ਦਿੱਲੀ-ਗੁਰੂਗ੍ਰਾਮ ਐਕਸਪ੍ਰੈਸ ਵੇਅ ‘ਤੇ ਨਹੀਂ ਲੱਗੇਗਾ ਜਾਮ, ਹਰਿਆਣਾ ਤੇ ਕੇਂਦਰ ਸਰਕਾਰ ਮਿਲ ਕੇ ਬਣਾ ਰਹੀ ਹੈ ਤਕੜਾ ਪਲਾਨ

ਦਿੱਲੀ-ਗੁਰੂਗ੍ਰਾਮ ਐਕਸਪ੍ਰੈਸਵੇਅ ‘ਤੇ ਟ੍ਰੈਫਿਕ ਜਾਮ ਇੱਕ ਆਮ ਗੱਲ ਹੈ। ਖਾਸ ਕਰਕੇ ਸਵੇਰ ਅਤੇ ਸ਼ਾਮ ਦੇ ਪੀਕ ਘੰਟਿਆਂ ਦੌਰਾਨ। ਹੁਣ ਹਰਿਆਣਾ ਅਤੇ ਕੇਂਦਰ ਸਰਕਾਰ ਨੇ ਇਸ ਜਾਮ ਤੋਂ ਛੁਟਕਾਰਾ ਦਿਵਾਉਣ ਲਈ ਯਤਨ ਤੇਜ਼ ਕਰ ਦਿੱਤੇ ਹਨ। ਇਸ ਦੇ ਲਈ ਨੈਲਸਨ ਮੰਡੇਲਾ ਮਾਰਗ-ਐਮਜੀ ਰੋਡ ਲਿੰਕ ਦੇ 3 ਕਿਲੋਮੀਟਰ ਲੰਬੇ ਹਿੱਸੇ ਸ਼ੁਰੂ ਕਰਨ, ਐਮਜੀ ਰੋਡ ਤੋਂ ਗੁਰੂਗ੍ਰਾਮ-ਫਰੀਦਾਬਾਦ ਰੋਡ (5.5 ਕਿਲੋਮੀਟਰ) ਤੱਕ ਬਾਈਪਾਸ ਬਣਾਉਣ ਅਤੇ ਧਨਚਿਰੀ ਕੈਂਪ ਤੋਂ ਐਮਜੀ ਰੋਡ (8.3 ਕਿਲੋਮੀਟਰ) ਤੱਕ ਬਾਈਪਾਸ ਬਣਾਉਣ ‘ਤੇ ਚਰਚਾ ਕੀਤੀ ਗਈ ਹੈ। ਹਾਲ ਹੀ ਵਿੱਚ ਕੇਂਦਰੀ ਸੜਕੀ ਆਵਾਜਾਈ ਮੰਤਰੀ ਨਿਤਿਨ ਗਡਕਰੀ ਅਤੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਦਰਮਿਆਨ ਹੋਈ ਮੀਟਿੰਗ ਵਿੱਚ ਇਨ੍ਹਾਂ ਤਿੰਨਾਂ ਪ੍ਰਾਜੈਕਟਾਂ ਬਾਰੇ ਗੰਭੀਰ ਵਿਚਾਰ-ਵਟਾਂਦਰਾ ਕੀਤਾ ਗਿਆ।

ਜੇਕਰ ਨੈਲਸਨ ਮੰਡੇਲਾ ਮਾਰਗ-ਐਮਜੀ ਰੋਡ ਲਿੰਕ ਦਾ 3 ਕਿਲੋਮੀਟਰ ਦਾ ਹਿੱਸਾ ਚਾਲੂ ਹੋ ਜਾਂਦਾ ਹੈ, ਤਾਂ ਇਸ ਨਾਲ ਨਾ ਸਿਰਫ਼ ਦਿੱਲੀ-ਗੁਰੂਗ੍ਰਾਮ ਐਕਸਪ੍ਰੈਸਵੇਅ ਬਲਕਿ ਮਹਿਰੌਲੀ-ਗੁਰੂਗ੍ਰਾਮ ਰੋਡ ‘ਤੇ ਵੀ ਟ੍ਰੈਫਿਕ ਜਾਮ ਘੱਟ ਹੋ ਜਾਵੇਗਾ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਕੇਂਦਰ ਸਰਕਾਰ ਜੇਕਰ ਇਸ ਹਿੱਸੇ ਨੂੰ ਨੈਸ਼ਨਲ ਹਾਈਵੇ (NH) ਐਲਾਨ ਦੇਵੇ ਤਾਂ ਇਸ ਦਾ ਵਿਕਾਸ ਕਰਨਾ ਆਸਾਨ ਹੋ ਜਾਵੇਗਾ। ਭਾਰੀ ਟਰੈਫਿਕ ਦੇ ਮੱਦੇਨਜ਼ਰ ਇਨ੍ਹਾਂ ਤਿੰਨਾਂ ਪ੍ਰਾਜੈਕਟਾਂ ਬਾਰੇ ਜਲਦੀ ਹੀ ਫੈਸਲਾ ਲਿਆ ਜਾ ਸਕਦਾ ਹੈ।

ਐਲੀਵੇਟਿਡ ਰੋਡ ਦਾ ਪ੍ਰਸਤਾਵ…
ਟਾਈਮਜ਼ ਆਫ਼ ਇੰਡੀਆ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਹਰਿਆਣਾ ਸਰਕਾਰ ਨੇ ਨੈਲਸਨ ਮੰਡੇਲਾ ਰੋਡ ਐਕਸਟੈਂਸ਼ਨ ਤੋਂ ਐਮਜੀ ਰੋਡ ਅਤੇ ਗੁਰੂਗ੍ਰਾਮ-ਫਰੀਦਾਬਾਦ ਰੋਡ ਦੇ ਚੌਰਾਹੇ ਤੱਕ ਨਵੀਂ ਕਨੈਕਟੀਵਿਟੀ ਵਿੱਚ ਵਿਸ਼ੇਸ਼ ਦਿਲਚਸਪੀ ਦਿਖਾਈ ਹੈ। ਸਰਕਾਰ ਨੇ ਇਸ 3 ਕਿਲੋਮੀਟਰ ਲੰਬੀ ਸੜਕ ‘ਤੇ ਐਲੀਵੇਟਿਡ ਰੋਡ ਬਣਾਉਣ ਦਾ ਪ੍ਰਸਤਾਵ ਦਿੱਤਾ ਹੈ। ਹਾਲਾਂਕਿ, ਸਿਰਫ ਇੱਕ ਵਿਸਤ੍ਰਿਤ ਅਧਿਐਨ ਹੀ ਇਹ ਫੈਸਲਾ ਕਰੇਗਾ ਕਿ ਇਸਨੂੰ ਉੱਚਾ ਬਣਾਉਣਾ ਉਚਿਤ ਹੋਵੇਗਾ ਜਾਂ ਇੱਕ ਸੁਰੰਗ ਦੇ ਰੂਪ ਵਿੱਚ, ਕਿਉਂਕਿ ਇਹ ਰਿਜ ਖੇਤਰ ਵਿੱਚੋਂ ਲੰਘਦਾ ਹੈ।

ਸ਼ੁਰੂਆਤੀ ਅਨੁਮਾਨਾਂ ਅਨੁਸਾਰ, ਐਮਜੀ ਰੋਡ ਤੋਂ ਗੁਰੂਗ੍ਰਾਮ-ਫਰੀਦਾਬਾਦ ਰੋਡ ਤੱਕ ਐਲੀਵੇਟਿਡ ਲਿੰਕ ਬਣਾਉਣ ‘ਤੇ ਲਗਭਗ 2,000 ਕਰੋੜ ਰੁਪਏ ਦਾ ਖ਼ਰਚ ਆ ਸਕਦਾ ਹੈ। ਜੇਕਰ ਇਸ ਨੂੰ ਸੁਰੰਗ ਦੇ ਤੌਰ ‘ਤੇ ਬਣਾਇਆ ਜਾਂਦਾ ਹੈ ਤਾਂ ਲਾਗਤ ਵੱਧ ਕੇ 4,000 ਕਰੋੜ ਰੁਪਏ ਹੋ ਜਾਵੇਗੀ। ਇਸ ਦੇ ਨਾਲ ਹੀ, ਧਨਚਿਰੀ ਕੈਂਪ ਤੋਂ ਐਮਜੀ ਰੋਡ ਲਿੰਕ ਦੀ ਲਾਗਤ ਲਗਭਗ 1,000 ਕਰੋੜ ਰੁਪਏ ਹੋ ਸਕਦੀ ਹੈ।

NH ਘੋਸ਼ਿਤ ਹੋਣ ਤੋਂ ਬਾਅਦ ਹੀ ਹੋ ਸਕਦਾ ਹੈ ਅਧਿਐਨ…
ਸੂਤਰਾਂ ਦਾ ਕਹਿਣਾ ਹੈ ਕਿ ਭਾਰਤੀ ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ ਇੰਡੀਆ (ਐੱਨ.ਐੱਚ.ਏ.ਆਈ.) ਜਾਂ ਸੜਕੀ ਆਵਾਜਾਈ ਮੰਤਰਾਲਾ ਉਦੋਂ ਹੀ ਵਿਸਥਾਰਪੂਰਵਕ ਅਧਿਐਨ ਕਰ ਸਕਦਾ ਹੈ ਜਦੋਂ ਇਨ੍ਹਾਂ ਹਿੱਸਿਆਂ ਨੂੰ ਰਾਸ਼ਟਰੀ ਰਾਜਮਾਰਗ ਘੋਸ਼ਿਤ ਕੀਤਾ ਜਾਵੇ। ਸੂਤਰਾਂ ਨੇ ਦੱਸਿਆ ਕਿ ਗਡਕਰੀ ਅਤੇ ਸੈਣੀ ਦੀ ਬੈਠਕ ਵਿੱਚ ਕੇਂਦਰੀ ਸੜਕ ਆਵਾਜਾਈ ਸਕੱਤਰ ਵੀ.ਉਮਾਸ਼ੰਕਰ, ਵੀ ਮੌਜੂਦ ਸਨ, ਜੋ ਪਹਿਲਾਂ ਹਰਿਆਣਾ ਦੇ ਮੁੱਖ ਮੰਤਰੀ ਦੇ ਪ੍ਰਮੁੱਖ ਸਕੱਤਰ ਰਹਿ ਚੁੱਕੇ ਹਨ, ਇਸ ਤੋਂ ਇਹ ਉਮੀਦ ਕੀਤੀ ਜਾ ਰਹੀ ਹੈ ਕਿ ਨੈਲਸਨ ਮੰਡੇਲਾ ਰੋਡ ਤੋਂ ਐਮਜੀ ਰੋਡ ਅਤੇ ਐਮਜੀ ਰੋਡ ਤੋਂ ਗੁਰੂਗ੍ਰਾਮ-ਫਰੀਦਾਬਾਦ ਰੋਡ ਤੱਕ ਦੇ ਹਿੱਸੇ ਨੂੰ ਰਾਸ਼ਟਰੀ ਰਾਜਮਾਰਗ ਘੋਸ਼ਿਤ ਕਰਨ ਵਿੱਚ ਕੋਈ ਦਿੱਕਤ ਨਹੀਂ ਆਵੇਗੀ।