ਹਸਪਤਾਲ ‘ਚ ਦਾਖਲ ਕੈਂਸਰ ਪੀੜਤ ਬੱਚੇ ਦੇ ਚੂਹਿਆਂ ਨੇ ਕੁਤਰ ਦਿੱਤਾ ਪੈਰ, 10 ਸਾਲਾ ਮਾਸੂਮ ਦੀ ਹੋਈ ਮੌਤ

ਜਿੱਥੇ ਡਾਕਟਰਾਂ ਨੂੰ ਰੱਬ ਦਾ ਦਰਜਾ ਦਿੱਤਾ ਜਾਂਦਾ ਹੈ, ਉੱਥੇ ਹਸਪਤਾਲ ਮਰੀਜ਼ਾਂ ਦੇ ਮੰਦਰ ਮੰਨੇ ਜਾਂਦੇ ਹਨ। ਇਸ ਅਸਥਾਨ ‘ਤੇ ਮਨੁੱਖ ਆਪਣੇ ਰੋਗਾਂ ਤੋਂ ਛੁਟਕਾਰਾ ਪਾਉਣ ਦੀ ਵੱਡੀ ਆਸ ਨਾਲ ਆਉਂਦਾ ਹੈ। ਪਰ ਕੁਝ ਹਸਪਤਾਲ ਵਾਲੇ ਇਸ ਦੀ ਮਹੱਤਤਾ ਨੂੰ ਨਹੀਂ ਸਮਝਦੇ। ਉਨ੍ਹਾਂ ਲਈ ਮਰੀਜ਼ ਅਤੇ ਉਨ੍ਹਾਂ ਦੀਆਂ ਬਿਮਾਰੀਆਂ ਸਿਰਫ਼ ਪੈਸੇ ਕਮਾਉਣ ਦਾ ਸਾਧਨ ਹਨ। ਬਹੁਤ ਸਾਰੇ ਹਸਪਤਾਲ ਅਜਿਹੇ ਹਨ ਜਿੱਥੇ ਇੱਕ ਸਿਹਤਮੰਦ ਵਿਅਕਤੀ ਵੀ ਬੀਮਾਰ ਹੋ ਸਕਦਾ ਹੈ। ਇੰਨੀ ਗੰਦਗੀ ਵੇਖੀ ਜਾਂਦੀ ਹੈ ਕਿ ਕਿਸੇ ਦੇ ਵੀ ਹੋਸ਼ ਉੱਡ ਜਾਣਗੇ।

ਜੈਪੁਰ ਵਿੱਚ ਇੱਕ ਵਾਰ ਫਿਰ ਸਰਕਾਰੀ ਤੰਤਰ ਦੀ ਘੋਰ ਲਾਪਰਵਾਹੀ ਸਾਹਮਣੇ ਆਈ ਹੈ। ਇਹ ਲਾਪਰਵਾਹੀ ਜੈਪੁਰ ਦੇ ਸਟੇਟ ਕੈਂਸਰ ਇੰਸਟੀਚਿਊਟ ਵਿੱਚ ਵਾਪਰੀ, ਜਿੱਥੇ ਇੱਕ ਚੂਹੇ ਨੇ ਕੈਂਸਰ ਤੋਂ ਪੀੜਤ ਬੱਚੇ ਦੀ ਲੱਤ ਕੁੱਤਰ ਦਿੱਤੀ। ਅੱਜ ਸਵੇਰੇ ਇਲਾਜ ਦੌਰਾਨ ਬੱਚੇ ਦੀ ਮੌਤ ਹੋ ਗਈ। ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਇਸ ਨੂੰ ਲੈ ਕੇ ਹੰਗਾਮਾ ਹੋ ਗਿਆ। ਸੰਸਥਾ ਦੇ ਜ਼ਿੰਮੇਵਾਰ ਅਧਿਕਾਰੀ ਇਸ ਤੋਂ ਟਾਲਾ ਵੱਟਦੇ ਨਜ਼ਰ ਆ ਰਹੇ ਹਨ।

ਰਾਤ ਨੂੰ ਚੂਹੇ ਨੇ ਕੁਤਰਿਆ
ਘਟਨਾ 11 ਦਸੰਬਰ ਦੀ ਰਾਤ ਦੀ ਦੱਸੀ ਜਾ ਰਹੀ ਹੈ। ਦਸ ਸਾਲ ਦੇ ਬੱਚੇ ਨੂੰ ਹਸਪਤਾਲ ਦੇ ਪੀਡੀਆਟ੍ਰਿਕ ਵਾਰਡ ਵਿੱਚ ਦਾਖਲ ਕਰਵਾਇਆ ਗਿਆ। ਰਾਤ ਨੂੰ ਅਚਾਨਕ ਬੱਚਾ ਚੀਕਣ ਲੱਗਾ। ਜਦੋਂ ਉਸ ਦੀ ਬੈੱਡਸ਼ੀਟ ਉਤਾਰੀ ਗਈ ਤਾਂ ਉਸ ਦੇ ਪਰਿਵਾਰ ਵਾਲਿਆਂ ਨੇ ਦੇਖਿਆ ਕਿ ਉਸ ਦੇ ਅੰਗੂਠੇ ‘ਤੇ ਚੂਹੇ ਲਟਕ ਰਹੇ ਸਨ। ਉਸ ਵਿੱਚੋਂ ਖੂਨ ਨਿਕਲ ਰਿਹਾ ਸੀ। ਸ਼ਿਕਾਇਤ ਕਰਨ ‘ਤੇ ਨਰਸ ਨੇ ਉਸ ਦੇ ਅੰਗੂਠੇ ‘ਤੇ ਪੱਟੀ ਬੰਨ੍ਹ ਦਿੱਤੀ। ਅੱਜ ਸਵੇਰੇ ਇਲਾਜ ਦੌਰਾਨ ਬੱਚੇ ਦੀ ਜਾਨ ਚਲੀ ਗਈ।

ਗੰਦਗੀ ਦੇ ਢੇਰ
ਕੈਂਸਰ ਇੰਸਟੀਚਿਊਟ ਵਿੱਚ ਗੰਦਗੀ ਕਾਰਨ ਚੂਹਿਆਂ ਨੇ ਦਹਿਸ਼ਤ ਮਚਾ ਦਿੱਤੀ ਹੈ। ਸੰਸਥਾ ਵਿੱਚ ਚੂਹਿਆਂ ਦੀ ਬਹੁਤਾਤ ਹੋਣ ਕਾਰਨ ਉਹ ਹੁਣ ਮਰੀਜ਼ਾਂ ਦੇ ਬੈੱਡਾਂ ’ਤੇ ਛਾਲਾਂ ਮਾਰਨ ਲੱਗ ਪਏ ਹਨ। ਨਤੀਜਾ ਇਹ ਹੋਇਆ ਕਿ ਇੱਕ ਚੂਹੇ ਨੇ ਬੱਚੇ ਦੀ ਲੱਤ ਨੂੰ ਕੁਤਰ ਦਿੱਤਾ। ਜਦੋਂ ਸੰਸਥਾ ਦੀ ਇਹ ਲਾਪ੍ਰਵਾਹੀ ਸਾਹਮਣੇ ਆਈ ਤਾਂ ਜ਼ਿੰਮੇਵਾਰ ਅਧਿਕਾਰੀਆਂ ਨੇ ਕਈ ਤਰ੍ਹਾਂ ਦੀਆਂ ਦਲੀਲਾਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ। ਕੈਂਸਰ ਇੰਸਟੀਚਿਊਟ ਦੇ ਸੁਪਰਡੈਂਟ ਡਾਕਟਰ ਸੰਦੀਪ ਜਸੂਜਾ ਦਾ ਕਹਿਣਾ ਹੈ ਕਿ ਬੈੱਡ ਦੇ ਆਲੇ-ਦੁਆਲੇ ਚੂਹਾ ਦੇਖੇ ਗਏ ਸੀ।