Bank News: ਹੁਣ ਮੁਲਾਜ਼ਮਾਂ ਨੂੰ ਹਫਤੇ ਵਿਚ ਮਿਲਣਗੀਆਂ 2 ਛੁੱਟੀਆਂ!, ਜਾਣੋ ਕਦੋਂ ਲਾਗੂ ਹੋਣਗੇ ਨਵੇਂ ਨਿਯਮ…
5 Days working in Bank – ਬੈਂਕ ਕਰਮਚਾਰੀ ਲੰਬੇ ਸਮੇਂ ਤੋਂ ਹਫ਼ਤੇ ਵਿੱਚ ਪੰਜ ਦਿਨ ਕੰਮ ਕਰਨ ਦੀ ਮੰਗ ਕਰ ਰਹੇ ਹਨ। ਜੇਕਰ ਸਰਕਾਰ ਹਰੀ ਝੰਡੀ ਦੇ ਦਿੰਦੀ ਹੈ ਤਾਂ ਇਸ ਸਾਲ ਦੇ ਅੰਤ ਤੱਕ ਉਨ੍ਹਾਂ ਦੀ ਮੰਗ ਪੂਰੀ ਹੋ ਸਕਦੀ ਹੈ। ਇੰਡੀਅਨ ਬੈਂਕਸ ਐਸੋਸੀਏਸ਼ਨ (ਆਈ.ਬੀ.ਏ.) ਅਤੇ ਕਰਮਚਾਰੀ ਯੂਨੀਅਨਾਂ ਵਿਚਾਲੇ ਇਸ ਮੁੱਦੇ ਉਤੇ ਸਮਝੌਤਾ ਹੋ ਗਿਆ ਹੈ। ਹੁਣ ਸਿਰਫ਼ ਸਰਕਾਰ ਦੀ ਮਨਜ਼ੂਰੀ ਦੀ ਉਡੀਕ ਹੈ, ਜਿਸ ਦੇ ਦਸੰਬਰ 2024 ਤੱਕ ਮਿਲਣ ਦੀ ਉਮੀਦ ਹੈ। ਜੇਕਰ ਇਹ ਮਨਜ਼ੂਰੀ ਮਿਲ ਜਾਂਦੀ ਹੈ ਤਾਂ ਬੈਂਕ ਕਰਮਚਾਰੀ ਹਫਤੇ ‘ਚ ਸਿਰਫ ਪੰਜ ਦਿਨ ਹੀ ਕੰਮ ਕਰਨਗੇ ਅਤੇ ਸ਼ਨੀਵਾਰ ਅਤੇ ਐਤਵਾਰ ਨੂੰ ਛੁੱਟੀ ਮਿਲੇਗੀ।
ਸਰਕਾਰ ਦੀ ਮਨਜ਼ੂਰੀ ਦੀ ਹੈ ਉਡੀਕ
ਇਸ ਫੈਸਲੇ ਨੂੰ ਲੈ ਕੇ IBA ਅਤੇ ਬੈਂਕ ਯੂਨੀਅਨਾਂ ਵਿਚਾਲੇ ਪਹਿਲਾਂ ਹੀ ਇੱਕ ਸਮਝੌਤਾ ਪੱਤਰ (ਐੱਮਓਯੂ) ‘ਤੇ ਦਸਤਖਤ ਕੀਤੇ ਜਾ ਚੁੱਕੇ ਹਨ। ਦਸੰਬਰ 2023 ਵਿੱਚ ਹੋਏ ਇਸ ਸਮਝੌਤੇ ਵਿੱਚ ਸਰਕਾਰੀ ਅਤੇ ਨਿੱਜੀ ਬੈਂਕ ਦੋਵੇਂ ਸ਼ਾਮਲ ਸਨ। ਇਸ ਤੋਂ ਬਾਅਦ, 8 ਮਾਰਚ, 2024 ਨੂੰ ਆਈ.ਬੀ.ਏ. ਅਤੇ ਆਲ ਇੰਡੀਆ ਬੈਂਕ ਆਫਿਸਰਜ਼ ਕਨਫੈਡਰੇਸ਼ਨ ਵਿਚਕਾਰ ਇੱਕ ਸਾਂਝੇ ਨੋਟ ‘ਤੇ ਹਸਤਾਖਰ ਕੀਤੇ ਗਏ ਸਨ, ਜਿਸ ਵਿੱਚ 5 ਦਿਨ ਕੰਮ ਕਰਨ ਅਤੇ ਸ਼ਨੀਵਾਰ ਦੀ ਛੁੱਟੀ ਦੀ ਰੂਪਰੇਖਾ ਤੈਅ ਕੀਤੀ ਗਈ ਸੀ। ਹਾਲਾਂਕਿ ਇਹ ਬਦਲਾਅ ਸਰਕਾਰ ਦੀ ਮਨਜ਼ੂਰੀ ‘ਤੇ ਨਿਰਭਰ ਕਰਦਾ ਹੈ।
ਅਹਿਮ ਹੈ ਆਰਬੀਆਈ ਦੀ ਭੂਮਿਕਾ
ਇਹ ਪ੍ਰਸਤਾਵ ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਨਾਲ ਵੀ ਚਰਚਾ ਲਈ ਜਾਵੇਗਾ, ਕਿਉਂਕਿ ਸਿਰਫ ਆਰਬੀਆਈ ਬੈਂਕਾਂ ਦੇ ਸਮੇਂ ਅਤੇ ਬੈਂਕਾਂ ਦੇ ਅੰਦਰੂਨੀ ਕੰਮਕਾਜ ਨੂੰ ਨਿਯੰਤਰਿਤ ਕਰਦਾ ਹੈ। ਸਰਕਾਰ ਨੇ ਇਸ ਪ੍ਰਸਤਾਵ ਦੀ ਮਨਜ਼ੂਰੀ ਲਈ ਕੋਈ ਨਿਸ਼ਚਿਤ ਸਮਾਂ ਸੀਮਾ ਤੈਅ ਨਹੀਂ ਕੀਤੀ ਹੈ ਪਰ ਉਮੀਦ ਹੈ ਕਿ ਇਸ ਦਾ ਨੋਟੀਫਿਕੇਸ਼ਨ ਸਾਲ ਦੇ ਅੰਤ ਤੱਕ ਆ ਸਕਦਾ ਹੈ।
ਵਧ ਸਕਦੇ ਹਨ ਕੰਮ ਦੇ ਘੰਟੇ
ਰਿਪੋਰਟਾਂ ਮੁਤਾਬਕ ਜੇਕਰ ਸਰਕਾਰ 5 ਦਿਨ ਦੇ ਕੰਮ ਨੂੰ ਮਨਜ਼ੂਰੀ ਦਿੰਦੀ ਹੈ ਤਾਂ ਬੈਂਕਾਂ ਦੇ ਰੋਜ਼ਾਨਾ ਕੰਮ ਦੇ ਘੰਟੇ 40 ਮਿੰਟ ਤੱਕ ਵਧ ਸਕਦੇ ਹਨ। ਇਸ ਨਾਲ ਬੈਂਕ ਦੀਆਂ ਸ਼ਾਖਾਵਾਂ ਸਵੇਰੇ 9:45 ਤੋਂ ਸ਼ਾਮ 5:30 ਵਜੇ ਤੱਕ ਖੁੱਲ੍ਹੀਆਂ ਰਹਿਣਗੀਆਂ। ਫਿਲਹਾਲ ਬੈਂਕ ਦੂਜੇ ਅਤੇ ਚੌਥੇ ਸ਼ਨੀਵਾਰ ਨੂੰ ਹੀ ਬੰਦ ਰਹਿੰਦੇ ਹਨ।
ਬੈਂਕ ਖੁੱਲਣ ਦਾ ਨਵਾਂ ਸਮਾਂ – ਸਵੇਰੇ 9:45 ਵਜੇ
ਬੈਂਕ ਬੰਦ ਹੋਣ ਦਾ ਨਵਾਂ ਸਮਾਂ – ਸ਼ਾਮ 5:30 ਵਜੇ
ਬਦਲ ਜਾਣਗੇ ਬੈਂਕ ਦੇ ਕੰਮਕਾਜ ਦੇ ਨਿਯਮ
ਕੁਝ ਬੈਂਕ ਕਰਮਚਾਰੀਆਂ ਦਾ ਮੰਨਣਾ ਹੈ ਕਿ ਉਹ 2024 ਦੇ ਅੰਤ ਜਾਂ 2025 ਦੀ ਸ਼ੁਰੂਆਤ ਤੱਕ ਇਸ ਪ੍ਰਸਤਾਵ ‘ਤੇ ਸਰਕਾਰ ਤੋਂ ਨੋਟੀਫਿਕੇਸ਼ਨ ਦੀ ਉਮੀਦ ਕਰਦੇ ਹਨ। ਸਰਕਾਰ ਵੱਲੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਨੈਗੋਸ਼ੀਏਬਲ ਇੰਸਟਰੂਮੈਂਟਸ ਐਕਟ ਤਹਿਤ ਸ਼ਨੀਵਾਰ ਨੂੰ ਛੁੱਟੀ ਵਜੋਂ ਮਾਨਤਾ ਦਿੱਤੀ ਜਾਵੇਗੀ। ਇਸ ਦਾ ਮਤਲਬ ਇਹ ਹੋਵੇਗਾ ਕਿ ਬੈਂਕ ਹਰ ਹਫਤੇ ਸ਼ਨੀਵਾਰ ਅਤੇ ਐਤਵਾਰ ਦੋਵਾਂ ਨੂੰ ਬੰਦ ਰਹਿਣਗੇ।
ਕਾਫੀ ਸਮੇਂ ਤੋਂ ਚੱਲ ਰਹੀ ਸੀ ਇਹ ਮੰਗ
ਬੈਂਕ ਯੂਨੀਅਨਾਂ 2015 ਤੋਂ ਹਰ ਸ਼ਨੀਵਾਰ ਅਤੇ ਐਤਵਾਰ ਨੂੰ ਛੁੱਟੀ ਦੀ ਮੰਗ ਕਰ ਰਹੀਆਂ ਸਨ। 2015 ਵਿੱਚ ਦਸਤਖਤ ਕੀਤੇ ਗਏ 10ਵੇਂ ਦੁਵੱਲੇ ਸਮਝੌਤੇ ਦੇ ਤਹਿਤ, ਆਰਬੀਆਈ ਅਤੇ ਸਰਕਾਰ ਨੇ ਆਈਬੀਏ ਦੇ ਨਾਲ ਦੂਜੇ ਅਤੇ ਚੌਥੇ ਸ਼ਨੀਵਾਰ ਨੂੰ ਛੁੱਟੀ ਵਜੋਂ ਮਾਨਤਾ ਦਿੱਤੀ ਸੀ। ਹੁਣ ਜੇਕਰ ਇਸ ਪ੍ਰਸਤਾਵ ਨੂੰ ਮਨਜ਼ੂਰੀ ਮਿਲ ਜਾਂਦੀ ਹੈ ਤਾਂ ਬੈਂਕ ਕਰਮਚਾਰੀ ਹਫਤੇ ‘ਚ ਸਿਰਫ 5 ਦਿਨ ਹੀ ਕੰਮ ਕਰਨਗੇ ਅਤੇ ਵੀਕੈਂਡ ‘ਤੇ ਆਰਾਮ ਕਰ ਸਕਣਗੇ।
