਿਰ ਵੀ ਲੋਕ ਸ਼ੌਕ ਨਾਲ ਸਿਗਰਟ ਪੀਂਦੇ ਹਨ। ਲੋਕ ਸੋਚਦੇ ਹਨ ਕਿ ਜੇਕਰ ਉਹ ਹਰ ਰੋਜ਼ ਇੱਕ ਜਾਂ ਦੋ ਸਿਗਰਟਾਂ ਪੀਂਦੇ ਹਨ ਤਾਂ ਇਸ ਨਾਲ ਸਰੀਰ ਨੂੰ ਕੋਈ ਨੁਕਸਾਨ ਨਹੀਂ ਹੋਵੇਗਾ। ਹੁਣ ਇੱਕ ਨਵੇਂ ਅਧਿਐਨ ਵਿੱਚ ਸਿਗਰੇਟ ਬਾਰੇ ਅਜਿਹੀਆਂ ਗੱਲਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਨੂੰ ਜਾਣ ਕੇ ਤੁਸੀਂ ਹੈਰਾਨ ਰਹਿ ਜਾਓਗੇ। ਇਸ ਅਧਿਐਨ ਵਿੱਚ ਵਿਗਿਆਨੀਆਂ ਨੇ ਦਾਅਵਾ ਕੀਤਾ ਹੈ ਕਿ ਹਰ ਰੋਜ਼ ਸਿਰਫ਼ ਇੱਕ ਸਿਗਰਟ ਪੀਣ ਨਾਲ ਤੁਹਾਡੀ ਜ਼ਿੰਦਗੀ ਦੇ 20 ਮਿੰਟ ਘੱਟ ਹੋ ਸਕਦੇ ਹਨ। ਧਿਆਨਯੋਗ ਹੈ ਕਿ ਸਿਗਰੇਟ ਔਰਤਾਂ ਲਈ ਜ਼ਿਆਦਾ ਖ਼ਤਰਨਾਕ ਹੈ ਅਤੇ ਉਨ੍ਹਾਂ ਦੀ ਜ਼ਿੰਦਗੀ ਨੂੰ ਛੋਟਾ ਕਰ ਸਕਦੀ ਹੈ।
’ਦਿ ਗਾਰਡੀਅਨ’ ਦੀ ਰਿਪੋਰਟ ਦੇ ਅਨੁਸਾਰ, ਇੱਕ ਤਾਜ਼ਾ ਅਧਿਐਨ ਵਿੱਚ ਸਾਹਮਣੇ ਆਇਆ ਹੈ ਕਿ ਸਿਗਰਟ ਪੀਣ ਦਾ ਜੀਵਨ ‘ਤੇ ਅਸਰ ਡਾਕਟਰਾਂ ਦੇ ਅਨੁਮਾਨ ਨਾਲੋਂ ਕਈ ਗੁਣਾ ਵੱਧ ਹੈ। ਯੂਨੀਵਰਸਿਟੀ ਕਾਲਜ ਲੰਡਨ (ਯੂਸੀਐਲ) ਦੇ ਵਿਗਿਆਨੀਆਂ ਨੇ ਦਾਅਵਾ ਕੀਤਾ ਹੈ ਕਿ ਔਸਤਨ ਇੱਕ ਸਿਗਰਟ ਪੀਣ ਨਾਲ ਵਿਅਕਤੀ ਦੀ ਉਮਰ ਲਗਭਗ 20 ਮਿੰਟ ਘੱਟ ਜਾਂਦੀ ਹੈ। ਇਸ ਦਾ ਮਤਲਬ ਹੈ ਕਿ 20 ਸਿਗਰਟਾਂ ਦਾ ਇੱਕ ਪੈਕੇਟ ਇੱਕ ਵਿਅਕਤੀ ਦੀ ਜ਼ਿੰਦਗੀ ਨੂੰ 7 ਘੰਟੇ ਤੱਕ ਘਟਾ ਸਕਦਾ ਹੈ। ਹੁਣ ਤੱਕ ਕਿਸੇ ਵੀ ਖੋਜ ਵਿੱਚ ਸਿਗਰੇਟ ਨੂੰ ਇੰਨਾ ਖ਼ਤਰਨਾਕ ਨਹੀਂ ਮੰਨਿਆ ਜਾਂਦਾ ਸੀ, ਪਰ ਇਸ ਖੋਜ ਤੋਂ ਬਾਅਦ ਵਿਗਿਆਨੀ ਖ਼ੁਦ ਵੀ ਹੈਰਾਨ ਰਹਿ ਗਏ ਹਨ।
ਅਧਿਐਨ ਮੁਤਾਬਕ ਜੇਕਰ ਕੋਈ ਵਿਅਕਤੀ ਰੋਜ਼ਾਨਾ 10 ਸਿਗਰੇਟ ਪੀਂਦਾ ਹੈ ਅਤੇ 1 ਜਨਵਰੀ ਨੂੰ ਸਿਗਰਟ ਛੱਡ ਦਿੰਦਾ ਹੈ ਤਾਂ ਉਹ 8 ਜਨਵਰੀ ਤੱਕ ਆਪਣੀ ਜ਼ਿੰਦਗੀ ਦਾ ਪੂਰਾ ਇੱਕ ਦਿਨ ਬਚਾ ਸਕਦਾ ਹੈ। ਜੇਕਰ ਉਹ 5 ਫਰਵਰੀ ਤੱਕ ਸਿਗਰਟਨੋਸ਼ੀ ਛੱਡ ਦਿੰਦਾ ਹੈ ਤਾਂ ਉਹ ਇੱਕ ਹਫ਼ਤਾ ਬਚਾ ਸਕਦਾ ਹੈ। ਯੂਸੀਐਲ ਰਿਸਰਚ ਟੀਮ ਦੀ ਮੁੱਖ ਲੇਖਕ ਡਾ: ਸਾਰਾਹ ਜੈਕਸਨ ਦਾ ਕਹਿਣਾ ਹੈ ਕਿ ਲੋਕ ਜਾਣਦੇ ਹਨ ਕਿ ਸਿਗਰਟਨੋਸ਼ੀ ਖ਼ਤਰਨਾਕ ਹੈ, ਪਰ ਉਨ੍ਹਾਂ ਨੂੰ ਇਹ ਨਹੀਂ ਪਤਾ ਕਿ ਇਸ ਨਾਲ ਕਿੰਨਾ ਨੁਕਸਾਨ ਹੁੰਦਾ ਹੈ। ਜੋ ਲੋਕ ਸਾਰੀ ਉਮਰ ਸਿਗਰਟ ਜਾਂ ਬੀੜੀ ਪੀਂਦੇ ਹਨ, ਉਹ ਆਪਣੀ ਜ਼ਿੰਦਗੀ ਦੇ ਲਗਭਗ 10 ਸਾਲ ਗੁਆ ਦਿੰਦੇ ਹਨ। ਇਹ 10 ਸਾਲ ਸਿਗਰਟ ਛੱਡ ਕੇ ਬਚਾਏ ਜਾ ਸਕਦੇ ਹਨ।
ਔਰਤਾਂ ‘ਚ ਦਿਸਦੇ ਇਹ ਲੱਛਣ ਦਿੰਦੇ ਹਨ ਘੱਟ ਕੈਲਸ਼ੀਅਮ ਦੇ ਸੰਕੇਤ!
ਇਹ ਅਧਿਐਨ ਦਰਸਾਉਂਦਾ ਹੈ ਕਿ ਸਿਗਰਟਨੋਸ਼ੀ ਨਾ ਸਿਰਫ਼ ਕੈਂਸਰ ਅਤੇ ਹੋਰ ਗੰਭੀਰ ਬਿਮਾਰੀਆਂ ਦਾ ਕਾਰਨ ਬਣਦੀ ਹੈ, ਸਗੋਂ ਇਹ ਲੋਕਾਂ ਦੀਆਂ ਜ਼ਿੰਦਗੀਆਂ ਵਿੱਚੋਂ ਕੀਮਤੀ ਸਮਾਂ ਵੀ ਖੋਹ ਲੈਂਦੀ ਹੈ। ਹਰ ਸਾਲ ਦੁਨੀਆ ਭਰ ਵਿੱਚ ਲੱਖਾਂ ਲੋਕ ਸਿਗਰਟਨੋਸ਼ੀ ਕਾਰਨ ਮਰਦੇ ਹਨ। ਖੋਜਕਰਤਾਵਾਂ ਨੇ ਇਹ ਵੀ ਕਿਹਾ ਹੈ ਕਿ ਸਿਗਰਟਨੋਸ਼ੀ ਛੱਡਣਾ ਤਾਂ ਹੀ ਲਾਭਦਾਇਕ ਹੋਵੇਗਾ ਜੇਕਰ ਵਿਅਕਤੀ ਸਿਗਰਟਨੋਸ਼ੀ ਨੂੰ ਪੂਰੀ ਤਰ੍ਹਾਂ ਛੱਡੇ। ਇੱਕ ਸਿਗਰਟ ਪੀਣਾ ਵੀ ਜੀਵਨ ਲਈ ਖ਼ਤਰਾ ਹੈ। ਰਿਸਰਚ ਨੇ ਦਿਖਾਇਆ ਹੈ ਕਿ ਸਿਗਰਟਨੋਸ਼ੀ ਛੱਡਣ ਦੇ ਫਾਇਦੇ ਜਲਦੀ ਮਿਲਦੇ ਹਨ ਅਤੇ ਜਿੰਨੀ ਜਲਦੀ ਕੋਈ ਵਿਅਕਤੀ ਸਿਗਰਟ ਛੱਡਦਾ ਹੈ, ਉਨ੍ਹਾਂ ਦੀ ਉਮਰ ਓਨੀ ਹੀ ਲੰਬੀ ਅਤੇ ਸਿਹਤਮੰਦ ਹੁੰਦੀ ਹੈ।
ਇਸ ਤੋਂ ਪਹਿਲਾਂ ਸਾਲ 2000 ਵਿੱਚ ’ਬੀਐਮਜੇ’ ਵਿੱਚ ਪ੍ਰਕਾਸ਼ਿਤ ਇੱਕ ਵਿਸ਼ਲੇਸ਼ਣ ਵਿੱਚ ਦਿਖਾਇਆ ਗਿਆ ਸੀ ਕਿ ਇੱਕ ਔਸਤ ਸਿਗਰਟ ਪੀਣ ਨਾਲ ਜੀਵਨ ਦੀ ਸੰਭਾਵਨਾ ਲਗਭਗ 11 ਮਿੰਟ ਘੱਟ ਜਾਂਦੀ ਹੈ, ਜਦੋਂ ਕਿ ਹਾਲ ਹੀ ਵਿੱਚ ‘ਜਰਨਲ ਆਫ਼ ਐਡਿਕਸ਼ਨ’ ਵਿੱਚ ਪ੍ਰਕਾਸ਼ਿਤ ਇੱਕ ਨਵੇਂ ਵਿਸ਼ਲੇਸ਼ਣ ਨੇ ਇਸ ਅੰਕੜੇ ਦੀ ਪੁਸ਼ਟੀ ਕੀਤੀ ਹੈ, ਜੋ ਕਿ ਹੁਣ 20 ਮਿੰਟ ਹੈ। ਚਿੰਤਾ ਦੀ ਗੱਲ ਇਹ ਹੈ ਕਿ ਇੱਕ ਸਿਗਰਟ ਪੀਣ ਨਾਲ ਮਰਦਾਂ ਦੀ ਉਮਰ ਲਗਭਗ 17 ਮਿੰਟ ਅਤੇ ਔਰਤਾਂ ਦੀ ਉਮਰ 22 ਮਿੰਟ ਤੱਕ ਘੱਟ ਜਾਂਦੀ ਹੈ। ਇਸ ਤੋਂ ਇਹ ਕਿਹਾ ਜਾ ਸਕਦਾ ਹੈ ਕਿ ਔਰਤਾਂ ਲਈ ਸਿਗਰੇਟ ਦਾ ਸੇਵਨ ਜ਼ਿਆਦਾ ਨੁਕਸਾਨਦਾਇਕ ਹੋ ਸਕਦਾ ਹੈ।
