BSNL ਨੇ ਲਾਂਚ ਕੀਤੀ ਭਾਰਤ ਦੀ ਪਹਿਲੀ Satellite-to-Device ਸਰਵਿਸ, ਬਿਨਾਂ ਨੈੱਟਵਰਕ ਦੇ ਕਾਲਿੰਗ, UPI ਭੁਗਤਾਨ ਹੋਵੇਗਾ ਮੁਮਕਿਨ
ਭਾਰਤ ਸੰਚਾਰ ਨਿਗਮ ਲਿਮਿਟੇਡ (BSNL) ਨੇ ਭਾਰਤ ਵਿੱਚ ਪਹਿਲੀ “ਸੈਟੇਲਾਈਟ-ਟੂ-ਡਿਵਾਈਸ” ਸਰਵਿਸ ਸ਼ੁਰੂ ਕੀਤੀ ਹੈ, ਜੋ ਦੇਸ਼ ਦੇ ਸਭ ਤੋਂ ਰਿਮੋਟ ਖੇਤਰਾਂ ਵਿੱਚ ਵੀ ਕਨੈਕਟੀਵਿਟੀ ਪ੍ਰਦਾਨ ਕਰੇਗੀ। ਦੂਰਸੰਚਾਰ ਵਿਭਾਗ (DoT) ਨੇ ਬੁੱਧਵਾਰ ਨੂੰ ਇਸ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਇਹ ਸੇਵਾ ਅਮਰੀਕੀ ਕੰਪਨੀ Viasat ਦੇ ਸਹਿਯੋਗ ਨਾਲ ਸ਼ੁਰੂ ਕੀਤੀ ਗਈ ਹੈ। ਇਸ ਨਵੀਂ ਤਕਨੀਕ ਦਾ ਉਦੇਸ਼ ਉਨ੍ਹਾਂ ਖੇਤਰਾਂ ਵਿੱਚ ਕੁਨੈਕਟੀਵਿਟੀ ਪ੍ਰਦਾਨ ਕਰਨਾ ਹੈ ਜਿੱਥੇ ਆਮ ਮੋਬਾਈਲ ਨੈੱਟਵਰਕ ਨਹੀਂ ਪਹੁੰਚਦੇ। ਤੁਹਾਨੂੰ ਦੱਸ ਦੇਈਏ ਕਿ ਅੱਜ ਵੀ ਭਾਰਤ ਵਿੱਚ ਕਈ ਅਜਿਹੇ ਖੇਤਰ ਹਨ ਜਿੱਥੇ ਜੀਓ, ਏਅਰਟੈੱਲ, ਵੋਡਾਫੋਨ-ਆਈਡੀਆ ਸਮੇਤ ਕਿਸੇ ਵੀ ਟੈਲੀਕਾਮ ਕੰਪਨੀ ਦਾ ਨੈੱਟਵਰਕ ਨਹੀਂ ਪਹੁੰਚ ਸਕਿਆ ਹੈ, ਜਿਸ ਕਾਰਨ ਉੱਥੇ ਰਹਿਣ ਵਾਲੇ ਲੋਕ ਟੈਲੀਕਾਮ ਕੁਨੈਕਸ਼ਨ ਦਾ ਫਾਇਦਾ ਨਹੀਂ ਉਠਾ ਪਾ ਰਹੇ ਹਨ।
ਇਹ ਖਾਸ ਕਰਕੇ ਪਹਾੜੀ ਅਤੇ ਜੰਗਲੀ ਖੇਤਰਾਂ ਵਿੱਚ ਵਾਪਰਦਾ ਹੈ। ਲੋਕਾਂ ਦੀ ਇਸ ਸਮੱਸਿਆ ਨੂੰ ਦੂਰ ਕਰਨ ਲਈ BSNL ਨੇ ਭਾਰਤ ਵਿੱਚ ਪਹਿਲੀ ਵਾਰ ਸੈਟੇਲਾਈਟ-ਟੂ-ਡਿਵਾਈਸ ਸਰਵਿਸ ਸ਼ੁਰੂ ਕੀਤੀ ਹੈ, ਜਿਸ ਰਾਹੀਂ ਲੋਕ ਬਿਨਾਂ ਫ਼ੋਨ ਨੈੱਟਵਰਕ ਦੇ ਵੀ ਟੈਲੀਕਾਮ ਕਨੈਕਟੀਵਿਟੀ ਦੀ ਵਰਤੋਂ ਕਰ ਸਕਣਗੇ।
ਇਹ ਸੇਵਾ ਪਹਿਲੀ ਵਾਰ ਇੰਡੀਆ ਮੋਬਾਈਲ ਕਾਂਗਰਸ (IMC 2024) ਵਿੱਚ ਪੇਸ਼ ਕੀਤੀ ਗਈ ਸੀ। ਇਸ ਨੂੰ ਭਾਰਤ ਵਿੱਚ ਡਿਜੀਟਲ ਵੰਡ ਨੂੰ ਘੱਟ ਕਰਨ ਦੀ ਦਿਸ਼ਾ ਵਿੱਚ ਇੱਕ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ। BSNL ਦੇ ਅਨੁਸਾਰ, “ਸੈਟੇਲਾਈਟ-ਟੂ-ਡਿਵਾਈਸ” ਸੇਵਾ ਦੀ ਟੈਸਟਿੰਗ ਪੂਰੀ ਹੋ ਗਈ ਹੈ, ਅਤੇ ਇਹ ਕਈ ਤਰ੍ਹਾਂ ਦੇ ਚੁਣੌਤੀਪੂਰਨ ਖੇਤਰਾਂ ਵਿੱਚ ਵੀ ਸਥਿਰ ਕਨੈਕਸ਼ਨ ਪ੍ਰਦਾਨ ਕਰਨ ਵਿੱਚ ਸਮਰੱਥ ਹੈ। DoT ਨੇ ਇਸ ਦਾ ਐਲਾਨ ਕੀਤਾ ਹੈ ਹਾਲ ਹੀ ਵਿੱਚ, ਕੁਝ ਮੋਬਾਈਲ ਬ੍ਰਾਂਡਾਂ ਨੇ ਐਮਰਜੈਂਸੀ ਦੀ ਸਥਿਤੀ ਵਿੱਚ ਸੈਟੇਲਾਈਟ ਕਨੈਕਟੀਵਿਟੀ ਪ੍ਰਦਾਨ ਕਰਨ ਵਾਲੇ ਫੀਚਰ ਲਾਂਚ ਕੀਤੇ ਸਨ, ਪਰ ਉਹ ਸਿਰਫ ਐਮਰਜੈਂਸੀ ਸੇਵਾਵਾਂ ਤੱਕ ਹੀ ਸੀਮਿਤ ਹਨ। ਹੁਣ ਆਮ ਨਾਗਰਿਕ ਵੀ ਦੂਰ-ਦੁਰਾਡੇ ਦੇ ਖੇਤਰਾਂ ਵਿੱਚ ਬੀਐਸਐਨਐਲ ਦੀ ਇਸ ਸੇਵਾ ਨਾਲ ਜੁੜ ਸਕਦੇ ਹਨ।
BSNL ਦਾ ਇਹ ਸੈਟੇਲਾਈਟ ਨੈੱਟਵਰਕ ਐਮਰਜੈਂਸੀ ਕਾਲਾਂ, SOS ਮੈਸੇਜ ਅਤੇ ਇੱਥੋਂ ਤੱਕ ਕਿ UPI ਭੁਗਤਾਨਾਂ ਵਿੱਚ ਵੀ ਮਦਦ ਕਰੇਗਾ। ਹਾਲਾਂਕਿ, ਕੰਪਨੀ ਨੇ ਇਹ ਸਪੱਸ਼ਟ ਨਹੀਂ ਕੀਤਾ ਹੈ ਕਿ ਇਹ ਵਿਸ਼ੇਸ਼ਤਾ ਆਮ ਕਾਲਾਂ ਅਤੇ SMS ਲਈ ਉਪਲਬਧ ਹੋਵੇਗੀ ਜਾਂ ਨਹੀਂ। BSNL ਦੀ ਭਾਈਵਾਲ ਕੰਪਨੀ Viasat ਨੇ ਕਿਹਾ ਕਿ ਧਰਤੀ ਤੋਂ 36,000 ਕਿਲੋਮੀਟਰ ਦੀ ਉਚਾਈ ‘ਤੇ ਸਥਿਤ ਜੀਓਸਟੇਸ਼ਨਰੀ ਐਲ-ਬੈਂਡ ਸੈਟੇਲਾਈਟ ਰਾਹੀਂ ਇਹ ਸਰਵਿਸ ਮੁਮਕਿਨ ਹੋ ਰਹੀ ਹੈ।
