ਬੇਰੁਜ਼ਗਾਰ ਨੌਜਵਾਨਾਂ ਦੇ ਖਾਤੇ ‘ਚ ਅਚਾਨਕ ਆਏ 125 ਕਰੋੜ, ਮੈਸੇਜ ਦੇਖ ਕੇ ਬੈਂਕ ਵਾਲੇ ਵੀ ਹੈਰਾਨ…

ਮਹਾਰਾਸ਼ਟਰ ਵਿਚ ਚੋਣਾਂ ਦੌਰਾਨ ਇਕ ਵੱਡੀ ਖਬਰ ਸਾਹਮਣੇ ਆ ਰਹੀ ਹੈ। ਇੱਥੇ ਨਾਸਿਕ ਸ਼ਹਿਰ ਵਿੱਚ 12 ਬੇਰੁਜ਼ਗਾਰਾਂ ਦੇ ਖਾਤਿਆਂ ਵਿੱਚ ਅਚਾਨਕ 125 ਕਰੋੜ ਰੁਪਏ ਆ ਗਏ। ਜਦੋਂ ਉਨ੍ਹਾਂ ਨੂੰ ਮੈਸਿਜ ਮਿਲਿਆ ਤਾਂ ਉਹ ਦੰਗ ਰਹਿ ਗਏ। ਜਦੋਂ ਉਹ ਬੈਂਕ ਪੁੱਜੇ ਤਾਂ ਬੈਂਕ ਵਾਲਿਆਂ ਨੇ ਵੀ ਸਾਫ਼-ਸਾਫ਼ ਦੱਸ ਦਿੱਤੇ ਕਿ ਖਾਤੇ ਵਿੱਚ ਕਿਸੇ ਨੇ ਪੈਸੇ ਜਮ੍ਹਾਂ ਕਰਵਾ ਦਿੱਤੇ ਹਨ। ਬੈਂਕ ਵਾਲੇ ਵੀ ਉਨ੍ਹਾਂ ਦੀ ਪ੍ਰੋਫਾਈਲ ਜਾਣ ਕੇ ਹੈਰਾਨ ਹਨ ਕਿਉਂਕਿ ਉਨ੍ਹਾਂ ਦੇ ਖਾਤੇ ‘ਚ ਕਦੇ ਲੱਖਾਂ ਰੁਪਏ ਦਾ ਕੋਈ ਲੈਣ-ਦੇਣ ਨਹੀਂ ਹੋਇਆ, ਕਰੋੜਾਂ ਤਾਂ ਬੜੀ ਦੂਰ ਦੀ ਗੱਲ ਸੀ। ਪੁਲਿਸ ਪੂਰੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਪੁਲਿਸ ਮੁਤਾਬਕ ਇਨ੍ਹਾਂ ਸਾਰੇ ਬੇਰੁਜ਼ਗਾਰਾਂ ਦੇ ਖਾਤੇ ਮਾਲੇਗਾਓਂ ਮਰਚੈਂਟ ਬੈਂਕ (Nashik Merchant Bank in Malegaon) ਵਿਚ ਹਨ। ਇਨ੍ਹਾਂ ਵਿਚ ਕਦੇ ਹਜ਼ਾਰ ਰੁਪਏ ਤੋਂ ਵੱਧ ਦਾ ਲੈਣ-ਦੇਣ ਨਹੀਂ ਹੋਇਆ, ਪਰ ਅਚਾਨਕ ਇੰਨੀ ਵੱਡੀ ਰਕਮ ਖਾਤੇ ਵਿੱਚ ਆ ਗਈ। ਇਹ ਦੇਖ ਕੇ ਨੌਜਵਾਨ ਕਾਫੀ ਸਹਿਮ ਗਏ। ਨੌਜਵਾਨਾਂ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ ਕਿ ਇਹ ਰਕਮ ਕਿਸ ਨੇ ਖਾਤੇ ਵਿੱਚ ਜਮ੍ਹਾਂ ਕਰਵਾਈ ਹੈ। ਪਰ ਚੋਣਾਂ ਦੌਰਾਨ ਵਾਪਰੀ ਅਜਿਹੀ ਘਟਨਾ ਨੇ ਹਰ ਕਿਸੇ ਦਾ ਧਿਆਨ ਖਿੱਚਿਆ। ਇਸ ਦੌਰਾਨ ਜਾਂਚ ਸ਼ੁਰੂ ਹੋਈ।

ਪੈਸੇ ਕਿਸ ਨੇ ਟਰਾਂਸਫਰ ਕੀਤੇ?
ਇਹ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਫਰਜ਼ੀ ਕੰਪਨੀਆਂ ਦੁਆਰਾ ਲੈਣ-ਦੇਣ ਕੀਤਾ ਗਿਆ ਹੋ ਸਕਦਾ ਹੈ। ਇਹ ਵੀ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਬੈਂਕ ਦੀ ਗਲਤੀ ਕਾਰਨ ਪੈਸੇ ਟਰਾਂਸਫਰ ਹੋਏ ਹਨ। ਪਰ ਬੈਂਕ ਨੇ ਸਾਫ਼ ਕਿਹਾ ਕਿ ਅਜਿਹਾ ਨਾ ਤਾਂ ਉਨ੍ਹਾਂ ਦੇ ਕਾਰਨ ਹੋਇਆ ਹੈ ਅਤੇ ਨਾ ਹੀ ਸਿਸਟਮ ਦੀ ਕਿਸੇ ਗਲਤੀ ਕਾਰਨ ਹੋਇਆ ਹੈ।

100 ਤੋਂ 500 ਕਰੋੜ ਰੁਪਏ ਦਾ ਲੈਣ-ਦੇਣ ਹੋਇਆ
ਇਸ ਘਟਨਾ ਨੇ ਨਾਸਿਕ ਦੇ ਮਾਲੇਗਾਓਂ ਵਿੱਚ ਸਨਸਨੀ ਮਚਾ ਦਿੱਤੀ ਹੈ। ਜਾਂਚ ‘ਚ ਸਾਹਮਣੇ ਆਇਆ ਕਿ ਪਿਛਲੇ 15-20 ਦਿਨਾਂ ‘ਚ ਬੈਂਕ ਦੀ ਇਸ ਸ਼ਾਖਾ ‘ਚ ਇਨ੍ਹਾਂ 12 ਖਾਤਿਆਂ ‘ਚ 100 ਤੋਂ 500 ਕਰੋੜ ਰੁਪਏ ਦਾ ਲੈਣ-ਦੇਣ ਹੋਇਆ ਹੈ। ਇਨ੍ਹਾਂ ਨੌਜਵਾਨਾਂ ਦੇ ਨਾਂ ‘ਤੇ ਸ਼ੈਲ ਕੰਪਨੀਆਂ ਬਣਾ ਕੇ 10 ਕਰੋੜ ਅਤੇ 15 ਕਰੋੜ ਰੁਪਏ ਦੀ ਰਕਮ ਜਮ੍ਹਾਂ ਕਰਵਾਈ ਗਈ ਹੈ। ਕੁਝ ਦਿਨ ਪਹਿਲਾਂ ਸਿਰਾਜ ਅਹਿਮਦ ਨਾਂ ਦੇ ਵਿਅਕਤੀ ਨੇ ਇਨ੍ਹਾਂ ਨੌਜਵਾਨਾਂ ਨੂੰ ਮਾਲੇਗਾਓਂ ਮਾਰਕੀਟ ਕਮੇਟੀ ‘ਚ ਨੌਕਰੀ ਦਿਵਾਉਣ ਦਾ ਝਾਂਸਾ ਦੇ ਕੇ ਉਨ੍ਹਾਂ ਤੋਂ ਆਧਾਰ ਕਾਰਡ, ਪੈਨ ਕਾਰਡ ਅਤੇ ਦਸਤਖਤ ਲੈ ਲਏ ਸਨ। ਹੁਣ ਇਸ ਗੱਲ ਦਾ ਖੁਲਾਸਾ ਹੋਇਆ ਹੈ।