ਬਹਿਰਾਇਚ ਹਿੰਸਾ ਮਾਮਲੇ ‘ਚ ਨਵਾਂ ਮੋੜ, ਭਾਜਪਾ ਵਿਧਾਇਕ ਨੇ 7 ਭਾਜਪਾ ਵਰਕਰਾਂ ਖਿਲਾਫ ਦਰਜ ਕਰਵਾਈ FIR
ਬਹਿਰਾਇਚ ਹਿੰਸਾ ਮਾਮਲੇ ‘ਚ ਸੋਮਵਾਰ ਨੂੰ ਨਵਾਂ ਮੋੜ ਦੇਖਣ ਨੂੰ ਮਿਲਿਆ ਹੈ । ਮਹਾਸੀ ਤੋਂ ਭਾਜਪਾ ਵਿਧਾਇਕ ਸੁਰੇਸ਼ਵਰ ਸਿੰਘ ਨੇ ਆਪਣੀ ਹੀ ਪਾਰਟੀ ਦੇ 7 ਵਰਕਰਾਂ ਖਿਲਾਫ FIR ਦਰਜ ਕਰਵਾਈ ਹੈ। ਯੁਵਾ ਮੋਰਚਾ ਦੇ ਸ਼ਹਿਰੀ ਪ੍ਰਧਾਨ ਅਰਪਿਤ ਸ਼੍ਰੀਵਾਸਤਵ ਸਮੇਤ 7 ਨਾਮੀ ਵਰਕਰਾਂ ਖਿਲਾਫ ਗੰਭੀਰ ਧਾਰਾਵਾਂ ਤਹਿਤ FIR ਦਰਜ ਕੀਤੀ ਗਈ ਹੈ।
ਇਲਜ਼ਾਮ ਹੈ ਕਿ ਭੀੜ ਨੇ ਬਹਿਰਾਇਚ ਹਿੰਸਾ ‘ਚ ਮਾਰੇ ਗਏ ਰਾਮ ਗੋਪਾਲ ਮਿਸ਼ਰਾ ਦੀ ਲਾਸ਼ ਹਸਪਤਾਲ ਚੌਰਾਹੇ ‘ਤੇ ਰੱਖ ਕੇ ਪ੍ਰਦਰਸ਼ਨ ਕੀਤਾ। ਵਿਧਾਇਕ ਦੇ ਕਾਫਲੇ ‘ਤੇ ਪਥਰਾਅ ਅਤੇ ਗੋਲੀਬਾਰੀ ਕੀਤੀ ਗਈ। ਪੁਲਿਸ ਮੁਲਜ਼ਮਾਂ ਦੀ ਭਾਲ ਵਿੱਚ ਲੱਗੀ ਹੋਈ ਹੈ। ਮਾਮਲਾ ਨਗਰ ਕੋਤਵਾਲੀ ਇਲਾਕੇ ਦਾ ਹੈ। ਵਿਧਾਇਕ ਵੱਲੋਂ ਦਰਜ ਕਰਵਾਈ ਗਈ FIR ਵਿੱਚ ਅਣਪਛਾਤੀ ਭੀੜ ਦਾ ਵੀ ਜ਼ਿਕਰ ਹੈ।
FIR ਦੇ ਮੁਤਾਬਕ 13 ਅਕਤੂਬਰ ਨੂੰ ਮਹਾਰਾਜਗੰਜ ‘ਚ ਹਿੰਸਾ ‘ਚ ਮਾਰੇ ਗਏ ਰਾਮ ਗੋਪਾਲ ਦੀ ਲਾਸ਼ ਬਹਿਰਾਇਚ ਮੈਡੀਕਲ ਕਾਲਜ ਦੇ ਬਾਹਰ ਗੇਟ ‘ਤੇ ਰੱਖ ਕੇ ਭੀੜ ਪ੍ਰਦਰਸ਼ਨ ਕਰ ਰਹੀ ਸੀ। ਜਦੋਂ ਉਹ ਆਪਣੇ ਬਾਡੀਗਾਰਡ ਅਤੇ ਹੋਰ ਸਾਥੀਆਂ ਨਾਲ ਉਥੇ ਪਹੁੰਚਿਆ ਤਾਂ ਕੁਝ ਬਦਮਾਸ਼ਾਂ ਨੇ ਗਾਲ੍ਹਾਂ ਕੱਢਣੀਆਂ ਸ਼ੁਰੂ ਕਰ ਦਿੱਤੀਆਂ ਅਤੇ ਨਾਅਰੇਬਾਜ਼ੀ ਕਰਨੀ ਸ਼ੁਰੂ ਕਰ ਦਿੱਤੀ।
FIR ਵਿੱਚ ਕਿਹਾ ਗਿਆ ਹੈ ਕਿ ਇਨ੍ਹਾਂ ਬਦਮਾਸ਼ਾਂ ਵਿੱਚ BJP ਦੇ ਸ਼ਹਿਰੀ ਪ੍ਰਧਾਨ ਅਰਪਿਤ ਸ੍ਰੀਵਾਸਤਵ, BJP ਵਰਕਰ ਅਨੁਜ ਸਿੰਘ ਰਾਏਕਵਾਰ, ਸ਼ੁਭਮ ਮਿਸ਼ਰਾ, ਕੁਸ਼ਮੇਂਦਰ ਚੌਧਰੀ, ਮਨੀਸ਼ ਚੰਦਰ ਸ਼ੁਕਲਾ, ਪੁੰਡਰਿਕ ਪਾਂਡੇ ਅਧਿਆਪਕ, ਸੈਕਟਰ ਕੋਆਰਡੀਨੇਟਰ ਸੁੰਧਾਸ਼ੂ ਸਿੰਘ ਰਾਣਾ ਅਤੇ ਇੱਕ ਅਣਪਛਾਤੀ ਭੀੜ ਸ਼ਾਮਲ ਹੈ।
FIR ਵਿੱਚ ਕਿਹਾ ਗਿਆ ਹੈ ਕਿ ਜਿਵੇਂ ਹੀ MLA ਅਤੇ DM ਲਾਸ਼ ਨੂੰ ਮੁਰਦਾਘਰ ਵਿੱਚ ਰੱਖ ਕੇ ਅੱਗੇ ਵਧੇ ਤਾਂ ਇਨ੍ਹਾਂ ਵਿਅਕਤੀਆਂ ਨੇ ਕਾਰ ਨੂੰ ਰੋਕਣ ਅਤੇ ਜਾਨੋਂ ਮਾਰਨ ਦੀ ਨੀਅਤ ਨਾਲ ਪਥਰਾਅ ਕੀਤਾ। ਭੀੜ ਵੱਲੋਂ ਫਾਇਰਿੰਗ ਵੀ ਕੀਤੀ ਗਈ ਜਿਸ ਕਾਰਨ ਕਾਰ ਦਾ ਸ਼ੀਸ਼ਾ ਟੁੱਟ ਗਿਆ।
ਵਿਧਾਇਕ ਨੇ ਆਪਣੀ FIR ਵਿੱਚ ਕਿਹਾ ਕਿ ਉਸ ਦਾ ਪੁੱਤਰ ਅਖੰਡ ਪ੍ਰਤਾਪ ਸਿੰਘ ਇਸ ਘਟਨਾ ਵਿੱਚ ਵਾਲ-ਵਾਲ ਬਚ ਗਿਆ। ਆਪਣੀ ਸ਼ਿਕਾਇਤ ਵਿੱਚ ਵਿਧਾਇਕ ਨੇ ਦਾਅਵਾ ਕੀਤਾ ਕਿ ਘਟਨਾ CCTV ਫੁਟੇਜ ਤੋਂ ਸਾਫ਼ ਹੈ। ਪੁਲਿਸ ਨੇ ਮੁਲਜ਼ਮਾਂ ਖ਼ਿਲਾਫ਼ ਦੰਗਾ ਭੜਕਾਉਣ, ਮਾਰੂ ਹਥਿਆਰਾਂ ਨਾਲ ਹਮਲਾ, ਕਤਲ ਦੀ ਕੋਸ਼ਿਸ਼, ਨਿੱਜੀ ਸੁਰੱਖਿਆ ਨੂੰ ਖਤਰੇ ਵਿੱਚ ਪਾਉਣ ਅਤੇ ਹਮਲਾ ਕਰਨ ਸਮੇਤ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਹੈ।
ਬਹਿਰਾਇਚ ਹਿੰਸਾ ਮਾਮਲੇ ‘ਚ ਵੱਡੀ ਕਾਰਵਾਈ
ਬਹਿਰਾਇਚ ਹਿੰਸਾ ਮਾਮਲੇ ‘ਚ ਯੋਗੀ ਸਰਕਾਰ ਨੇ ਵੱਡੀ ਕਾਰਵਾਈ ਕਰਦੇ ਹੋਏ ਏਐੱਸਪੀ ਦਿਹਾਤੀ ਪਵਿੱਤਰ ਮੋਹਨ ਤ੍ਰਿਪਾਠੀ ਨੂੰ ਹਟਾ ਦਿੱਤਾ ਹੈ। ਏਐਸਪੀ ਦੁਰਗਾ ਪ੍ਰਸਾਦ ਤਿਵਾਰੀ ਨੂੰ ਬਹਿਰਾਇਚ ਵਿੱਚ ਤਾਇਨਾਤ ਕੀਤਾ ਗਿਆ ਹੈ। ਏਐਸਪੀ ਪਵਿੱਤਰ ਮੋਹਨ ਤ੍ਰਿਪਾਠੀ ਨੂੰ ਡੀਜੀਪੀ ਹੈੱਡਕੁਆਰਟਰ ਨਾਲ ਲਗਾਇਆ ਗਿਆ ਹੈ। ਸਥਾਨਕ ਪੁਲਿਸ ਦੀ ਲਾਪਰਵਾਹੀ ਕਾਰਨ ਹਿੰਸਾ ਭੜਕ ਗਈ ਸੀ। ਜਲਦ ਹੀ ਕੁਝ ਹੋਰ ਅਧਿਕਾਰੀਆਂ ਖਿਲਾਫ ਵੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।
