ਵਿਦੇਸ਼ ਤੋਂ ਆਈ ਮੰਦਭਾਗੀ ਖ਼ਬਰ, Russia-Ukraine War ਵਿੱਚ ਆਜ਼ਮਗੜ੍ਹ ਦੇ ਨੌਜਵਾਨ ਦੀ ਮੌਤ, ਪੜ੍ਹੋ ਪੂਰੀ ਜਾਣਕਾਰੀ

ਰੂਸ-ਯੂਕਰੇਨ ਜੰਗ ਵਿੱਚ ਯੂਪੀ ਦਾ ਇੱਕ ਨੌਜਵਾਨ ਵੀ ਮਾਰਿਆ ਗਿਆ ਹੈ। ਇਹ ਨੌਜਵਾਨ ਰੂਸ ਦੇ ਵੱਲੋਂ ਯੂਕਰੇਨ ਦੇ ਖਿਲਾਫ ਜੰਗ ਲੜ ਰਿਹਾ ਸੀ। ਮਿਲੀ ਜਾਣਕਾਰੀ ਦੇ ਮੁਤਾਬਕ ਆਜ਼ਮਗੜ੍ਹ ਦੇ ਰੌਨਾਪਰ ਥਾਣਾ ਖੇਤਰ ਦੇ ਬਾਂਕਾਟਾ (ਬਾਜ਼ਾਰ ਗੋਸਾਈ) ਪਿੰਡ ਦਾ ਰਹਿਣ ਵਾਲਾ ਕਨ੍ਹਈਆ ਯਾਦਵ ਰੂਸ ਅਤੇ ਯੂਕਰੇਨ ਵਿਚਾਲੇ ਚੱਲ ਰਹੀ ਜੰਗ ‘ਚ ਗੋਲੀ ਲੱਗਣ ਨਾਲ ਮਾਰਿਆ ਗਿਆ ਹੈ। ਜੰਗ ਵਿੱਚ ਮਾਰੇ ਗਏ ਨੌਜਵਾਨ ਦੀ ਲਾਸ਼ 23 ਦਸੰਬਰ ਨੂੰ ਉਸ ਦੇ ਪਿੰਡ ਲਿਆਂਦੀ ਗਈ ਸੀ।

ਫੌਜਦਾਰ ਯਾਦਵ ਦੇ ਪੁੱਤਰ ਕਨ੍ਹਈਆ (41) ਦੇ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਕਨ੍ਹਈਆ 16 ਜਨਵਰੀ 2024 ਨੂੰ ਏਜੰਟ ਰਾਹੀਂ ਰਸੋਈਏ ਦਾ ਵੀਜ਼ਾ ਲੈ ਕੇ ਰੂਸ ਗਿਆ ਸੀ। ਉਥੇ ਉਸ ਨੂੰ ਕੁਝ ਦਿਨਾਂ ਲਈ ਰਸੋਈਏ ਵਜੋਂ ਸਿਖਲਾਈ ਦਿੱਤੀ ਗਈ ਅਤੇ ਬਾਅਦ ਵਿਚ ਫੌਜੀ ਸਿਖਲਾਈ ਦੇ ਕੇ ਉਸ ਨੂੰ ਰੂਸੀ ਫੌਜ ਨਾਲ ਯੁੱਧ ਲਈ ਭੇਜਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਕਨ੍ਹਈਆ ਜੰਗ ਵਿੱਚ ਜ਼ਖ਼ਮੀ ਹੋ ਗਿਆ ਸੀ ਅਤੇ ਜੂਨ ਵਿੱਚ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ ਸੀ। ਕਨ੍ਹਈਆ ਨੇ 9 ਮਈ ਨੂੰ ਆਪਣੇ ਪਰਿਵਾਰ ਨੂੰ ਜੰਗ ‘ਚ ਜ਼ਖਮੀ ਹੋਣ ਦੀ ਜਾਣਕਾਰੀ ਦਿੱਤੀ ਸੀ। ਉਹ 25 ਮਈ ਤੱਕ ਆਪਣੇ ਪਰਿਵਾਰਕ ਮੈਂਬਰਾਂ ਦੇ ਸੰਪਰਕ ਵਿੱਚ ਸੀ ਪਰ ਉਸ ਤੋਂ ਬਾਅਦ ਸੰਪਰਕ ਟੁੱਟ ਗਿਆ।

ਭਾਰਤੀ ਦੂਤਘਰ ਦੇ ਯਤਨਾਂ ਸਦਕਾ ਲਾਸ਼ ਨੂੰ ਆਜ਼ਮਗੜ੍ਹ ਲਿਆਂਦਾ
ਮਾਸਕੋ ਸਥਿਤ ਭਾਰਤੀ ਦੂਤਾਵਾਸ ਨੇ 6 ਦਸੰਬਰ ਨੂੰ ਫੋਨ ਕਰ ਕੇ ਕਨ੍ਹਈਆ ਦੇ ਪਰਿਵਾਰ ਨੂੰ ਸੂਚਿਤ ਕੀਤਾ ਕਿ ਉਸ ਦੀ 17 ਜੂਨ ਨੂੰ ਇਲਾਜ ਦੌਰਾਨ ਮੌਤ ਹੋ ਗਈ ਸੀ ਅਤੇ ਉਸ ਦੀ ਲਾਸ਼ ਆਖਿਰਕਾਰ 23 ਦਸੰਬਰ ਨੂੰ ਉਸ ਦੇ ਜੱਦੀ ਪਿੰਡ ਲਿਆਂਦੀ ਗਈ ਸੀ। ਕਨ੍ਹਈਆ ਆਪਣੇ ਪਿੱਛੇ ਪਤਨੀ ਗੀਤਾ ਯਾਦਵ ਅਤੇ ਦੋ ਪੁੱਤਰ ਅਜੇ (23) ਅਤੇ ਵਿਜੇ (19) ਛੱਡ ਗਏ ਹਨ। ਅਜੈ ਯਾਦਵ ਨੇ ਇਲਜ਼ਾਮ ਲਾਇਆ ਕਿ ਰੂਸ ਸਰਕਾਰ ਨੇ 30 ਲੱਖ ਰੁਪਏ ਮੁਆਵਜ਼ੇ ਵਜੋਂ ਦਿੱਤੇ ਹਨ ਪਰ ਅਜੇ ਤੱਕ ਪਰਿਵਾਰ ਨੂੰ ਇਹ ਮੁਆਵਜ਼ਾ ਨਹੀਂ ਮਿਲਿਆ ਹੈ। ਕਨ੍ਹਈਆ ਦੀ ਮ੍ਰਿਤਕ ਦੇਹ ਉਨ੍ਹਾਂ ਦੇ ਪਿੰਡ ਪੁੱਜੀ ਤਾਂ ਪਿੰਡ ਅਤੇ ਇਲਾਕੇ ਦੇ ਵੱਡੀ ਗਿਣਤੀ ਲੋਕ ਉਨ੍ਹਾਂ ਦੇ ਘਰ ਪੁੱਜੇ ਅਤੇ ਉਨ੍ਹਾਂ ਨਾਲ ਦੁੱਖ ਦਾ ਪ੍ਰਗਟਾਵਾ ਕੀਤਾ।