ਅਦਾਲਤ ਨੇ ਸ਼ਾਕਿਬ ਅਲ ਹਸਨ ਦੇ ਖਿਲਾਫ Arrest Warrant ਕੀਤਾ ਜਾਰੀ, ਬੈਂਕ ਨਾਲ ਧੋਖਾਧੜੀ ਕਰਨ ਦਾ ਇਲਜ਼ਾਮ
ਢਾਕਾ ਦੀ ਇੱਕ ਅਦਾਲਤ ਨੇ ਬੰਗਲਾਦੇਸ਼ ਦੇ ਮਹਾਨ ਆਲਰਾਊਂਡਰ ਅਤੇ ਸਾਬਕਾ ਕਪਤਾਨ ਸ਼ਾਕਿਬ ਅਲ ਹਸਨ ਦੇ ਖਿਲਾਫ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤਾ ਹੈ। ਇਹ ਵਾਰੰਟ 37 ਸਾਲਾ ਸ਼ਾਕਿਬ ਖ਼ਿਲਾਫ਼ ਆਈਐਫਆਈਸੀ ਬੈਂਕ ਨਾਲ ਸਬੰਧਤ ਚੈੱਕ ਬਾਊਂਸ ਮਾਮਲੇ ਵਿੱਚ ਜਾਰੀ ਕੀਤਾ ਗਿਆ ਹੈ। ਉਸ ‘ਤੇ ਧੋਖਾਧੜੀ ਦਾ ਇਲਜ਼ਾਮ ਹੈ।
ਕ੍ਰਿਕਬਜ਼ ਦੀ ਰਿਪੋਰਟ ਮੁਤਾਬਕ ਢਾਕਾ ਦੇ ਐਡੀਸ਼ਨਲ ਚੀਫ ਮੈਟਰੋਪੋਲੀਟਨ ਮੈਜਿਸਟਰੇਟ ਜ਼ਿਆਦੁਰ ਰਹਿਮਾਨ ਨੇ ਐਤਵਾਰ ਨੂੰ ਗ੍ਰਿਫਤਾਰੀ ਵਾਰੰਟ ਜਾਰੀ ਕਰਨ ਦਾ ਹੁਕਮ ਜਾਰੀ ਕੀਤਾ। ਸ਼ਾਕਿਬ ਅਗਸਤ 2024 ਤੋਂ ਵਿਦੇਸ਼ ਵਿੱਚ ਰਹਿ ਰਹੇ ਹਨ। ਉਨ੍ਹਾਂ ਦਾ ਨਾਂ ਪਿਛਲੇ ਸਾਲ 15 ਦਸੰਬਰ ਨੂੰ ਚੈੱਕ ਫਰਾਡ ਮਾਮਲੇ ‘ਚ ਆਇਆ ਸੀ। 18 ਦਸੰਬਰ ਨੂੰ ਸੁਣਵਾਈ ਤੋਂ ਬਾਅਦ ਅਦਾਲਤ ਨੇ ਉਨ੍ਹਾਂ ਨੂੰ 19 ਜਨਵਰੀ ਨੂੰ ਅਦਾਲਤ ਵਿੱਚ ਪੇਸ਼ ਹੋਣ ਦਾ ਹੁਕਮ ਦਿੱਤਾ ਸੀ।
ਬੰਗਲਾਦੇਸ਼ ਦੇ ਸਭ ਤੋਂ ਸਫਲ ਗੇਂਦਬਾਜ਼ ਸ਼ਾਕਿਬ ਦੇ ਖਿਲਾਫ ਇਹ ਮਾਮਲਾ ਬੈਂਕ ਦੇ ਵੱਲੋਂ ਆਈਐਫਆਈਸੀ ਬੈਂਕ ਦੇ ਰਿਲੇਸ਼ਨਸ਼ਿਪ ਅਫਸਰ ਸ਼ਾਹਿਬੁਰ ਰਹਿਮਾਨ ਨੇ ਦਾਇਰ ਕੀਤਾ ਸੀ। ਰਿਪੋਰਟ ਮੁਤਾਬਕ ਸ਼ਾਕਿਬ ਅਤੇ ਤਿੰਨ ਹੋਰਾਂ ‘ਤੇ ਦੋ ਵੱਖ-ਵੱਖ ਚੈੱਕਾਂ ਰਾਹੀਂ 4,14,57,000 ਰੁਪਏ (ਲਗਭਗ 41.4 ਕਰੋੜ ਰੁਪਏ) ਟਰਾਂਸਫਰ ਕਰਨ ਦੀ ਵਚਨਬੱਧਤਾ ਨੂੰ ਪੂਰਾ ਨਾ ਕਰਨ ਦਾ ਇਲਜ਼ਾਮ ਹੈ।
ਸ਼ਾਕਿਬ ਦੀ ਕੰਪਨੀ ਅਲ ਹਸਨ ਐਗਰੋ ਫਾਰਮ ਲਿਮਟਿਡ ਦੇ ਮੈਨੇਜਿੰਗ ਡਾਇਰੈਕਟਰ ਗਾਜ਼ੀ ਸ਼ਾਹਗੀਰ ਹੁਸੈਨ ਅਤੇ ਨਿਰਦੇਸ਼ਕ ਅਮਦਾਦੁਲ ਹੱਕ ਅਤੇ ਮਲਾਇਕਾ ਬੇਗਮ ਨੂੰ ਵੀ ਇਸ ਮਾਮਲੇ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਕੇਸ ਦੇ ਬਿਆਨ ਅਨੁਸਾਰ ਸ਼ਾਕਿਬ ਦੀ ਕੰਪਨੀ ਨੇ ਵੱਖ-ਵੱਖ ਸਮੇਂ ਆਈਐਫਆਈਸੀ ਬੈਂਕ ਦੀ ਬਨਾਨੀ ਸ਼ਾਖਾ ਤੋਂ ਪੈਸੇ ਉਧਾਰ ਲਏ ਸਨ। ਕਰਜ਼ੇ ਦੇ ਕੁਝ ਹਿੱਸੇ ਦੀ ਅਦਾਇਗੀ ਕਰਨ ਲਈ ਚੈੱਕ ਜਾਰੀ ਕੀਤੇ ਗਏ ਸਨ, ਪਰ ਨਾਕਾਫ਼ੀ ਫੰਡਾਂ ਕਾਰਨ ਬਾਊਂਸ ਹੋ ਗਏ।
