ਸਮੋਸੇ ਅਤੇ ਕੇਕ ਨਾਲ ਜੁੜੇ ਮਾਮਲੇ ਨੇ ਇੱਕ ਨਵੇਂ ਵਿਵਾਦ ਨੂੰ ਜਨਮ ਦੇ ਦਿੱਤਾ ਹੈ। ਮਾਮਲਾ ਇਸ ਹੱਦ ਤੱਕ ਵਧ ਗਿਆ ਕਿ ਸੀਆਈਡੀ ਜਾਂਚ ਤੱਕ ਕਰਵਾਉਣੀ ਪਈ। ਜਾਂਚ ਰਿਪੋਰਟ ਵਿੱਚ ਇਸ ਘਟਨਾ ਨੂੰ ਸਰਕਾਰ ਵਿਰੋਧੀ ਕਾਰਵਾਈ ਕਰਾਰ ਦਿੱਤਾ ਗਿਆ ਹੈ।
ਹੋਇਆ ਇਹ ਕਿ ਹਿਮਾਚਲ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਲਈ ਆਰਡਰ ਕੀਤੇ ਗਏ ਸਮੋਸੇ ਅਤੇ ਕੇਕ ਗਲਤੀ ਨਾਲ ਉਨ੍ਹਾਂ ਦੇ ਸੁਰੱਖਿਆ ਕਰਮਚਾਰੀਆਂ ਨੂੰ ਪਰੋਸ ਦਿੱਤੇ ਗਏ, ਜਿਸ ਨਾਲ ਵਿਵਾਦ ਖੜ੍ਹਾ ਹੋ ਗਿਆ। ਜਦੋਂ ਮਾਮਲੇ ਨੇ ਜ਼ੋਰ ਫੜਿਆ ਤਾਂ ਸੀਆਈਡੀ ਜਾਂਚ ਦੀ ਲੋੜ ਪੈ ਗਈ। 21 ਅਕਤੂਬਰ ਦੀ ਘਟਨਾ ‘ਤੇ ਟਿੱਪਣੀ ਕਰਦਿਆਂ, ਸੀਆਈਡੀ ਦੇ ਇੱਕ ਉੱਚ ਅਧਿਕਾਰੀ ਨੇ ਕਿਹਾ, “ਜਦੋਂ ਮੁੱਖ ਮੰਤਰੀ ਸੁੱਖੂ ਸੀਆਈਡੀ ਹੈੱਡਕੁਆਰਟਰ ਦੇ ਦੌਰੇ ‘ਤੇ ਸਨ, ਤਾਂ ਜ਼ਿੰਮੇਵਾਰ ਲੋਕਾਂ ਨੇ ਆਪਣੇ ਏਜੰਡੇ ਅਨੁਸਾਰ ਕੰਮ ਕੀਤਾ।”
ਅਫਸਰ ਨੇ S.I. ਨੂੰ ਕਿਹਾ- S.I. ਨੇ ASI ਨੂੰ ਭੇਜ ਦਿੱਤਾ
ਮੁੱਖ ਮੰਤਰੀ 21 ਅਕਤੂਬਰ ਨੂੰ ਕ੍ਰਾਈਮ ਇਨਵੈਸਟੀਗੇਸ਼ਨ ਵਿਭਾਗ ਯਾਨੀ ਸੀਆਈਡੀ ਹੈੱਡਕੁਆਰਟਰ ਵਿਖੇ ਆਯੋਜਿਤ ਸਮਾਗਮ ਵਿੱਚ ਸ਼ਾਮਲ ਹੋਣ ਲਈ ਗਏ ਸਨ ਅਤੇ ਉਨ੍ਹਾਂ ਦੇ ਨਾਸ਼ਤੇ ਲਈ ਲੱਕੜ ਬਾਜ਼ਾਰ ਸਥਿਤ ਹੋਟਲ ਰੈਡੀਸਨ ਬਲੂ ਤੋਂ 3 ਡੱਬੇ ਸਮੋਸੇ ਅਤੇ ਕੇਕ ਮੰਗਵਾਏ ਗਏ ਸਨ।
ਡਿਪਟੀ ਸੁਪਰਡੈਂਟ ਆਫ ਪੁਲਿਸ (ਡਿਪਟੀ ਐਸ.ਪੀ) ਪੱਧਰ ਦੇ ਅਧਿਕਾਰੀ ਵੱਲੋਂ ਕੀਤੀ ਗਈ ਸਮੁੱਚੇ ਮਾਮਲੇ ਦੀ ਜਾਂਚ ਦੀ ਰਿਪੋਰਟ ਅਨੁਸਾਰ ਤਾਲਮੇਲ ਦੀ ਘਾਟ ਕਾਰਨ ਮੁੱਖ ਮੰਤਰੀ ਸੁੱਖੂ ਦੇ ਸੁਰੱਖਿਆ ਅਮਲੇ ਨੂੰ ਖਾਣ-ਪੀਣ ਦੀਆਂ ਵਸਤੂਆਂ ਪਰੋਸ ਦਿੱਤੀਆਂ ਗਈਆਂ। ਰਿਪੋਰਟ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਇੱਕ ਇੰਸਪੈਕਟਰ ਜਨਰਲ ਰੈਂਕ ਦੇ ਅਧਿਕਾਰੀ ਨੇ ਪੁਲਿਸ ਦੇ ਇੱਕ ਸਬ-ਇੰਸਪੈਕਟਰ (ਐਸਆਈ) ਨੂੰ ਮੁੱਖ ਮੰਤਰੀ ਦੇ ਦੌਰੇ ਲਈ ਹੋਟਲ ਤੋਂ ਕੁਝ ਖਾਣ ਪੀਣ ਦੀਆਂ ਚੀਜ਼ਾਂ ਲਿਆਉਣ ਲਈ ਕਿਹਾ ਸੀ। ਸਬ-ਇੰਸਪੈਕਟਰ ਨੇ ਖੁਦ ਜਾਣ ਦੀ ਬਜਾਏ ਇੱਕ ਸਹਾਇਕ ਸਬ-ਇੰਸਪੈਕਟਰ (ਏ.ਐੱਸ.ਆਈ.) ਅਤੇ ਇੱਕ ਹੈੱਡ ਕਾਂਸਟੇਬਲ ਨੂੰ ਖਾਣ-ਪੀਣ ਦਾ ਸਮਾਨ ਲਿਆਉਣ ਲਈ ਭੇਜ ਦਿੱਤਾ।
ਕਿਵੇਂ ਹੋਈ ਉਲਝਣ ?
ਏਐਸਆਈ ਅਤੇ ਹੈੱਡ ਕਾਂਸਟੇਬਲ ਹੋਟਲ ਵਿੱਚੋਂ 3 ਸੀਲਬੰਦ ਬਕਸਿਆਂ ਵਿੱਚ ਰਿਫਰੈਸ਼ਮੈਂਟ ਲੈ ਕੇ ਆਏ ਅਤੇ ਸਬੰਧਤ ਐਸਆਈ ਨੂੰ ਸੂਚਿਤ ਕੀਤਾ। ਜਾਂਚ ਦੌਰਾਨ ਪੁਲਸ ਅਧਿਕਾਰੀਆਂ ਨੇ ਆਪਣੇ ਬਿਆਨ ਵਿੱਚ ਦੱਸਿਆ ਕਿ ਜਦੋਂ ਉਨ੍ਹਾਂ ਨੇ ਡਿਊਟੀ ‘ਤੇ ਸੈਰ ਸਪਾਟਾ ਵਿਭਾਗ ਦੇ ਲੋਕਾਂ ਨੂੰ ਪੁੱਛਿਆ ਕਿ ਕੀ ਤਿੰਨ ਡੱਬਿਆਂ ਵਿੱਚ ਰੱਖੇ ਸਨੈਕਸ ਨੂੰ ਮੁੱਖ ਮੰਤਰੀ ਸੁੱਖੂ ਨੂੰ ਪਰੋਸਿਆ ਜਾਣਾ ਹੈ? ਤਾਂ ਉਨ੍ਹਾਂ ਦੱਸਿਆ ਕਿ ਇਹ ਚੀਜ਼ਾਂ ਮੇਨੂ ਵਿੱਚ ਸ਼ਾਮਲ ਨਹੀਂ ਸਨ। ਇਸ ਕਾਰਨ ਉਥੇ ਭੰਬਲਭੂਸੇ ਦੀ ਸਥਿਤੀ ਪੈਦਾ ਹੋ ਗਈ।
ਜਾਂਚ ਰਿਪੋਰਟ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਸਬੰਧਤ ਐਸਆਈ, ਜਿਸ ਨੇ ਏਐਸਆਈ ਅਤੇ ਹੈੱਡ ਕਾਂਸਟੇਬਲ ਨੂੰ ਹੋਟਲ ਤੋਂ ਨਾਸ਼ਤਾ ਲਿਆਉਣ ਦਾ ਕੰਮ ਸੌਂਪਿਆ ਸੀ, ਨੂੰ ਪਤਾ ਸੀ ਕਿ ਸੀਐਮ ਸੁੱਖੂ ਲਈ ਤਿੰਨ ਡੱਬੇ ਮੰਗਵਾਏ ਗਏ ਸਨ।
ਜਾਂਚ ਰਿਪੋਰਟ ‘ਚ ਕੀ?
ਇਸ ਦੌਰਾਨ ਹੋਟਲ ਤੋਂ ਲਿਆਂਦੇ ਖਾਣ-ਪੀਣ ਦੀਆਂ ਵਸਤੂਆਂ ਨੂੰ ਸੌਂਪਣ ਵਾਲੀ ਮਹਿਲਾ ਇੰਸਪੈਕਟਰ ਨੇ ਬਿਨਾਂ ਕਿਸੇ ਸੀਨੀਅਰ ਅਧਿਕਾਰੀ ਨੂੰ ਦੱਸੇ ਰਿਫਰੈਸ਼ਮੈਂਟ ਮਕੈਨੀਕਲ ਟਰਾਂਸਪੋਰਟ (ਐਮ.ਟੀ.) ਵਿਭਾਗ ਨੂੰ ਭੇਜ ਦਿੱਤੀ, ਜੋ ਰਿਫਰੈਸ਼ਮੈਂਟ ਨਾਲ ਸਬੰਧਤ ਕੰਮ ਦੇਖਦਾ ਹੈ। ਇਸ ਦੌਰਾਨ ਰਿਫਰੈਸ਼ਮੈਂਟ ਦੇ 3 ਡੱਬਿਆਂ ਦਾ ਕਈ ਲੋਕਾਂ ਨਾਲ ਹੱਥ ਵਟਿਆ।
ਖਾਸ ਗੱਲ ਇਹ ਹੈ ਕਿ ਸੀਆਈਡੀ ਵਿਭਾਗ ਦੇ ਇੱਕ ਉੱਚ ਅਧਿਕਾਰੀ (ਡਿਪਟੀ ਐਸਪੀ ਰੈਂਕ) ਨੇ ਜਾਂਚ ਤੋਂ ਬਾਅਦ ਆਪਣੇ ਨੋਟ ਵਿੱਚ ਲਿਖਿਆ ਹੈ ਕਿ ਜਾਂਚ ਰਿਪੋਰਟ ਵਿੱਚ ਦਰਜ ਸਾਰੇ ਵਿਅਕਤੀਆਂ ਨੇ ਸੀਆਈਡੀ ਵਿਰੋਧੀ ਅਤੇ ਸਰਕਾਰ ਵਿਰੋਧੀ ਤਰੀਕੇ ਨਾਲ ਕੰਮ ਕੀਤਾ ਹੈ। ਇਸ ਕਾਰਨ ਇਹ ਖਾਣ-ਪੀਣ ਵਾਲੀਆਂ ਵਸਤੂਆਂ ਵੀ.ਆਈ.ਪੀਜ਼ ਨੂੰ ਨਹੀਂ ਦਿੱਤੀਆਂ ਜਾ ਸਕੀਆਂ। ਇਹ ਵੀ ਕਿਹਾ ਗਿਆ ਕਿ ਉਨ੍ਹਾਂ ਨੇ ਆਪਣੇ ਏਜੰਡੇ ਅਨੁਸਾਰ ਕੰਮ ਕੀਤਾ।
