ਚੀਨ ਨੇ ਅਮਰੀਕਾ ਨੂੰ ਧਮਕੀ ਦੇਣ ਮਗਰੋਂ ਤਾਇਵਾਨ ‘ਚ ਉਤਾਰੇ ਜੰਗੀ ਜਹਾਜ਼, ਜਾਣੋ ਚੀਨ-ਤਾਇਵਾਨ ‘ਚ ਕੀ ਬਣ ਰਹੇ ਹਾਲਾਤ

ਤਾਈਵਾਨ ਨੂੰ ਲੈ ਕੇ ਚੀਨ ਅਤੇ ਅਮਰੀਕਾ ਵਿਚਾਲੇ ਤਣਾਅ ਬਣਿਆ ਹੋਇਆ ਹੈ। ਚੀਨ ਤਾਈਵਾਨ ‘ਤੇ ਲਗਾਤਾਰ ਆਪਣੀ ਤਾਕਤ ਦਿਖਾ ਰਿਹਾ ਹੈ ਅਤੇ ਦਾਅਵਾ ਕਰਦਾ ਹੈ ਕਿ ਇਹ ਉਸ ਦਾ ਖੇਤਰ ਹੈ। ਤਾਇਵਾਨ ਨੂੰ ਦਿੱਤੀ ਗਈ ਅਮਰੀਕੀ ਮਦਦ ‘ਤੇ ਚੀਨ ਇਕ ਵਾਰ ਫਿਰ ਗੁੱਸੇ ‘ਚ ਹੈ। ਸ਼ਨੀਵਾਰ ਨੂੰ ਤਾਇਵਾਨ ਦੇ ਰਾਸ਼ਟਰੀ ਰੱਖਿਆ ਮੰਤਰਾਲੇ (ਐੱਮ.ਐੱਨ.ਡੀ.) ਨੇ ਇਕ ਬਿਆਨ ਜਾਰੀ ਕਰਕੇ ਚੀਨ ਦੀ ਨਵੀਂ ਘੁਸਪੈਠ ਦੀ ਜਾਣਕਾਰੀ ਦਿੱਤੀ। ਇਸ ਤੋਂ ਪਹਿਲਾਂ ਚੀਨ ਨੇ ਵੀ ਅਮਰੀਕਾ ਨੂੰ ਚਿਤਾਵਨੀ ਦਿੱਤੀ ਸੀ। ਚੀਨ ਨੇ ਅਮਰੀਕਾ ਨੂੰ ਸਖ਼ਤ ਲਹਿਜੇ ਵਿੱਚ ਕਿਹਾ ਸੀ ਕਿ ਉਹ ਅੱਗ ਨਾਲ ਖੇਡ ਰਿਹਾ ਹੈ। ਹੁਣ ਦੇਖਣਾ ਇਹ ਹੈ ਕਿ ਚੀਨ ਦੀ ਨਵੀਂ ਘੁਸਪੈਠ ‘ਤੇ ਤਾਈਵਾਨ ਕੀ ਜਵਾਬ ਦਿੰਦਾ ਹੈ ਅਤੇ ਅਮਰੀਕਾ ਦੀ ਪ੍ਰਤੀਕਿਰਿਆ ਕੀ ਹੋਵੇਗੀ। ਸਵਾਲ ਇਹ ਵੀ ਹੈ ਕਿ ਚੀਨ ਕੀ ਕਰਨਾ ਚਾਹੁੰਦਾ ਹੈ।

TOI ਦੀ ਰਿਪੋਰਟ ਦੇ ਮੁਤਾਬਕ, MND ਨੇ ਆਪਣੇ ਬਿਆਨ ‘ਚ ਕਿਹਾ ਹੈ ਕਿ ਸ਼ਨੀਵਾਰ ਸਵੇਰੇ ਤਾਈਵਾਨ ਦੇ ਖੇਤਰ ‘ਚ 7 ਚੀਨੀ ਫੌਜੀ ਜਹਾਜ਼ਾਂ ਅਤੇ ਪੰਜ ਜਲ ਸੈਨਾ ਦੇ ਜਹਾਜ਼ਾਂ ਦੇ ਸੰਚਾਲਨ ਦੀ ਸੂਚਨਾ ਮਿਲੀ ਸੀ। MND ਨੇ ਟਵਿੱਟਰ ‘ਤੇ ਆਪਣੀ ਪੋਸਟ ਵਿੱਚ ਕਿਹਾ, “ਅੱਜ ਸਵੇਰੇ 6 ਵਜੇ (UTC+8) ਤੱਕ ਸੱਤ PLA ਜਹਾਜ਼ ਅਤੇ ਪੰਜ PLAN ਜਹਾਜ਼ ਤਾਈਵਾਨ ਦੇ ਆਲੇ-ਦੁਆਲੇ ਕੰਮ ਕਰਦੇ ਦੇਖੇ ਗਏ। ਇਨ੍ਹਾਂ ਵਿੱਚੋਂ ਇੱਕ ਜਹਾਜ਼ ਮੱਧ ਰੇਖਾ ਨੂੰ ਪਾਰ ਕਰਕੇ ਤਾਈਵਾਨ ਦੇ ਉੱਤਰੀ ਹਵਾਈ ਰੱਖਿਆ ਪਛਾਣ ਖੇਤਰ (ADIZ) ਵਿੱਚ ਦਾਖਲ ਹੋਇਆ। ਅਸੀਂ ਸਥਿਤੀ ਦੀ ਨਿਗਰਾਨੀ ਕੀਤੀ ਹੈ ਅਤੇ ਸਥਿਤੀ ਦੇ ਅਨੁਸਾਰ ਪ੍ਰਤੀਕ੍ਰਿਆ ਕੀਤੀ ਹੈ।”

ਚੀਨ ਅਤੇ ਤਾਈਵਾਨ ਵਿਚਾਲੇ ਹਾਲ ਹੀ ਦੇ ਦਿਨਾਂ ‘ਚ ਵਧਿਆ ਤਣਾਅ
ਪਿਛਲੇ ਦਿਨੀਂ ਇਸੇ ਤਰ੍ਹਾਂ ਦੀਆਂ ਕਾਰਵਾਈਆਂ ਦੀਆਂ ਰਿਪੋਰਟਾਂ ਤੋਂ ਬਾਅਦ ਖੇਤਰ ਵਿੱਚ ਚੀਨੀ ਫੌਜੀ ਸਰਗਰਮੀਆਂ ਵਧਣ ਦਾ ਇਹ ਸੰਕੇਤ ਹੈ। ਸ਼ੁੱਕਰਵਾਰ ਨੂੰ, ਤਾਈਵਾਨ ਦੇ MND ਨੇ ਪੰਜ ਚੀਨੀ ਜਹਾਜ਼ਾਂ ਅਤੇ ਪੰਜ ਜਲ ਸੈਨਾ ਦੇ ਜਹਾਜ਼ਾਂ ਦੀ ਮੌਜੂਦਗੀ ਦੀ ਸੂਚਨਾ ਦਿੱਤੀ। ਅਤੇ ਵੀਰਵਾਰ ਨੂੰ, ਪੰਜ PLAN ਜਹਾਜ਼ ਵੀ ਟਾਪੂ ਦੇ ਨੇੜੇ ਕੰਮ ਕਰਦੇ ਦੇਖੇ ਗਏ ਸਨ। ਤਾਈਵਾਨ ਸਟ੍ਰੇਟ ਭੂ-ਰਾਜਨੀਤਿਕ ਤਣਾਅ ਦਾ ਕੇਂਦਰ ਬਿੰਦੂ ਬਣਿਆ ਹੋਇਆ ਹੈ। ਤਾਇਵਾਨ ਦੇ ਨਜ਼ਦੀਕੀ ਗੁਆਂਢੀ ਅਤੇ ਮੁੱਖ ਸਹਿਯੋਗੀ ਜਾਪਾਨ ਨੇ ਖੇਤਰ ਵਿੱਚ ਵਧਦੀਆਂ ਫੌਜੀ ਗਤੀਵਿਧੀਆਂ ‘ਤੇ ਚਿੰਤਾ ਜ਼ਾਹਰ ਕੀਤੀ ਹੈ। ਜਾਪਾਨ ਦੇ ਵਿਦੇਸ਼ ਮੰਤਰੀ ਇਵਾਯਾ ਤਾਕੇਸ਼ੀ ਨੇ ਬੁੱਧਵਾਰ ਨੂੰ ਆਪਣੇ ਚੀਨੀ ਹਮਰੁਤਬਾ ਵੈਂਗ ਯੀ ਨਾਲ ਮੁਲਾਕਾਤ ਵਿੱਚ ਤਾਈਵਾਨ Strait ਵਿੱਚ ਸ਼ਾਂਤੀ ਅਤੇ ਸਥਿਰਤਾ ਦੀ ਮਹੱਤਤਾ ਨੂੰ ਦੁਹਰਾਇਆ ਅਤੇ ਨਾਲ ਹੀ ਖੇਤਰੀ ਅਤੇ ਵਿਸ਼ਵ ਸੁਰੱਖਿਆ ਵਿੱਚ ਇਸਦੀ ਮਹੱਤਵਪੂਰਣ ਭੂਮਿਕਾ ‘ਤੇ ਜ਼ੋਰ ਦਿੱਤਾ।

ਚੀਨ ਤਾਈਵਾਨ ‘ਤੇ ਦਾਅਵਾ
ਤਾਇਵਾਨ ਵਿੱਚ ਇਸ ਸਮੇਂ ਲੋਕਤੰਤਰ ਬਹਾਲ ਹੈ, ਚੀਨ ਲੰਬੇ ਸਮੇਂ ਤੋਂ ਇਸ ਸ਼ਾਂਤੀਪੂਰਨ ਦੇਸ਼ ਉੱਤੇ ਆਪਣਾ ਦਾਅਵਾ ਕਰਦਾ ਆ ਰਿਹਾ ਹੈ। ਜਦੋਂ ਕਿ ਤਾਈਵਾਨ ਸਰਕਾਰ ਚੀਨ ਦੇ ਇਸ ਦਾਅਵੇ ਨੂੰ ਖਾਰਿਜ ਕਰਦੀ ਰਹੀ ਹੈ। ਚੀਨ ਤਾਇਵਾਨ ਨੂੰ ਆਪਣੇ ਅਧੀਨ ਲਿਆ ਕੇ ਉਸ ਉੱਤੇ ਰਾਜ ਕਰਨਾ ਚਾਹੁੰਦਾ ਹੈ। ਇਸ ਦੇ ਨਾਲ ਹੀ ਤਾਇਵਾਨ ਆਪਣੇ ਆਪ ਨੂੰ ਮਜ਼ਬੂਤ ​​ਕਰਨ ਲਈ ਅਮਰੀਕਾ ਤੋਂ ਹਥਿਆਰਾਂ ਦੀ ਮਦਦ ਲੈਂਦਾ ਹੈ। ਤਾਈਵਾਨ ਦਾ ਮਕਸਦ ਚੀਨ ਦੇ ਹਮਲੇ ਤੋਂ ਖੁਦ ਨੂੰ ਬਚਾਉਣਾ ਹੈ। ਜ਼ਿਕਰਯੋਗ ਹੈ ਕਿ ਚੀਨ ਤਾਇਵਾਨ ਨੂੰ ਆਪਣੇ ਤੋਂ ਵੱਖ ਕੀਤਾ ਸੂਬਾ ਮੰਨਦਾ ਹੈ। ਚੀਨ ਇਹ ਵੀ ਕਹਿੰਦਾ ਹੈ ਕਿ ਇੱਕ ਦਿਨ ਉਹ ਤਾਇਵਾਨ ਨੂੰ ਚੀਨ ਵਿੱਚ ਮਿਲਾ ਦੇਵੇਗਾ, ਤਾਇਵਾਨ ਨੂੰ ਇੱਕ ਦਿਨ ਚੀਨ ਦੇ ਅਧੀਨ ਆਉਣਾ ਹੀ ਪਵੇਗਾ। ਪਰ ਤਾਈਵਾਨ ਚੀਨ ਦੀ ਇਸ ਦਲੀਲ ਨਾਲ ਸਹਿਮਤ ਨਹੀਂ ਹੈ ਅਤੇ ਆਪਣੇ ਆਪ ਨੂੰ ਇੱਕ ਵੱਖਰੇ ਅਤੇ ਸੁਤੰਤਰ ਦੇਸ਼ ਵਜੋਂ ਦੇਖਦਾ ਹੈ।