ਇਸ ਦੇਸ਼ ਵਿੱਚ ਖ਼ਤਮ ਹੋ ਗਿਆ ਪੈਟਰੋਲ-ਡੀਜ਼ਲ !, ਤੇਲ ਪਵਾਉਣ ਲਈ ਕਈ ਦਿਨਾਂ ਤੋਂ ਲੱਗੀਆਂ ਲੰਮੀਆਂ ਲਾਈਨਾਂ…
ਜ਼ਰਾ ਕਲਪਨਾ ਕਰੋ ਕਿ ਕੀ ਹੋਵੇਗਾ ਜੇਕਰ ਤੁਹਾਨੂੰ ਆਪਣੀ ਕਾਰ ਵਿੱਚ ਪੈਟਰੋਲ ਅਤੇ ਡੀਜ਼ਲ ਨਾਲ ਭਰਵਾਉਣ ਲਈ ਕਈ ਦਿਨਾਂ ਤੱਕ ਲਾਈਨ ਵਿੱਚ ਖੜ੍ਹਾ ਹੋਣਾ ਪਵੇ। ਇਹ ਗੱਲ ਅਵਿਸ਼ਵਾਸ਼ਯੋਗ ਲੱਗ ਸਕਦੀ ਹੈ, ਪਰ ਇਹ ਬਿਲਕੁਲ ਸੱਚ ਹੈ। ਦੱਖਣੀ ਅਮਰੀਕੀ ਦੇਸ਼ ਬੋਲੀਵੀਆ ਦੇ ਨਾਗਰਿਕ ਇਨ੍ਹੀਂ ਦਿਨੀਂ ਅਜਿਹੀਆਂ ਹੀ ਮੁਸ਼ਕਲਾਂ ਵਿੱਚੋਂ ਲੰਘ ਰਹੇ ਹਨ। ਇੱਥੇ ਈਂਧਨ ਸਭ ਤੋਂ ਦੁਰਲੱਭ ਵਸਤੂ ਬਣਦਾ ਜਾ ਰਿਹਾ ਹੈ। ਲੋਕਾਂ ਨੂੰ ਤੇਲ ਪਵਾਉਣ ਲਈ ਕਈ-ਕਈ ਘੰਟੇ ਲਾਈਨਾਂ ‘ਚ ਖੜ੍ਹਾ ਹੋਣਾ ਪੈਂਦਾ ਹੈ, ਜਦਕਿ ਇਹ ਦੇਸ਼ ਦੁਨੀਆ ‘ਚ ਕੁਦਰਤੀ ਗੈਸ ਦਾ ਦੂਜਾ ਸਭ ਤੋਂ ਵੱਡਾ ਉਤਪਾਦਕ ਹੈ।
ਦੱਖਣੀ ਅਮਰੀਕੀ ਦੇਸ਼ ਬੋਲੀਵੀਆ ਕੁਦਰਤੀ ਗੈਸ ਦਾ ਦੂਜਾ ਸਭ ਤੋਂ ਵੱਡਾ ਉਤਪਾਦਕ ਹੈ ਅਤੇ ਅੱਜ-ਕੱਲ੍ਹ ਪੈਟਰੋਲ ਪੰਪਾਂ ਦੇ ਬਾਹਰ ਕਈ ਕਿਲੋਮੀਟਰ ਤੱਕ ਵਾਹਨਾਂ ਦੀਆਂ ਲੰਬੀਆਂ ਕਤਾਰਾਂ ਲੱਗੀਆਂ ਹੋਈਆਂ ਹਨ। ਕੁਝ ਵਾਹਨ ਕਈ-ਕਈ ਦਿਨ ਕਤਾਰਾਂ ਵਿੱਚ ਖੜ੍ਹੇ ਨਜ਼ਰ ਆ ਰਹੇ ਹਨ। ਲੋਕਾਂ ਵਿੱਚ ਨਿਰਾਸ਼ਾ ਵੱਧ ਰਹੀ ਹੈ। ਹਾਲਾਤ ਇਹ ਹਨ ਕਿ ਹੁਣ ਕਈ ਡਰਾਈਵਰ ਕਤਾਰਾਂ ਵਿੱਚ ਖੜ੍ਹੇ ਆਪਣੇ ਟਰੱਕਾਂ ਕੋਲ ਹੀ ਖਾਂਦੇ-ਪੀਂਦੇ ਅਤੇ ਸੌਂਦੇ ਹਨ।
ਭਿਆਨਕ ਹੈ ਸਥਿਤੀ…
ਡਰਾਈਵਰ ਗਾਰਸੀਆ (66) ਨੇ ਕਿਹਾ, ‘ਸਾਨੂੰ ਨਹੀਂ ਪਤਾ ਕੀ ਹੋਵੇਗਾ? ਯਕੀਨਨ ਸਾਡੀ ਹਾਲਤ ਹੋਰ ਵੀ ਵਿਗੜਨ ਵਾਲੀ ਹੈ। ਇਕ ਹੋਰ ਡਰਾਈਵਰ ਰਾਮੀਰੋ ਮੋਰਾਲੇਸ (38) ਨੇ ਕਿਹਾ, ‘ਵਾਹਨਾਂ ਦੀਆਂ ਕਤਾਰਾਂ ਲੰਬੀਆਂ ਹੁੰਦੀਆਂ ਜਾ ਰਹੀਆਂ ਹਨ। ਮੰਗਲਵਾਰ ਨੂੰ ਚਾਰ ਘੰਟੇ ਕਤਾਰ ‘ਚ ਖੜ੍ਹੇ ਰਹਿਣ ਤੋਂ ਬਾਅਦ ਉਸ ਨੂੰ ਟਾਇਲਟ ਜਾਣਾ ਸੀ , ਪਰ ਉਸ ਨੂੰ ਇਸ ਗੱਲ ਦਾ ਡਰ ਸੀ ਕਿ ਜੇਕਰ ਉਹ ਕਤਾਰ ‘ਚੋਂ ਨਿਕਲ ਗਏ ਤਾਂ ਸ਼ਾਇਦ ਉਹ ਆਪਣੀ ਜਗ੍ਹਾ ਗੁਆ ਬੈਠਣਗੇ। ਲੋਕ ਹੁਣ ਥੱਕ ਚੁੱਕੇ ਹਨ।
ਦੋਹਰੀ ਚੁਣੌਤੀਆਂ ਨਾਲ ਘਿਰਿਆ ਦੇਸ਼…
ਬੋਲੀਵੀਆ ਵਿੱਚ ਈਂਧਨ ਦੀ ਕਮੀ ਦੀ ਸਮੱਸਿਆ ਅਜਿਹੇ ਸਮੇਂ ਵਿੱਚ ਪੈਦਾ ਹੋਈ ਹੈ ਜਦੋਂ ਦੇਸ਼ ਦਾ ਵਿਦੇਸ਼ੀ ਮੁਦਰਾ ਭੰਡਾਰ ਘਟਦਾ ਜਾ ਰਿਹਾ ਹੈ। ਇਸ ਕਾਰਨ ਬੋਲੀਵੀਆ ਦੇ ਲੋਕਾਂ ਨੂੰ ਅਮਰੀਕੀ ਡਾਲਰ ਨਹੀਂ ਮਿਲ ਰਹੇ ਹਨ। ਦਰਾਮਦ ਕੀਤੀਆਂ ਵਸਤਾਂ ਜੋ ਪਹਿਲਾਂ ਆਮ ਹੁੰਦੀਆਂ ਸਨ ਹੁਣ ਦੁਰਲੱਭ ਹੋ ਗਈਆਂ ਹਨ। ਦੇਸ਼ ਦੇ ਮੁੱਖ ਸ਼ਹਿਰ ਸਾਂਤਾ ਕਰੂਜ਼ ਦੇ ਪੂਰਬੀ ਸੂਬੇ ਵਿੱਚ ਗੈਬਰੀਅਲ ਰੇਨੇ ਮੋਰੇਨੋ ਆਟੋਨੋਮਸ ਯੂਨੀਵਰਸਿਟੀ ਦੇ ਵਾਈਸ-ਰੈਕਟਰ ਰੇਨਾਰੀਓ ਵਰਗਸ ਨੇ ਕਿਹਾ, “ਅਸੀਂ ਈਂਧਨ ਦੀ ਕਮੀ, ਡਾਲਰ ਦੀ ਕਮੀ ਅਤੇ ਭੋਜਨ ਦੀਆਂ ਵਧਦੀਆਂ ਕੀਮਤਾਂ ਨਾਲ ਨਜਿੱਠਣ ਲਈ ਪ੍ਰਭਾਵਸ਼ਾਲੀ ਹੱਲ ਚਾਹੁੰਦੇ ਹਾਂ।”
ਨਾਕਾਮ ਰਹੀ ਸਰਕਾਰ…
ਇਨ੍ਹਾਂ ਸਾਰੀਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਹੇ ਆਮ ਨਾਗਰਿਕਾਂ ਨੇ ਪਿਛਲੇ ਹਫ਼ਤੇ ਰਾਜਧਾਨੀ ਲਾ ਪਾਜ਼ ਵਿਚ ਸੜਕਾਂ ‘ਤੇ ਮਾਰਚ ਕੀਤਾ ਅਤੇ ‘ਸਭ ਕੁਝ ਮਹਿੰਗਾ ਹੈ’ ਦੇ ਨਾਅਰੇ ਲਗਾਏ। ਇਸ ਦੌਰਾਨ ਆਰਥਿਕ ਮੰਤਰੀ ਮਾਰਸੇਲੋ ਮੋਂਟੇਨੇਗਰੋ ਨੇ ਕਿਹਾ, ‘ਡੀਜ਼ਲ ਦੀ ਵਿਕਰੀ ਆਮ ਵਾਂਗ ਹੋਣ ਦੀ ਪ੍ਰਕਿਰਿਆ ‘ਚ ਹੈ।’ ਬੋਲੀਵੀਆ ਦੇ ਰਾਸ਼ਟਰਪਤੀ ਲੁਈਸ ਆਰਸ ਨੇ ਵੀ ਵਾਰ-ਵਾਰ ਈਂਧਨ ਦੀ ਕਮੀ ਨੂੰ ਦੂਰ ਕਰਨ ਲਈ ਬੁਨਿਆਦੀ ਵਸਤੂਆਂ ਦੀਆਂ ਕੀਮਤਾਂ ਘਟਾਉਣ ਦਾ ਭਰੋਸਾ ਦਿੱਤਾ ਹੈ। ਇਸ ਤੋਂ ਪਹਿਲਾਂ 10 ਨਵੰਬਰ ਨੂੰ ਉਨ੍ਹਾਂ ਨੇ ਜਨਤਾ ਨਾਲ ਵਾਅਦਾ ਕੀਤਾ ਸੀ ਕਿ ਅਗਲੇ 10 ਦਿਨਾਂ ‘ਚ ਸਮੱਸਿਆ ਦਾ ਹੱਲ ਲੱਭ ਲਿਆ ਜਾਵੇਗਾ। ਫਿਲਹਾਲ ਜਨਤਾ ਨੂੰ ਇਹ ਉਮੀਦ ਨਹੀਂ ਹੈ ਕਿ ਇਹ ਸੰਕਟ ਜਲਦੀ ਖਤਮ ਹੋ ਜਾਵੇਗਾ।
