IPL ਦੇ ਸਭ ਤੋਂ ਮਹਿੰਗੇ ਖਿਡਾਰੀ ਰਿਸ਼ਭ ਪੰਤ ਨੇ ਹੁਣ ਤੱਕ ਕਿੰਨਾ ਕਮਾਇਆ ਪੈਸਾ, ਕਿੱਥੇ-ਕਿੱਥੇ ਲਗਾਇਆ, ਕਿੰਨੀ ਹੈ ਕੁੱਲ ਜਾਇਦਾਦ ?

ਭਾਰਤੀ ਕ੍ਰਿਕਟ ਟੀਮ ਦੇ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ (Rishabh Pant) ਆਈਪੀਐਲ ਇਤਿਹਾਸ ਦੇ ਸਭ ਤੋਂ ਮਹਿੰਗੇ ਖਿਡਾਰੀ ਬਣ ਗਏ ਹਨ। ਅਜਿਹੇ ‘ਚ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਦੇ ਦਿਮਾਗ ‘ਚ ਇਹ ਸਵਾਲ ਜ਼ਰੂਰ ਉੱਠ ਰਿਹਾ ਹੋਵੇਗਾ ਕਿ ਇਸ ਆਲਰਾਊਂਡਰ ਖਿਡਾਰੀ ਨੇ ਹੁਣ ਤੱਕ ਕਿੰਨਾ ਪੈਸਾ ਕਮਾਇਆ ਹੈ ਅਤੇ ਉਸ ਨੇ ਕਿੱਥੇ ਨਿਵੇਸ਼ ਕੀਤਾ ਹੈ।

ਰਿਸ਼ਭ ਪੰਤ (Rishabh Pant) ਨੂੰ IPL ਟੀਮ ਲਖਨਊ ਸੁਪਰ ਜਾਇੰਟ ਨੇ 27 ਕਰੋੜ ਰੁਪਏ ‘ਚ ਖਰੀਦਿਆ ਹੈ। ਇਹ ਹੁਣ ਤੱਕ ਕਿਸੇ ਵੀ ਖਿਡਾਰੀ ਨੂੰ ਮਿਲੀ ਸਭ ਤੋਂ ਵੱਧ ਰਕਮ ਹੈ। ਪੰਤ 2018 ਤੋਂ ਆਈਪੀਐਲ ਵਿੱਚ ਖੇਡ ਰਹੇ ਹਨ ਅਤੇ ਉਨ੍ਹਾਂ ਨੂੰ ਪਹਿਲੀ ਵਾਰ ਦਿੱਲੀ ਕੈਪੀਟਲਸ ਨੇ 1.8 ਕਰੋੜ ਰੁਪਏ ਵਿੱਚ ਖਰੀਦਿਆ ਸੀ, ਜਦੋਂ ਕਿ ਸਾਲ 2022 ਤੱਕ ਇਹ ਰਕਮ ਲਗਭਗ 10 ਗੁਣਾ ਵੱਧ ਕੇ 16 ਕਰੋੜ ਰੁਪਏ ਹੋ ਗਈ। 2022 ‘ਚ ਹੋਏ ਹਾਦਸੇ ਤੋਂ ਬਾਅਦ ਪੰਤ (Rishabh Pant) ਲੰਬੇ ਸਮੇਂ ਤੱਕ ਖੇਡ ਤੋਂ ਦੂਰ ਰਹੇ।

ਤੁਹਾਨੂੰ ਇਹ ਜਾਣ ਕੇ ਹੈਰਾਨੀ ਹੋਵੇਗੀ ਕਿ ਰਿਸ਼ਭ ਪੰਤ (Rishabh Pant) ਨੇ 2018 ਤੋਂ ਹੁਣ ਤੱਕ ਇਕੱਲੇ ਆਈਪੀਐਲ ਤੋਂ ਲਗਭਗ 80 ਕਰੋੜ ਰੁਪਏ ਕਮਾਏ ਹਨ। ਮੈਚ ਫੀਸ ਅਤੇ ਆਈਪੀਐਲ ਤੋਂ ਇਲਾਵਾ, ਉਨ੍ਹਾਂ ਦੀ ਆਮਦਨ ਦਾ ਮੁੱਖ ਸਰੋਤ ਬ੍ਰਾਂਡ ਐਂਡੋਰਸਮੈਂਟ ਅਤੇ ਨਿਵੇਸ਼ ਵੀ ਹੈ। ‘ਸਪੋਰਟਸਕੀੜਾ’ ਦੀ ਰਿਪੋਰਟ ਮੁਤਾਬਕ ਪੰਤ ਦੀ ਕੁੱਲ ਜਾਇਦਾਦ ਲਗਭਗ 100 ਕਰੋੜ ਰੁਪਏ ਹੈ, ਜਿਸ ‘ਚੋਂ ਸਭ ਤੋਂ ਵੱਧ ਕਮਾਈ ਆਈ.ਪੀ.ਐੱਲ. ‘ਚੋਂ ਹੋਈ ਹੈ। ਜੇਕਰ ਪੰਤ (Rishabh Pant) ਦੀ ਕਮਾਈ ਦੀ ਗੱਲ ਕਰੀਏ ਤਾਂ ਉਨ੍ਹਾਂ ਦਾ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ ਨਾਲ ਕੰਟ੍ਰੈਕਟ ਹੈ, ਜੋ ਬੀ ਗ੍ਰੇਡ ‘ਚ ਆਉਂਦਾ ਹੈ।

ਇਸ ਇਕਰਾਰਨਾਮੇ ਤਹਿਤ ਉਨ੍ਹਾਂ ਨੂੰ ਸਾਲਾਨਾ 3 ਕਰੋੜ ਰੁਪਏ ਮਿਲਦੇ ਹਨ, ਜਦਕਿ ਉਨ੍ਹਾਂ ਨੂੰ ਖੇਡੇ ਜਾਣ ਵਾਲੇ ਹਰ ਟੈਸਟ ਮੈਚ ਲਈ 15 ਲੱਖ ਰੁਪਏ ਅਤੇ ਹਰ ਇਕ ਰੋਜ਼ਾ ਮੈਚ ਲਈ 6 ਲੱਖ ਰੁਪਏ ਮਿਲਦੇ ਹਨ। ਪੰਤ (Rishabh Pant) ਨੂੰ ਟੀ-20 ਮੈਚਾਂ ਲਈ 3 ਲੱਖ ਰੁਪਏ ਪ੍ਰਤੀ ਮੈਚ ਫੀਸ ਅਦਾ ਕੀਤੀ ਜਾਂਦੀ ਹੈ।

ਜੇਕਰ ਇਸ ਨਜ਼ਰੀਏ ਤੋਂ ਦੇਖਿਆ ਜਾਵੇ ਤਾਂ ਰਿਸ਼ਭ ਪੰਤ (Rishabh Pant) ਹਰ ਮਹੀਨੇ ਕਰੀਬ 1.2 ਕਰੋੜ ਰੁਪਏ ਕਮਾਉਂਦੇ ਹਨ, ਜਦਕਿ ਸਾਲਾਨਾ ਆਮਦਨ 16 ਕਰੋੜ ਰੁਪਏ ਦੇ ਕਰੀਬ ਹੈ। ਉਹ ਹਰ ਐਡ ਲਈ 20 ਤੋਂ 30 ਲੱਖ ਰੁਪਏ ਲੈਂਦੇ ਹਨ। ਵਰਤਮਾਨ ਵਿੱਚ ਉਨ੍ਹਾਂ ਕੋਲ Adidas, JSW, Dream11, Realme, Cadbury ਅਤੇ Zomato ਵਰਗੇ ਕਈ ਵੱਡੇ ਬ੍ਰਾਂਡ ਹਨ। ਉਨ੍ਹਾਂ ਦੀ ਬ੍ਰਾਂਡ ਵੈਲਿਊ ਲਗਭਗ 126 ਕਰੋੜ ਰੁਪਏ ਦੱਸੀ ਜਾਂਦੀ ਹੈ।

ਮੈਜਿਕਬ੍ਰਿਕਸ ਦੇ ਮੁਤਾਬਕ ਪੰਤ ਕੋਲ ਦਿੱਲੀ, ਉਤਰਾਖੰਡ, ਰੁੜਕੀ, ਦੇਹਰਾਦੂਨ ਤੇ ਹਰਿਦੁਆਰ ਵਿੱਚ ਪ੍ਰਾਪਰਟੀ ਹੈ। ਦਿੱਲੀ ‘ਚ ਇਕ ਘਰ ਦੀ ਕੀਮਤ 2 ਕਰੋੜ ਰੁਪਏ ਦੇ ਕਰੀਬ ਦੱਸੀ ਜਾਂਦੀ ਹੈ, ਜਦਕਿ ਰੁੜਕੀ ‘ਚ ਮਕਾਨ ਦੀ ਕੀਮਤ ਵੀ 1 ਕਰੋੜ ਰੁਪਏ ਦੇ ਕਰੀਬ ਹੈ। ਇਸ ਤੋਂ ਇਲਾਵਾ ਪੰਤ (Rishabh Pant) ਨੇ ਕਈ ਥਾਵਾਂ ‘ਤੇ ਪ੍ਰਾਪਰਟੀ ‘ਚ ਨਿਵੇਸ਼ ਕੀਤਾ ਹੈ। ਪੰਤ ਨੂੰ ਲਗਜ਼ਰੀ ਕਾਰਾਂ ਦਾ ਵੀ ਸ਼ੌਕ ਹੈ ਅਤੇ ਉਨ੍ਹਾਂ ਕੋਲ ਕਈ ਆਲੀਸ਼ਾਨ ਕਾਰਾਂ ਹਨ। ਇਸ ਵਿੱਚ 1.3 ਕਰੋੜ ਰੁਪਏ ਦੀ ਔਡੀ 8, 2 ਕਰੋੜ ਰੁਪਏ ਦੀ ਪੀਲੀ ਫੋਰਡ ਮਸਟੈਂਗ, 2 ਕਰੋੜ ਰੁਪਏ ਦੀ ਮਰਸੀਡੀਜ਼ ਬੈਂਜ਼ GLE ਸ਼ਾਮਲ ਹੈ।

ਰਿਸ਼ਭ ਪੰਤ (Rishabh Pant) ਨੇ ਕਈ ਕੰਪਨੀਆਂ ‘ਚ ਵੀ ਨਿਵੇਸ਼ ਕੀਤਾ ਹੈ। ਹਾਲ ਹੀ ਵਿੱਚ, ਉਨ੍ਹਾਂ ਨੇ ਔਨਲਾਈਨ ਸਾਫਟਵੇਅਰ ਮਾਰਕੀਟਪਲੇਸ Techjockey.com ਵਿੱਚ 7.40 ਕਰੋੜ ਰੁਪਏ ਦਾ ਨਿਵੇਸ਼ ਕਰਕੇ 2 ਪ੍ਰਤੀਸ਼ਤ ਹਿੱਸੇਦਾਰੀ ਖਰੀਦੀ ਹੈ। ਇਸ ਤੋਂ ਇਲਾਵਾ ਪੰਤ ਨੇ ਸ਼ਿਪਿੰਗ ਅਤੇ ਲੌਜਿਸਟਿਕਸ ਮਾਰਕੀਟਪਲੇਸ ਕੰਪਨੀ ਜ਼ਿਲੀਅਨ ਯੂਨਿਟਸ ਵਿੱਚ ਵੀ ਨਿਵੇਸ਼ ਕੀਤਾ ਹੈ।