ਨਿਊਜ਼ੀਲੈਂਡ ਖਿਲਾਫ ਬੱਲੇਬਾਜ਼ੀ ਕਰਦਿਆਂ ਰਿਸ਼ਭ ਪੰਤ ਨੇ ਲਗਾਇਆ 107 ਮੀਟਰ ਲੰਬਾ ਛੱਕਾ, ਦੇਖਦੇ ਰਹਿ ਗਏ ਗਲੇਨ ਫਿਲਿਪਸ
ਨਿਊਜ਼ੀਲੈਂਡ ਅਤੇ ਟੀਮ ਇੰਡੀਆ ਵਿਚਾਲੇ ਟੈਸਟ ਮੈਚ ਚਾਲ ਰਿਹਾ ਹੈ। ਇਸ ਦੌਰਾਨ ਟੀਮ ਇੰਡੀਆ ਦੇ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਬੈਂਗਲੁਰੂ ਟੈਸਟ ਮੈਚ ਦੀ ਦੂਜੀ ਪਾਰੀ ਵਿੱਚ ਸਿਰਫ਼ ਇੱਕ ਦੌੜ ਨਾਲ ਆਪਣਾ ਸੱਤਵਾਂ ਟੈਸਟ ਸੈਂਕੜਾ ਬਣਾਉਣ ਤੋਂ ਖੁੰਝ ਗਏ । ਹਾਲਾਂਕਿ ਪੰਤ ਨੇ 99 ਦੌੜਾਂ ਦੀ ਪਾਰੀ ਖੇਡਦੇ ਹੋਏ ਸਟੇਡੀਅਮ ‘ਚ ਬੈਠੇ ਦਰਸ਼ਕਾਂ ਦਾ ਖੂਬ ਮਨੋਰੰਜਨ ਕੀਤਾ। ਪੰਤ ਨੇ ਤੇਜ਼ ਗੇਂਦਬਾਜ਼ ਟਿਮ ਸਾਊਥੀ ਦੀ ਗੇਂਦ ‘ਤੇ ਜ਼ਬਰਦਸਤ ਛੱਕਾ ਜੜਿਆ, ਜਿਸ ਦੀ ਲੰਬਾਈ 107 ਮੀਟਰ ਸੀ।
ਪੰਤ ਨੇ ਇਹ ਛੱਕਾ 90 ਦੇ ਸਕੋਰ ‘ਤੇ ਲਗਾਇਆ। ਪੰਤ ਨੇ ਸਰਫਰਾਜ਼ ਖਾਨ ਨਾਲ ਮਿਲ ਕੇ ਚੌਥੀ ਵਿਕਟ ਲਈ 177 ਦੌੜਾਂ ਦੀ ਸਾਂਝੇਦਾਰੀ ਕਰ ਕੇ ਭਾਰਤ ਨੂੰ ਮੁਸ਼ਕਲਾਂ ਤੋਂ ਬਾਹਰ ਕਰ ਦਿੱਤਾ। ਜ਼ਖਮੀ ਹੋਣ ਦੇ ਬਾਵਜੂਦ ਪੰਤ ਨੇ ਬੱਲੇਬਾਜ਼ੀ ਲਈ ਬਾਹਰ ਆ ਕੇ ਕੀਮਤੀ ਪਾਰੀ ਖੇਡੀ ਜਿਸ ਨੂੰ ਸਦੀਆਂ ਤੱਕ ਯਾਦ ਰੱਖਿਆ ਜਾਵੇਗਾ। ਬੇਸ਼ੱਕ ਉਹ ਆਪਣਾ ਸੈਂਕੜਾ ਲਗਾਉਣ ਤੋਂ ਖੁੰਝ ਗਏ ਪਰ ਪੰਤ ਦੀ ਇਹ ਪਾਰੀ ਸ਼ਲਾਘਾਯੋਗ ਹੈ।
ਨਿਊਜ਼ੀਲੈਂਡ ਲਈ ਟਿਮ ਸਾਊਦੀ ਨੇ ਭਾਰਤੀ ਪਾਰੀ ਦਾ 87ਵਾਂ ਓਵਰ ਲਿਆਂਦਾ। ਸਾਊਦੀ ਵੱਲੋਂ ਇਸ ਓਵਰ ਦੀ ਪਹਿਲੀ ਗੇਂਦ ‘ਤੇ ਪੰਤ ਨੇ ਬਾਈ ਵਜੋਂ ਚਾਰ ਦੌੜਾਂ ਬਣਾਈਆਂ। ਦੂਜੀ ਗੇਂਦ ਸਾਊਦੀ ਵੱਲੋਂ ਸ਼ਾਰਟ ਲੈਂਥ ਦੀ ਸੀ, ਜਿਸ ‘ਤੇ ਪੰਤ ਨੇ ਸਿਰਫ ਬਚਾਅ ਕੀਤਾ। ਤੀਜੀ ਗੇਂਦ ‘ਤੇ ਪੰਤ ਨੇ ਗੋਡੇ ਭਾਰ ਬੈਠ ਕੇ ਮਿਡਵਿਕਟ ‘ਤੇ 107 ਮੀਟਰ ਲੰਬਾ ਛੱਕਾ ਜੜਿਆ। ਪੰਤ ਨੇ ਜਦੋਂ ਇਹ ਛੱਕਾ ਲਗਾਇਆ ਤਾਂ ਉਹ 90 ਦੇ ਸਕੋਰ ‘ਤੇ ਖੇਡ ਰਹੇ ਸਨ। ਪੰਤ ਦੇ ਇਸ ਲੰਬੇ ਛੱਕੇ ਨੂੰ ਦੇਖ ਕੇ ਗਲੇਨ ਫਿਲਿਪਸ ਦਾ ਮੂੰਹ ਖੁੱਲ੍ਹਾ ਰਹਿ ਗਿਆ।
𝗢𝘂𝘁 𝗼𝗳 𝘁𝗵𝗲 𝗣𝗮𝗿𝗸! 😍
Rishabh Pant smacks a 1⃣0⃣7⃣m MAXIMUM! 💥
Live – https://t.co/FS97Llv5uq#TeamIndia | #INDvNZ | @IDFCFIRSTBank pic.twitter.com/4UHngQLh47
— BCCI (@BCCI) October 19, 2024
ਰਿਸ਼ਭ ਪੰਤ 99 ਦੌੜਾਂ ਬਣਾ ਕੇ ਹੋਏ ਆਊਟ
ਰਿਸ਼ਭ ਪੰਤ ਨੇ 105 ਗੇਂਦਾਂ ‘ਚ 9 ਚੌਕਿਆਂ ਅਤੇ 5 ਛੱਕਿਆਂ ਦੀ ਮਦਦ ਨਾਲ 99 ਦੌੜਾਂ ਬਣਾਈਆਂ। ਪੰਤ ਨੂੰ 99 ਦੇ ਨਿੱਜੀ ਸਕੋਰ ‘ਤੇ ਵਿਲੀਅਮ ਨੇ ਬੋਲਡ ਕੀਤਾ। ਟੀਮ ਇੰਡੀਆ ਨੇ 231 ਦੌੜਾਂ ‘ਤੇ ਵਿਰਾਟ ਕੋਹਲੀ ਦਾ ਵਿਕਟ ਗੁਆ ਦਿੱਤਾ ਸੀ। ਇਸ ਤੋਂ ਬਾਅਦ ਪੰਤ ਅਤੇ ਸਰਫਰਾਜ਼ ਖਾਨ ਨੇ ਭਾਰਤੀ ਪਾਰੀ ਨੂੰ ਸੰਭਾਲਿਆ। ਸਰਫਰਾਜ਼ ਨੇ 195 ਗੇਂਦਾਂ ‘ਤੇ 150 ਦੌੜਾਂ ਦੀ ਪਾਰੀ ਖੇਡੀ। ਇਹ ਉਨ੍ਹਾਂ ਦੇ ਅੰਤਰਰਾਸ਼ਟਰੀ ਕਰੀਅਰ ਦਾ ਪਹਿਲਾ ਸੈਂਕੜਾ ਹੈ। ਸਰਫਰਾਜ਼ ਨੇ 18 ਚੌਕੇ ਅਤੇ 3 ਛੱਕੇ ਲਗਾਏ।
ਰਿਸ਼ਭ ਪੰਤ ਨੇ ਦਿਖਾਈ ਬਹੁਤ ਹਿੰਮਤ
ਪਹਿਲੀ ਪਾਰੀ ‘ਚ 20 ਦੌੜਾਂ ਬਣਾਉਣ ਵਾਲੇ ਰਿਸ਼ਭ ਪੰਤ ਨਿਊਜ਼ੀਲੈਂਡ ਦੀ ਪਹਿਲੀ ਪਾਰੀ ਦੀ ਬੱਲੇਬਾਜ਼ੀ ਦੌਰਾਨ ਫੀਲਡਿੰਗ ਕਰਦੇ ਸਮੇਂ ਜ਼ਖਮੀ ਹੋ ਗਏ। ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਮੈਦਾਨ ਛੱਡਣਾ ਪਿਆ। ਇਹ ਤੈਅ ਨਹੀਂ ਸੀ ਕਿ ਉਹ ਦੂਜੀ ਪਾਰੀ ‘ਚ ਬੱਲੇਬਾਜ਼ੀ ਕਰਨ ਆਉਣਗੇ ਪਰ ਇਸ ਬੱਲੇਬਾਜ਼ ਨੇ ਬੱਲੇਬਾਜ਼ੀ ਕ੍ਰੀਜ਼ ‘ਤੇ ਕਦਮ ਰੱਖਦਿਆਂ ਆਪਣੀ ਵੱਡੀ ਹਿੰਮਤ ਦਿਖਾਈ ਅਤੇ ਵੱਡੀ ਪਾਰੀ ਖੇਡੀ। ਪੰਤ ਨੂੰ ਉਸੇ ਲੱਤ ‘ਚ ਸੱਟ ਲੱਗੀ ਸੀ, ਜਿਸ ‘ਤੇ ਕੁਝ ਮਹੀਨੇ ਪਹਿਲਾਂ ਉਨ੍ਹਾਂ ਦੇ ਗੋਡੇ ਦੀ ਸਰਜਰੀ ਹੋਈ ਸੀ। ਪਹਿਲੀ ਪਾਰੀ ‘ਚ 46 ਦੌੜਾਂ ‘ਤੇ ਢੇਰ ਹੋਈ ਟੀਮ ਇੰਡੀਆ ਨੇ ਦੂਜੀ ਪਾਰੀ ‘ਚ ਚਾਹ ਬ੍ਰੇਕ ਤੱਕ 6 ਵਿਕਟਾਂ ‘ਤੇ 438 ਦੌੜਾਂ ਬਣਾ ਲਈਆਂ ਸਨ। ਭਾਰਤੀ ਟੀਮ ਨੇ ਹੁਣ ਨਿਊਜ਼ੀਲੈਂਡ ‘ਤੇ 82 ਦੌੜਾਂ ਦੀ ਲੀਡ ਲੈ ਲਈ ਹੈ।
