ਨਵੀਂ ਦਿੱਲੀ- ਅੱਜ ਦੇ ਡਿਜੀਟਲ ਯੁੱਗ ਵਿੱਚ, ਕ੍ਰੈਡਿਟ ਕਾਰਡਾਂ ‘ਤੇ ਸਾਡੀ ਨਿਰਭਰਤਾ ਬਹੁਤ ਜ਼ਿਆਦਾ ਹੈ। ਜੇਕਰ ਤੁਸੀਂ ਕ੍ਰੈਡਿਟ ਕਾਰਡ ਨਾਲ ਆਪਣੀ ਇੱਛਾ ਮੁਤਾਬਕ ਖਰੀਦਦਾਰੀ ਕਰਦੇ ਹੋ ਤਾਂ ਵੀ ਇਹ ਤੁਹਾਨੂੰ ਧੋਖਾਧੜੀ ਦਾ ਸ਼ਿਕਾਰ ਬਣਾ ਸਕਦਾ ਹੈ। ਨੋਇਡਾ ਪੁਲਿਸ ਨੇ ਕ੍ਰੈਡਿਟ ਕਾਰਡ ਧਾਰਕਾਂ ਨਾਲ ਧੋਖਾਧੜੀ ਕਰਨ ਵਾਲੇ 6 ਸਕੈਮਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਘਪਲੇਬਾਜ਼ਾਂ ਦਾ ਇਹ ਗਿਰੋਹ ਬੈਂਕਾਂ ਦਾ ਜਾਅਲਸਾਜ਼ ਬਣਾ ਰਿਹਾ ਸੀ ਅਤੇ ਕ੍ਰੈਡਿਟ ਕਾਰਡ ਦੀ ਸੀਮਾ ਵਧਾਉਣ ਦਾ ਵਾਅਦਾ ਕਰਕੇ ਲੋਕਾਂ ਨੂੰ ਠੱਗ ਰਿਹਾ ਸੀ। ਸਕੈਮਰਸ ਬਹੁਤ ਹੀ ਚਲਾਕੀ ਨਾਲ ਕ੍ਰੈਡਿਟ ਕਾਰਡ ਧਾਰਕਾਂ ਦੀ ਸੰਵੇਦਨਸ਼ੀਲ ਜਾਣਕਾਰੀ ਹਾਸਲ ਕਰਦੇ ਹਨ ਅਤੇ ਉਨ੍ਹਾਂ ਤੋਂ ਲੱਖਾਂ ਰੁਪਏ ਦੀ ਲੁੱਟ ਕਰਦੇ ਹਨ। ਜੇਕਰ ਤੁਸੀਂ ਵੀ ਕ੍ਰੈਡਿਟ ਕਾਰਡ ਯੂਜ਼ਰ ਹੋ, ਤਾਂ ਤੁਹਾਡੇ ਲਈ ਇਹ ਜਾਣਨਾ ਜ਼ਰੂਰੀ ਹੈ ਕਿ ਧੋਖੇਬਾਜ਼ ਇਹ ਸਭ ਕਿਵੇਂ ਕਰਦੇ ਹਨ?
ਇਹ ਗਿਰੋਹ ਕ੍ਰੈਡਿਟ ਕਾਰਡ ਧਾਰਕਾਂ ਨੂੰ ਬੈਂਕ ਅਧਿਕਾਰੀ ਦੱਸਦਾ ਸੀ ਅਤੇ ਆਪਣੀ ਕ੍ਰੈਡਿਟ ਲਿਮਟ ਵਧਾਉਣ ਦੀ ਪੇਸ਼ਕਸ਼ ਕਰਦਾ ਸੀ। ਆਪਣੀ ਪੇਸ਼ਕਸ਼ ਨੂੰ ਸੱਚਾ ਵਿਖਾਉਣ ਲਈ, ਉਹ ਕ੍ਰੈਡਿਟ ਕਾਰਡ ਧਾਰਕ ਦੀ ਸਾਰੀ ਜਾਣਕਾਰੀ ਪਹਿਲਾਂ ਹੀ ਇਕੱਠੀ ਕਰਦੇ ਸਨ ਅਤੇ ਕਾਰਡ ਧਾਰਕ ਨੂੰ ਅਜਿਹਾ ਮਹਿਸੂਸ ਹੁੰਦਾ ਸੀ ਜਿਵੇਂ ਕਾਲ ਅਸਲ ਵਿੱਚ ਬੈਂਕ ਤੋਂ ਆਈ ਹੋਵੇ।
ਗਾਹਕ ਨੂੰ ਫਿਸ਼ਿੰਗ ਲਿੰਕਾਂ ਦੁਆਰਾ ਫਸਾਉਂਦੇ ਹਨ
ਸਕਮੈਰਸ ਪੀੜਤਾਂ ਨੂੰ ਫਿਸ਼ਿੰਗ ਲਿੰਕ ਭੇਜਦੇ ਸਨ ਜੋ ਉਨ੍ਹਾਂ ਨੂੰ ਫਰਜ਼ੀ ਵੈੱਬਸਾਈਟਾਂ ‘ਤੇ ਲੈ ਜਾਂਦੇ ਸਨ। ਇਹ ਵੈੱਬਸਾਈਟ ਬਿਲਕੁਲ ਬੈਂਕ ਪੋਰਟਲ ਵਰਗੀ ਦਿਖਾਈ ਦਿੰਦੀ ਸੀ, ਕਿਉਂਕਿ ਇਹ ਬਿਲਕੁਲ ਉਸੇ ਤਰ੍ਹਾਂ ਤਿਆਰ ਕੀਤੀ ਗਈ ਸੀ।
ਇਸ ਤਰ੍ਹਾਂ ਕਰਦੇ ਸਨ ਠੱਗੀ
ਇਨ੍ਹਾਂ ਧੋਖਾਧੜੀ ਵਾਲੀਆਂ ਸਾਈਟਾਂ ‘ਤੇ ਜਾਣ ਤੋਂ ਬਾਅਦ, ਕਾਰਡ ਧਾਰਕ ਨੂੰ ਇੱਕ ਐਪ ਡਾਊਨਲੋਡ ਕਰਨ ਲਈ ਕਿਹਾ ਜਾਂਦਾ ਹੈ। ਐਪ ਫਿਰ ਉਹਨਾਂ ਨੂੰ ਸੰਵੇਦਨਸ਼ੀਲ ਜਾਣਕਾਰੀ ਦਰਜ ਕਰਨ ਲਈ ਕਹਿੰਦਾ ਹੈ, ਜਿਸ ਵਿੱਚ ਉਹਨਾਂ ਦੇ ਕ੍ਰੈਡਿਟ ਕਾਰਡ ਨੰਬਰ, ਈਮੇਲ ਪਤੇ, ਪੈਨ ਅਤੇ ਆਧਾਰ ਕਾਰਡ ਦੇ ਵੇਰਵੇ, ਮੌਜੂਦਾ ਕ੍ਰੈਡਿਟ ਸੀਮਾ, ਮਿਆਦ ਪੁੱਗਣ ਦੀਆਂ ਤਾਰੀਖਾਂ ਅਤੇ CVV ਨੰਬਰ ਸ਼ਾਮਲ ਹੁੰਦੇ ਹਨ।
ਮਹਿੰਗੀਆਂ ਚੀਜ਼ਾਂ ਆਨਲਾਈਨ ਖਰੀਦਣ ਲਈ ਵਰਤਿਆ ਜਾਂਦਾ ਸੀ
ਜਿਵੇਂ ਹੀ ਕ੍ਰੈਡਿਟ ਕਾਰਡ ਧਾਰਕ ਨੇ ਇਸ ਐਪ ਵਿੱਚ ਆਪਣੀ ਪੂਰੀ ਜਾਣਕਾਰੀ ਦਰਜ ਕਰਦਾ ਹੈ, ਸਕੈਮਰਸ ਨੇ ਆਨਲਾਈਨ ਖਰੀਦਦਾਰੀ ਕਰਨ ਲਈ ਉਸ ਜਾਣਕਾਰੀ ਅਤੇ ਓਟੀਪੀ ਦੀ ਵਰਤੋਂ ਕਰਦੇ ਸੀ। ਆਪਣੀ ਖਰੀਦਦਾਰੀ ਵਿੱਚ ਉਹ ਛੋਟੀਆਂ ਚੀਜ਼ਾਂ ਨਹੀਂ ਸਗੋਂ ਮਹਿੰਗੀਆਂ ਚੀਜ਼ਾਂ ਜਿਵੇਂ ਮੋਬਾਈਲ ਫੋਨ ਅਤੇ ਈ-ਕਾਮਰਸ ਸਾਈਟਾਂ ਤੋਂ ਸੋਨੇ-ਚਾਂਦੀ ਦੇ ਸਿੱਕੇ ਖਰੀਦਦੇ ਸੀ।
ਪੁਲਿਸ ਨੂੰ ਇਸ ਬਾਰੇ ਗੁਪਤ ਸੂਚਨਾ ਮਿਲੀ ਸੀ, ਜਿਸ ਤੋਂ ਬਾਅਦ ਪੁਲਿਸ ਨੇ 6 ਸਕੈਮਰਸ ਨੂੰ ਕਾਬੂ ਕੀਤਾ। ਹਾਲਾਂਕਿ ਬੈਂਕ ਦੀ ਵੈੱਬਸਾਈਟ ਅਤੇ ਐਪ ਬਣਾਉਣ ਵਾਲਾ ਮਾਸਟਰਮਾਈਂਡ ਫਿਲਹਾਲ ਪੁਲਸ ਦੀ ਪਹੁੰਚ ਤੋਂ ਬਾਹਰ ਹੈ।
