ਦੇਸ਼ ‘ਚ ਵਧਦੀ ਮਹਿੰਗਾਈ ਨੂੰ ਦੇਖਦੇ ਹੋਏ ਸਰਕਾਰ ਨੇ ਵੱਡਾ ਫੈਸਲਾ ਲਿਆ ਹੈ। ਸਰਕਾਰ ਨੇ ਵੀਰਵਾਰ ਨੂੰ ਖਾਣ ਪੀਣ ਦੀਆਂ ਚੀਜ਼ਾਂ ਦੀ ਮਹਿੰਗਾਈ ‘ਤੇ ਕੰਟਰੋਲ ਕਰਨ ਲਈ ਥੋਕ ਘਰੇਲੂ ਖਪਤਕਾਰਾਂ ਨੂੰ ਮਾਰਚ 2025 ਤੱਕ 25 ਲੱਖ ਟਨ ਐਫਸੀਆਈ ਕਣਕ ਵੇਚਣ ਦਾ ਐਲਾਨ ਕੀਤਾ।
ਕਣਕ ਦੀ ਵਿਕਰੀ ਸਰਕਾਰ ਵੱਲੋਂ ਓਪਨ ਮਾਰਕੀਟ ਸੇਲ ਸਕੀਮ (OMSS) ਪਹਿਲਕਦਮੀ ਤਹਿਤ ਕੀਤੀ ਜਾਵੇਗੀ। ਇਸ ਨੂੰ ਫੂਡ ਕਾਰਪੋਰੇਸ਼ਨ ਆਫ ਇੰਡੀਆ ਯਾਨੀ FCI ਦੁਆਰਾ ਕੀਤਾ ਮੈਨੇਜ ਕੀਤਾ ਜਾਵੇਗਾ।
ਕਣਕ ਦੀ ਕੀਮਤ ਤੈਅ
ਖੁਰਾਕ ਮੰਤਰਾਲੇ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ OMSS ਅਧੀਨ ਕਣਕ ਲਈ ਰਿਜ਼ਰਵ ਕੀਮਤ ਫੇਅਰ ਐਂਡ ਐਵਰੇਜ ਗੁਣਵੱਤਾ (FAQ) ਅਨਾਜ ਲਈ 2,325 ਰੁਪਏ ਪ੍ਰਤੀ ਕੁਇੰਟਲ ਅਤੇ ਥੋੜ੍ਹਾ ਘੱਟ ਗੁਣਵੱਤਾ ਵਾਲੇ (URS) ਅਨਾਜ ਲਈ 2,300 ਰੁਪਏ ਪ੍ਰਤੀ ਕੁਇੰਟਲ ਕੀਮਤ ਨਿਰਧਾਰਤ ਕੀਤੀ ਗਈ ਹੈ।
ਈ-ਨਿਲਾਮੀ ਰਾਹੀਂ ਕੀਤੀ ਜਾਵੇਗੀ ਵਿਕਰੀ…
31 ਮਾਰਚ, 2025 ਤੱਕ ਈ-ਨਿਲਾਮੀ ਰਾਹੀਂ ਆਟਾ ਮਿੱਲਾਂ, ਕਣਕ ਉਤਪਾਦ ਨਿਰਮਾਤਾਵਾਂ, ਪ੍ਰੋਸੈਸਰਾਂ ਅਤੇ ਅੰਤਮ ਉਪਭੋਗਤਾਵਾਂ ਸਮੇਤ ਪ੍ਰਾਈਵੇਟ ਪਾਰਟੀਆਂ ਨੂੰ ਕਣਕ ਵੇਚੀ ਜਾਵੇਗੀ। ਹਾਲਾਂਕਿ, ਸਰਕਾਰ ਨੇ ਐਫਸੀਆਈ ਦੀ ਕਣਕ ਦੀ ਵਿਕਰੀ ਸ਼ੁਰੂ ਕਰਨ ਦੀ ਮਿਤੀ ਬਾਰੇ ਥੋਕ ਉਪਭੋਗਤਾਵਾਂ ਨੂੰ ਜਾਣਕਾਰੀ ਨਹੀਂ ਦਿੱਤੀ।
ਪਿਛਲੇ ਸਾਲ ਐਫਸੀਆਈ ਨੇ 10 ਲੱਖ ਟਨ ਕਣਕ ਵੇਚੀ ਸੀ
ਪਿਛਲੇ ਸਾਲ, ਫੂਡ ਕਾਰਪੋਰੇਸ਼ਨ ਆਫ ਇੰਡੀਆ ਨੇ OMSS ਦੇ ਤਹਿਤ ਥੋਕ ਉਪਭੋਗਤਾਵਾਂ ਨੂੰ 10 ਲੱਖ ਟਨ ਤੋਂ ਵੱਧ ਕਣਕ ਵੇਚੀ ਸੀ।
ਜ਼ਿਕਰਯੋਗ ਹੈ ਕਿ ਕਣਕ ਦੀ ਕੀਮਤ ਘੱਟੋ-ਘੱਟ ਸਮਰਥਨ ਮੁੱਲ ਤੋਂ ਦੁੱਗਣੀ ਹੋ ਗਈ ਹੈ। ਖਪਤਕਾਰ ਮਾਮਲਿਆਂ ਦੇ ਵਿਭਾਗ ਦੇ ਮੁੱਲ ਨਿਗਰਾਨੀ ਵਿਭਾਗ ਨੇ ਕਿਹਾ ਹੈ ਕਿ 20 ਨਵੰਬਰ, 2024 ਨੂੰ ਦਿੱਲੀ, ਉੱਤਰ ਪ੍ਰਦੇਸ਼, ਗੁਜਰਾਤ ਅਤੇ ਗੋਆ ਦੀਆਂ ਮੰਡੀਆਂ ਵਿੱਚ ਕਣਕ ਦੀ ਵੱਧ ਤੋਂ ਵੱਧ ਥੋਕ ਕੀਮਤ 5,800 ਰੁਪਏ ਪ੍ਰਤੀ ਕੁਇੰਟਲ ਤੱਕ ਪਹੁੰਚ ਗਈ ਹੈ।
