8 ਦਿਨਾਂ ਬਾਅਦ ਬੰਦ ਹੋ ਜਾਵੇਗੀ ਇਹ ਸਰਕਾਰੀ ਸਕੀਮ, 7.5 ਫੀਸਦੀ ਵਿਆਜ ਲੈਣਾ ਹੈ ਤਾਂ ਅੱਜ ਹੀ ਲਗਾ ਦਿਓ ਪੈਸਾ
ਕੇਂਦਰ ਸਰਕਾਰ ਵੱਲੋਂ ਔਰਤਾਂ ਅਤੇ ਲੜਕੀਆਂ ਲਈ ਸਾਲ 2023 ਵਿੱਚ ਸ਼ੁਰੂ ਕੀਤੀ ਗਈ ਮਹਿਲਾ ਸਨਮਾਨ ਬੱਚਤ ਸਰਟੀਫਿਕੇਟ ਸਕੀਮ (Mahila Samman Savings Certificate) 31 ਮਾਰਚ ਨੂੰ ਬੰਦ ਹੋ ਜਾਵੇਗੀ। ਅਪ੍ਰੈਲ 2023 ਵਿੱਚ ਸ਼ੁਰੂ ਕੀਤੀ ਗਈ ਇਸ ਯੋਜਨਾ ਦਾ ਉਦੇਸ਼ ਔਰਤਾਂ ਵਿੱਚ ਬੱਚਤ ਦੀ ਆਦਤ ਨੂੰ ਉਤਸ਼ਾਹਿਤ ਕਰਨਾ ਅਤੇ ਉਨ੍ਹਾਂ ਨੂੰ ਵਿੱਤੀ ਤੌਰ ‘ਤੇ ਸਸ਼ਕਤ ਕਰਨਾ ਹੈ।
ਇਸ ਯੋਜਨਾ ਨੂੰ ਲੈ ਕੇ ਔਰਤਾਂ ‘ਚ ਚੰਗਾ ਉਤਸ਼ਾਹ ਦੇਖਿਆ ਗਿਆ ਅਤੇ ਉਨ੍ਹਾਂ ਨੇ ਇਸ ਵਿਚ ਕਾਫੀ ਪੈਸਾ ਲਗਾਇਆ। ਮਹਿਲਾ ਸਨਮਾਨ ਬੱਚਤ ਸਰਟੀਫਿਕੇਟ ਸਕੀਮ ਦੀ ਮਿਆਦ ਦੋ ਸਾਲ ਹੈ ਅਤੇ ਇਸ ਵਿੱਚ 7.5 ਫੀਸਦੀ ਵਿਆਜ ਦਿੱਤਾ ਜਾ ਰਿਹਾ ਹੈ। ਜੇਕਰ ਤੁਸੀਂ 2 ਲੱਖ ਰੁਪਏ ਦਾ ਨਿਵੇਸ਼ ਕਰਦੇ ਹੋ, ਤਾਂ ਤੁਹਾਨੂੰ 2 ਸਾਲਾਂ ਬਾਅਦ ਤਿਮਾਹੀ 7.5% ਮਿਸ਼ਰਿਤ ਵਿਆਜ ਦੇ ਨਾਲ ਲਗਭਗ 2,32,000 ਰੁਪਏ ਮਿਲਣਗੇ।
ਇਸ ਸਕੀਮ ਤਹਿਤ ਔਰਤਾਂ ਆਪਣੇ ਲਈ ਖਾਤਾ ਖੋਲ੍ਹ ਸਕਦੀਆਂ ਹਨ। ਇਸ ਤੋਂ ਇਲਾਵਾ ਮਾਪੇ ਆਪਣੀ ਨਾਬਾਲਗ ਬੇਟੀ ਦੇ ਨਾਂ ‘ਤੇ ਮਹਿਲਾ ਸਨਮਾਨ ਬੱਚਤ ਸਰਟੀਫਿਕੇਟ ‘ਚ ਵੀ ਨਿਵੇਸ਼ ਕਰ ਸਕਦੇ ਹਨ। ਮਤਲਬ ਕਿ ਨਾਬਾਲਗ ਲੜਕੀ ਦੇ ਨਾਂ ‘ਤੇ ਵੀ ਨਿਵੇਸ਼ ਕੀਤਾ ਜਾ ਸਕਦਾ ਹੈ। ਮਹਿਲਾ ਸਨਮਾਨ ਬੱਚਤ ਸਰਟੀਫਿਕੇਟ ਵਿੱਚ ਘੱਟੋ-ਘੱਟ 1000 ਰੁਪਏ, ਵੱਧ ਤੋਂ ਵੱਧ 2 ਲੱਖ ਰੁਪਏ ਤੱਕ ਦਾ ਨਿਵੇਸ਼ ਕੀਤਾ ਜਾ ਸਕਦਾ ਹੈ।
Premature withdrawal
ਹਾਲਾਂਕਿ ਮਹਿਲਾ ਸਨਮਾਨ ਬੱਚਤ ਸਰਟੀਫਿਕੇਟ ਸਕੀਮ ਪੂਰੀ ਹੋਣ ਦੀ ਮਿਆਦ ਦੋ ਸਾਲ ਹੈ, ਪਰ ਕੁਝ ਖਾਸ ਸਥਿਤੀਆਂ ਵਿੱਚ ਇਹ ਖਾਤਾ ਖੋਲ੍ਹਣ ਦੇ 6 ਮਹੀਨਿਆਂ ਬਾਅਦ ਹੀ ਪੈਸੇ ਕਢਵਾਏ ਜਾ ਸਕਦੇ ਹਨ। ਹਾਲਾਂਕਿ, ਜੇਕਰ ਤੁਸੀਂ ਅਜਿਹਾ ਕਰਦੇ ਹੋ, ਤਾਂ ਤੁਹਾਨੂੰ 7.5% ਦੀ ਬਜਾਏ ਸਿਰਫ 5.5% ਵਿਆਜ ਮਿਲੇਗਾ। ਇਹ ਵਿਆਜ ਮੂਲ ਰਕਮ ‘ਤੇ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ 1 ਸਾਲ ਬਾਅਦ 40% ਰਕਮ ਕਢਵਾਈ ਜਾ ਸਕਦੀ ਹੈ। ਗੰਭੀਰ ਬਿਮਾਰੀ ਜਾਂ ਖਾਤਾ ਧਾਰਕ ਦੀ ਮੌਤ ਵਰਗੀ ਐਮਰਜੈਂਸੀ ਦੀ ਸਥਿਤੀ ਵਿੱਚ ਪੂਰੀ ਨਿਕਾਸੀ ਸੰਭਵ ਹੈ। ਇੱਕ ਔਰਤ ਕਈ ਖਾਤੇ ਖੋਲ੍ਹ ਸਕਦੀ ਹੈ, ਪਰ ਸਾਰੇ ਖਾਤਿਆਂ ਵਿੱਚ ਜਮ੍ਹਾਂ ਰਕਮ 2 ਲੱਖ ਰੁਪਏ ਤੋਂ ਵੱਧ ਨਹੀਂ ਹੋਣੀ ਚਾਹੀਦੀ।
ਖਾਤਾ ਕਿੱਥੇ ਖੋਲ੍ਹਿਆ ਜਾਵੇਗਾ
ਤੁਸੀਂ ਪੋਸਟ ਆਫਿਸ ਜਾਂ ਬੈਂਕ ਵਿੱਚ ਮਹਿਲਾ ਸਨਮਾਨ ਬਚਤ ਸਰਟੀਫਿਕੇਟ ਖਾਤਾ ਖੋਲ੍ਹ ਸਕਦੇ ਹੋ। ਖਾਤਾ ਖੋਲ੍ਹਣ ਲਈ ਆਧਾਰ ਕਾਰਡ, ਪੈਨ ਕਾਰਡ, ਪਤੇ ਦਾ ਸਬੂਤ ਅਤੇ ਪਾਸਪੋਰਟ ਸਾਈਜ਼ ਫੋਟੋ ਦੀ ਲੋੜ ਹੁੰਦੀ ਹੈ। ਨਾਬਾਲਗ ਲੜਕੀ ਦਾ ਖਾਤਾ ਖੋਲ੍ਹਣ ਲਈ ਸਰਪ੍ਰਸਤ ਦੇ ਦਸਤਾਵੇਜ਼ ਵੀ ਜ਼ਰੂਰੀ ਹਨ। ਇਸ ਸਕੀਮ ਵਿੱਚ ਨਿਵੇਸ਼ ‘ਤੇ ਕੋਈ ਟੈਕਸ ਲਾਭ ਨਹੀਂ ਹੈ। ਤੁਹਾਨੂੰ ਇਨਕਮ ਟੈਕਸ ਨਿਯਮਾਂ ਅਨੁਸਾਰ ਵਿਆਜ ਦੀ ਆਮਦਨ ‘ਤੇ ਟੈਕਸ ਦੇਣਾ ਪੈ ਸਕਦਾ ਹੈ।
