IPL ਮੈਚ ਦੌਰਾਨ ਵਿਰਾਟ ਕੋਹਲੀ ਹੋਏ ਜ਼ਖਮੀ, ਕੈਚ ਫੜਦੇ ਸਮੇਂ ਵਿਰਾਟ ਕੋਹਲੀ ਦੀ ਉਂਗਲੀ ‘ਤੇ ਲੱਗੀ ਸੱਟ
2 ਅਪ੍ਰੈਲ ਦੀ ਰਾਤ ਨੂੰ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ ਤੇ ਗੁਜਰਾਤ ਟਾਈਟਨਸ ਵਿਚਕਾਰ ਖੇਡੇ ਜਾ ਰਹੇ ਮੈਚ ਦੌਰਾਨ ਪ੍ਰਸ਼ੰਸਕਾਂ ਵਿੱਚ ਅਚਾਨਕ ਨਿਰਾਸ਼ਾ ਦੀ ਲਹਿਰ ਦੌੜ ਗਈ ਜਦੋਂ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ (Virat Kohli) ਦੀ ਉਂਗਲੀ ‘ਤੇ ਸੱਟ ਲੱਗ ਗਈ। ਉਨ੍ਹਾਂ ਨੂੰ ਇਹ ਸੱਟ ਡੀਪ ਮਿਡ-ਵਿਕਟ ‘ਤੇ ਫੀਲਡਿੰਗ ਕਰਦੇ ਸਮੇਂ ਲੱਗੀ। ਇਹ ਘਟਨਾ 12ਵੇਂ ਓਵਰ ਵਿੱਚ ਵਾਪਰੀ, ਜਦੋਂ ਗੁਜਰਾਤ ਟਾਈਟਨਜ਼ 170 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰ ਰਹੀ ਸੀ।
ਸਾਈ ਸੁਦਰਸ਼ਨ ਨੇ ਕਰੁਣਾਲ ਪੰਡਯਾ ਦੀ ਗੇਂਦ ਨੂੰ ਜ਼ੋਰਦਾਰ ਤਰੀਕੇ ਨਾਲ ਸਵੀਪ ਕੀਤਾ। ਕੋਹਲੀ ਨੇ ਗੇਂਦ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਗੇਂਦ ਅਜੀਬ ਢੰਗ ਨਾਲ ਖਿਸਕ ਗਈ ਅਤੇ ਉਨ੍ਹਾਂ ਦੇ ਸੱਜੇ ਹੱਥ ‘ਤੇ ਲੱਗੀ ਅਤੇ ਬਾਊਂਡਰੀ ਵੱਲ ਚਲੀ ਗਈ। ਕੋਹਲੀ ਤੁਰੰਤ ਗੋਡਿਆਂ ਭਾਰ ਬੈਠ ਗਏ ਅਤੇ ਆਪਣੀ ਜ਼ਖਮੀ ਉਂਗਲੀ ਦੀ ਜਾਂਚ ਕਰਨ ਲੱਗੇ। ਜਿਵੇਂ ਹੀ ਆਰਸੀਬੀ ਮੈਡੀਕਲ ਸਟਾਫ ਮੈਦਾਨ ‘ਤੇ ਪਹੁੰਚਿਆ, ਸਟੇਡੀਅਮ ਵਿੱਚ ਕੁਝ ਸਮੇਂ ਲਈ ਸੰਨਾਟਾ ਛਾ ਗਿਆ।
ਮੈਦਾਨ ‘ਤੇ ਤੁਰੰਤ ਜਾਂਚ ਤੋਂ ਬਾਅਦ, ਕੋਹਲੀ ਨੇ ਖੇਡਣਾ ਜਾਰੀ ਰੱਖਿਆ, ਪਰ ਦਰਦ ਉਨ੍ਹਾਂ ਦੇ ਚਿਹਰੇ ‘ਤੇ ਸਾਫ਼ ਦਿਖਾਈ ਦੇ ਰਿਹਾ ਸੀ। ਉਹ ਬੇਆਰਾਮ ਲੱਗ ਰਹੇ ਸੀ ਅਤੇ ਵਾਰ-ਵਾਰ ਆਪਣੀਆਂ ਉਂਗਲਾਂ ਮੋੜ ਰਹੇ ਸਨ। ਪ੍ਰਸ਼ੰਸਕ ਉਮੀਦ ਕਰ ਰਹੇ ਹਨ ਕਿ ਇਸ ਨਾਲ ਟੂਰਨਾਮੈਂਟ ਦੇ ਬਾਕੀ ਮੈਚਾਂ ਵਿੱਚ ਉਨ੍ਹਾਂ ਦੇ ਪ੍ਰਦਰਸ਼ਨ ‘ਤੇ ਕੋਈ ਅਸਰ ਨਹੀਂ ਪਵੇਗਾ। ਮੈਚ ਦੀ ਗੱਲ ਕਰੀਏ ਤਾਂ ਪਹਿਲਾਂ ਬੱਲੇਬਾਜ਼ੀ ਲਈ ਭੇਜੇ ਜਾਣ ਤੋਂ ਬਾਅਦ, ਆਰਸੀਬੀ ਦੀ ਆਪਣੀ ਪਾਰੀ ਦੀ ਸ਼ੁਰੂਆਤ ਬਹੁਤ ਮਾੜੀ ਰਹੀ, ਕੋਹਲੀ ਖੁਦ ਛੇ ਗੇਂਦਾਂ ‘ਤੇ ਸੱਤ ਦੌੜਾਂ ਬਣਾ ਕੇ ਆਊਟ ਹੋ ਗਏ।
ਉਨ੍ਹਾਂ ਨੂੰ ਅਰਸ਼ਦ ਖਾਨ ਨੇ ਆਊਟ ਕੀਤਾ। ਮੁਹੰਮਦ ਸਿਰਾਜ (3/19) ਦੀ ਅਗਵਾਈ ਵਿੱਚ ਗੁਜਰਾਤ ਟਾਈਟਨਜ਼ ਦੇ ਗੇਂਦਬਾਜ਼ੀ ਹਮਲੇ ਨੇ 6.2 ਓਵਰਾਂ ਵਿੱਚ ਆਰਸੀਬੀ ਨੂੰ 42/4 ਤੱਕ ਘਟਾ ਦਿੱਤਾ। ਲੀਅਮ ਲਿਵਿੰਗਸਟੋਨ (40 ਗੇਂਦਾਂ ‘ਤੇ 54), ਜਿਤੇਸ਼ ਸ਼ਰਮਾ (21 ਗੇਂਦਾਂ ‘ਤੇ 33) ਅਤੇ ਟਿਮ ਡੇਵਿਡ (18 ਗੇਂਦਾਂ ‘ਤੇ 32) ਨੇ ਫਿਰ ਜ਼ਬਰਦਸਤ ਵਾਪਸੀ ਕਰਦੇ ਹੋਏ ਆਰਸੀਬੀ ਨੂੰ 169/8 ਦੇ ਮੁਕਾਬਲੇ ਵਾਲੇ ਸਕੋਰ ‘ਤੇ ਪਹੁੰਚਾਇਆ। ਜਵਾਬ ਵਿੱਚ, ਗੁਜਰਾਤ ਟਾਈਟਨਜ਼ ਨੇ 13 ਗੇਂਦਾਂ ਪਹਿਲਾਂ ਸਿਰਫ਼ ਦੋ ਵਿਕਟਾਂ ਗੁਆ ਕੇ ਟੀਚਾ ਆਸਾਨੀ ਨਾਲ ਪ੍ਰਾਪਤ ਕਰ ਲਿਆ। ਗੁਜਰਾਤ ਲਈ ਜੋਸ ਬਟਲਰ ਨੇ 39 ਗੇਂਦਾਂ ਵਿੱਚ 73 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ।
