ਉੱਤਰੀ ਦਿੱਲੀ ਨੂੰ ਦੱਖਣੀ ਦਿੱਲੀ, ਗੁਰੂਗ੍ਰਾਮ ਅਤੇ ਐਨਸੀਆਰ ਦੇ ਹੋਰ ਹਿੱਸਿਆਂ ਨਾਲ ਜੋੜਨ ਵਾਲੇ ਪੰਜਾਬੀ ਬਾਗ ਫਲਾਈਓਵਰ ਨੂੰ 20 ਦਸੰਬਰ ਤੋਂ ਬਾਅਦ ਆਵਾਜਾਈ ਲਈ ਖੋਲ੍ਹ ਦਿੱਤਾ ਜਾਵੇਗਾ। ਲੋਕ ਨਿਰਮਾਣ ਵਿਭਾਗ (ਪੀਡਬਲਿਊਡੀ) ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਫਲਾਈਓਵਰ ਦਾ ਕੰਮ ਲਗਭਗ ਪੂਰਾ ਹੋ ਚੁੱਕਾ ਹੈ। ਰਾਜਾ ਗਾਰਡਨ ਤੋਂ ਈਐਸਆਈ ਹਸਪਤਾਲ ਨੂੰ ਜਾਣ ਵਾਲੇ ਫਲਾਈਓਵਰ ਦੇ ਕੈਰੇਜ਼ਵੇਅ ’ਤੇ ਡਿਵਾਈਡਰ ’ਤੇ ਦਰੱਖਤ ਲੱਗੇ ਹੋਏ ਹਨ।
ਦਿੱਲੀ ਹਾਈ ਕੋਰਟ ਤੋਂ ਮਨਜ਼ੂਰੀ ਨਾ ਮਿਲਣ ਕਾਰਨ ਪੀਡਬਲਯੂਡੀ ਇਸ ਸਮੇਂ ਇੱਕ ਪਾਸੇ ਤਿੰਨ ਵਿੱਚੋਂ ਸਿਰਫ਼ ਦੋ ਲੇਨ ਖੋਲ੍ਹਣ ਦੀ ਯੋਜਨਾ ਬਣਾ ਰਹੀ ਹੈ। ਲੋਕ ਨਿਰਮਾਣ ਵਿਭਾਗ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੰਜਾਬੀ ਬਾਗ ਫਲਾਈਓਵਰ ਬਣਨ ਤੋਂ ਬਾਅਦ ਧੌਲਾ ਕੂਆਂ ਤੋਂ ਆਜ਼ਾਦਪੁਰ ਤੱਕ ਦਾ ਕਰੀਬ 18 ਕਿਲੋਮੀਟਰ ਲੰਬਾ ਰਿੰਗ ਰੋਡ ਸਿਗਨਲ ਫਰੀ ਹੋ ਜਾਵੇਗਾ। ਧੌਲਾ ਕੂਆਂ ਤੋਂ ਅੱਗੇ, ਨਰਾਇਣ ਫਲਾਈਓਵਰ, ਫਿਰ ਮਾਇਆਪੁਰੀ, ਉਸ ਤੋਂ ਬਾਅਦ ਰਾਜਾ ਗਾਰਡਨ, ਪੰਜਾਬੀ ਬਾਗ, ਮੋਤੀ ਨਗਰ, ਚੌਧਰੀ ਬ੍ਰਹਮ ਸਿੰਘ ਅਤੇ ਸ਼ਾਲੀਮਾਰ ਬਾਗ ਫਲਾਈਓਵਰ ਹੈ। ਇਹ ਇਸ ਸਟ੍ਰੈਚ ਨੂੰ ਲਗਭਗ ਸਿਗਨਲ ਮੁਕਤ ਬਣਾ ਦੇਵੇਗਾ।
ਕਰੀਬ 1.3 ਕਿਲੋਮੀਟਰ ਲੰਬਾ ਇਹ ਫਲਾਈਓਵਰ ਈਐਸਆਈ ਮੈਟਰੋ ਸਟੇਸ਼ਨ ਅਤੇ ਪੰਜਾਬੀ ਬਾਗ ਕਲੱਬ ਰੋਡ ਵਿਚਕਾਰ ਬਣਾਇਆ ਗਿਆ ਹੈ। ਇਹ ਪ੍ਰੋਜੈਕਟ ਦਿੱਲੀ ਦੇ ਵੱਡੇ ਕੋਰੀਡੋਰ ਪੁਨਰ ਵਿਕਾਸ ਯੋਜਨਾ ਦਾ ਹਿੱਸਾ ਹੈ। ਪਹਿਲਾਂ ਇਸ ਨੂੰ ਜਨਵਰੀ 2024 ਤੱਕ ਪੂਰਾ ਕਰਨ ਦਾ ਟੀਚਾ ਰੱਖਿਆ ਗਿਆ ਸੀ, ਪਰ ਬਾਅਦ ਵਿੱਚ ਸਮਾਂ ਸੀਮਾ ਅਪ੍ਰੈਲ ਤੱਕ ਵਧਾ ਦਿੱਤੀ ਗਈ ਅਤੇ ਹੁਣ ਇਸ ਨੂੰ ਦਸੰਬਰ ਤੱਕ ਵਧਾ ਦਿੱਤਾ ਗਿਆ ਹੈ।
ਟ੍ਰੈਫਿਕ ਜਾਮ ਤੋਂ ਮਿਲੇਗੀ ਰਾਹਤ
ਰਿੰਗ ਰੋਡ ’ਤੇ ਉਸਾਰੀ ਦੇ ਕੰਮ ਕਾਰਨ ਅਕਸਰ ਟਰੈਫਿਕ ਜਾਮ ਰਹਿੰਦਾ ਹੈ। ਫਲਾਈਓਵਰ ਦੇ ਚਾਲੂ ਹੋਣ ਨਾਲ ਪੰਜਾਬੀ ਬਾਗ ਇਲਾਕੇ ਦੀ ਆਵਾਜਾਈ ਸੁਖਾਲੀ ਹੋ ਜਾਵੇਗੀ। ਇਹ ਫਲਾਈਓਵਰ ਉੱਤਰੀ ਦਿੱਲੀ ਨੂੰ ਦੱਖਣੀ ਦਿੱਲੀ, ਗੁਰੂਗ੍ਰਾਮ ਅਤੇ ਐਨਸੀਆਰ ਦੇ ਹੋਰ ਹਿੱਸਿਆਂ ਨਾਲ ਜੋੜੇਗਾ। ਅਧਿਕਾਰੀਆਂ ਮੁਤਾਬਕ ਫਲਾਈਓਵਰ ਦੇ ਚਾਲੂ ਹੋਣ ਨਾਲ ਹਰ ਸਾਲ 1.6 ਲੱਖ ਟਨ ਕਾਰਬਨ ਨਿਕਾਸੀ ਘਟੇਗੀ ਅਤੇ 18 ਲੱਖ ਲੀਟਰ ਈਂਧਨ ਦੀ ਬਚਤ ਹੋਵੇਗੀ।
2018 ਵਿੱਚ ਬਣਾਈ ਗਈ ਸੀ ਯੋਜਨਾ
2018 ਵਿੱਚ, ਦਿੱਲੀ ਸਰਕਾਰ ਨੇ ਸ਼ਹਿਰ ਨੂੰ ਟ੍ਰੈਫਿਕ ਜਾਮ ਤੋਂ ਰਾਹਤ ਪ੍ਰਦਾਨ ਕਰਨ ਲਈ 77 ਕੋਰੀਡੋਰ ਦੀ ਪਛਾਣ ਕੀਤੀ ਸੀ। ਭਾਰੀ ਟ੍ਰੈਫਿਕ ਵਾਲੇ ਇਨ੍ਹਾਂ ਹੌਟਸਪੌਟਸ ‘ਤੇ ਜਾਮ ਨੂੰ ਦੂਰ ਕਰਨ ਲਈ ਫਲਾਈਓਵਰ, ਅੰਡਰਪਾਸ ਅਤੇ ਸੜਕਾਂ ਨੂੰ ਨਵਾਂ ਰੂਪ ਦਿੱਤਾ ਜਾ ਰਿਹਾ ਹੈ। ਇਸ ਪ੍ਰੋਜੈਕਟ ਨੂੰ ਮਾਰਚ 2021 ਵਿੱਚ ਯੂਨੀਫਾਈਡ ਟਰੈਫਿਕ ਐਂਡ ਟ੍ਰਾਂਸਪੋਰਟੇਸ਼ਨ ਇਨਫਰਾਸਟਰੱਕਚਰ (UTTIPEC) ਦੁਆਰਾ ਮਨਜ਼ੂਰੀ ਦਿੱਤੀ ਗਈ ਸੀ। ਤਤਕਾਲੀ ਲੋਕ ਨਿਰਮਾਣ ਮੰਤਰੀ ਆਤਿਸ਼ੀ ਨੇ ਠੇਕੇਦਾਰ ਨੂੰ ਇਸ ਫਲਾਈਓਵਰ ਨੂੰ ਸਮਾਂ ਸੀਮਾ ਅੰਦਰ ਮੁਕੰਮਲ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ ਪਰ ਅਜਿਹਾ ਨਹੀਂ ਹੋ ਸਕਿਆ।
