ਵਿਰਾਟ ਕੋਹਲੀ 13 ਸਾਲ ਬਾਅਦ ਦਿੱਲੀ ਟੀਮ ‘ਚ ਪਰਤੇ, ਰਿਸ਼ਭ ਪੰਤ ਦੀ ਵੀ ਵਾਪਸੀ, ਨੌਜਵਾਨ ਖਿਡਾਰੀ ਬਣਿਆ ਕਪਤਾਨ
ਨਵੀਂ ਦਿੱਲੀ: ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਨੂੰ ਰਣਜੀ ਟਰਾਫੀ ਰਾਊਂਡ ਦੋ ਦੇ ਦੋ ਮੈਚਾਂ ਲਈ ਦਿੱਲੀ ਦੀ ਟੀਮ ‘ਚ ਸ਼ਾਮਲ ਕੀਤਾ ਗਿਆ ਹੈ। ਕੋਹਲੀ ਮੈਚ ਖੇਡਣਗੇ ਜਾਂ ਨਹੀਂ, ਇਹ ਉਨ੍ਹਾਂ ਦੀ ਉਪਲਬਧਤਾ ‘ਤੇ ਨਿਰਭਰ ਕਰਦਾ ਹੈ। ਸੱਜੇ ਹੱਥ ਦੇ ਬੱਲੇਬਾਜ਼ ਵਿਰਾਟ ਕੋਹਲੀ ਦਾ ਹਾਲ ਹੀ ਦਾ ਆਸਟ੍ਰੇਲੀਆ ਦੌਰਾ ਕੋਈ ਖਾਸ ਨਹੀਂ ਰਿਹਾ, ਜਿਸ ਵਿਚ ਉਹ 9 ਪਾਰੀਆਂ ਵਿੱਚ 190 ਦੌੜਾਂ ਬਣਾ ਸਕੇ। ਵਿਰਾਟ ਨੇ ਪਰਥ ‘ਚ ਖੇਡੇ ਗਏ ਪਹਿਲੇ ਟੈਸਟ ਮੈਚ ਦੀ ਪਹਿਲੀ ਪਾਰੀ ‘ਚ ਅਜੇਤੂ ਸੈਂਕੜਾ ਲਗਾਇਆ ਸੀ। ਇਸ ਤੋਂ ਬਾਅਦ ਬਾਕੀ ਦੇ ਚਾਰ ਟੈਸਟ ਮੈਚਾਂ ‘ਚ ਉਨ੍ਹਾਂ ਦਾ ਬੱਲਾ ਸ਼ਾਂਤ ਰਿਹਾ।
ਹਿੰਦੁਸਤਾਨ ਟਾਈਮਜ਼ ਮੁਤਾਬਕ ‘ਵਿਰਾਟ ਕੋਹਲੀ ਨੂੰ ਅਗਲੇ ਦੋ ਮੈਚਾਂ ਲਈ ਦਿੱਲੀ ਟੀਮ ‘ਚ ਸ਼ਾਮਲ ਕੀਤਾ ਗਿਆ ਹੈ ਜਦਕਿ ਉਨ੍ਹਾਂ ਦੇ ਨਾਲ ਹੀ ਰਿਸ਼ਭ ਪੰਤ ਦੀ ਵੀ ਵਾਪਸੀ ਹੋਈ ਹੈ।’ ਵਿਰਾਟ ਕੋਹਲੀ ਆਸਟ੍ਰੇਲੀਆ ਦੌਰੇ ‘ਤੇ ਬਾਰਡਰ ਗਾਵਸਕਰ ਟੈਸਟ ਸੀਰੀਜ਼ ‘ਚ 8 ਵਾਰ ਇਸੇ ਤਰ੍ਹਾਂ ਆਊਟ ਹੋਏ ਸਨ। ਕੋਹਲੀ ਆਫ ਸਟੰਪ ਤੋਂ ਬਾਹਰ ਜਾ ਰਹੀ ਗੇਂਦ ‘ਤੇ ਆਪਣਾ ਬੱਲਾ ਮਾਰ ਕੇ ਪੈਵੇਲੀਅਨ ਪਰਤ ਗਏ। 36 ਸਾਲਾ ਖਿਡਾਰੀ ਦੇ ਟੈਸਟ ਫਾਰਮ ਵਿੱਚ ਪਿਛਲੇ ਪੰਜ ਸਾਲਾਂ ਵਿੱਚ ਗਿਰਾਵਟ ਦੇਖਣ ਨੂੰ ਮਿਲੀ ਹੈ ਅਤੇ ਉਨ੍ਹਾਂ ਨੇ ਸਿਰਫ਼ ਪੰਜ ਸੈਂਕੜੇ ਹੀ ਬਣਾਏ ਹਨ।
ਫਿਲਹਾਲ ਇਹ ਨਹੀਂ ਕਿਹਾ ਜਾ ਸਕਦਾ ਹੈ ਕਿ ਵਿਰਾਟ ਕੋਹਲੀ 23 ਜਨਵਰੀ ਨੂੰ ਸੌਰਾਸ਼ਟਰ ਖਿਲਾਫ ਮੈਚ ਖੇਡਣਗੇ ਜਾਂ ਨਹੀਂ। ਕੋਹਲੀ ਨੇ ਆਖਰੀ ਵਾਰ 2012 ‘ਚ ਰਣਜੀ ਮੈਚ ਖੇਡਿਆ ਸੀ। ਜੇਕਰ ਉਹ ਖੇਡਦੇ ਹਨ ਤਾਂ 13 ਸਾਲਾਂ ‘ਚ ਇਹ ਪਹਿਲੀ ਵਾਰ ਹੋਵੇਗਾ ਕਿ ਉਹ ਰਣਜੀ ਮੈਚ ਖੇਡੇਗਾ। ਦੂਜੇ ਪਾਸੇ ਸੌਰਾਸ਼ਟਰ ਅਤੇ ਰੇਲਵੇ ਖਿਲਾਫ ਹੋਣ ਵਾਲੇ ਮੈਚ ਲਈ ਪੰਤ ਦਾ ਨਾਂ ਵੀ ਟੀਮ ‘ਚ ਸ਼ਾਮਲ ਸੀ। ਜੇਕਰ ਪੰਤ ਸੌਰਾਸ਼ਟਰ ਦੇ ਖਿਲਾਫ ਮੈਚ ਖੇਡਦੇ ਹਨ ਤਾਂ ਉਹ ਸੱਤ ਸਾਲਾਂ ‘ਚ ਪਹਿਲੀ ਵਾਰ ਰਣਜੀ ਮੈਚ ਖੇਡਣਗੇ। ਆਯੂਸ਼ ਬਡੋਨੀ ਨੂੰ ਟੀਮ ਦਾ ਕਪਤਾਨ ਬਣਾਇਆ ਗਿਆ ਹੈ।
