ਥਾਣੇਦਾਰ ਭਰਤੀ ਹੋਏ ਭੈਣ-ਭਰਾ ਗ੍ਰਿਫਤਾਰ, ਪਿਤਾ ਨਸ਼ਾ ਤਸਕਰੀ ਦੇ ਮਾਮਲੇ ਵਿਚ ਹੈ ਫਰਾਰ…

ਰਾਜਸਥਾਨ ਪੁਲਿਸ ਸਬ-ਇੰਸਪੈਕਟਰ ਭਰਤੀ ਪ੍ਰੀਖਿਆ 2021 ਪੇਪਰ ਲੀਕ (Rajasthan Police Sub Inspector Recruitment Exam) ਮਾਮਲੇ ਵਿੱਚ ਪੁਲਿਸ ਨੇ ਦੋ ਹੋਰ ਟ੍ਰੇਨੀ ਪੁਲਿਸ ਅਧਿਕਾਰੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ।

ਗ੍ਰਿਫਤਾਰ ਕੀਤੇ ਗਏ ਦੋਵੇਂ ਟ੍ਰੇਨੀ ਪੁਲਿਸ ਅਧਿਕਾਰੀ ਭੈਣ-ਭਰਾ ਹਨ। ਦੋਵਾਂ ਦਾ ਪਿਤਾ ਨਸ਼ਾ ਤਸਕਰੀ ਦਾ ਮੁਲਜ਼ਮ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਦੋਵਾਂ ਨੇ ਇਹ ਪੇਪਰ 20 ਲੱਖ ਰੁਪਏ ‘ਚ ਖਰੀਦਿਆ ਸੀ। ਬਾਅਦ ਵਿੱਚ ਇਸ ਦੀ ਪੜ੍ਹਾਈ ਕਰਕੇ ਇਮਤਿਹਾਨ ਦਿੱਤਾ ਅਤੇ ਥਾਣੇਦਾਰ ਬਣ ਗਏ। ਮਾਮਲੇ ਦੀ ਜਾਂਚ ਏਜੰਸੀ ਐੱਸਓਜੀ ਉਨ੍ਹਾਂ ਤੋਂ ਪੁੱਛਗਿੱਛ ਕਰ ਰਹੀ ਹੈ। ਸਬ-ਇੰਸਪੈਕਟਰ ਭਰਤੀ ਪ੍ਰੀਖਿਆ ਵਿੱਚ ਹੁਣ ਤੱਕ ਚਾਰ ਦਰਜਨ ਦੇ ਕਰੀਬ ਟ੍ਰੇਨੀ ਪੁਲੀਸ ਅਧਿਕਾਰੀ ਗ੍ਰਿਫ਼ਤਾਰ ਕਰ ਚੁੱਕੇ ਹਨ।

ਐਸਓਜੀ ਅਨੁਸਾਰ ਗ੍ਰਿਫ਼ਤਾਰ ਕੀਤੇ ਗਏ ਟ੍ਰੇਨੀ ਪੁਲਿਸ ਅਧਿਕਾਰੀ ਦਿਨੇਸ਼ ਬਿਸ਼ਨੋਈ ਅਤੇ ਪ੍ਰਿਅੰਕਾ ਬਿਸ਼ਨੋਈ ਭਰਾ-ਭੈਣ ਹਨ। ਦੋਵੇਂ ਅਫੀਮ ਤਸਕਰੀ ਦੇ ਮੁਲਜ਼ਮ ਭਾਗੀਰਥ ਰਾਮ ਬਿਸ਼ਨੋਈ ਦੇ ਬੇਟਾ-ਬੇਟੀ ਹਨ। ਉਹ ਜਲੌਰ ਜ਼ਿਲ੍ਹੇ ਦੇ ਰਹਿਣ ਵਾਲੇ ਹਨ। ਉਨ੍ਹਾਂ ਨੂੰ ਰਾਜਧਾਨੀ ਜੈਪੁਰ ਸਥਿਤ ਰਾਜਸਥਾਨ ਪੁਲਿਸ ਅਕੈਡਮੀ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਐਸਓਜੀ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਦੋਵਾਂ ਨੇ ਪੇਪਰ ਲੀਕ ਮਾਫੀਆ ਨੂੰ 20 ਲੱਖ ਰੁਪਏ ਦੇ ਕੇ ਪੇਪਰ ਖਰੀਦਿਆ ਸੀ। ਬਾਅਦ ਵਿਚ ਦੋਵੇਂ ਚੰਗੇ ਰੈਂਕ ਵਾਲੇ ਪੁਲਿਸ ਅਧਿਕਾਰੀ ਬਣ ਗਏ। ਹੁਣ ਇਹ ਦੋਵੇਂ ਜੈਪੁਰ ਆਰਪੀਏ ਵਿੱਚ ਸਿਖਲਾਈ ਲੈ ਰਹੇ ਸਨ।

ਮਾਮਲੇ ਦੀ ਜਾਂਚ ਏਜੰਸੀ ਐਸਓਜੀ ਨੇ ਹਾਲ ਹੀ ਵਿੱਚ ਪੇਪਰ ਲੀਕ ਮਾਫੀਆ ਗੋਪਾਲ ਸਰਨ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਗੋਪਾਲ ਸਰਨ ਤੋਂ ਪੁੱਛਗਿੱਛ ਦੌਰਾਨ ਖੁਲਾਸਾ ਹੋਇਆ ਕਿ ਉਸ ਨੇ 6 ਉਮੀਦਵਾਰਾਂ ਨੂੰ ਐੱਸਆਈ ਭਰਤੀ ਪ੍ਰੀਖਿਆ ਦਾ ਲੀਕ ਹੋਇਆ ਪੇਪਰ ਦਿੱਤਾ ਸੀ। ਪ੍ਰਿਅੰਕਾ ਅਤੇ ਦਿਨੇਸ਼, ਜੋ ਆਰਪੀਏ ਵਿੱਚ ਸਬ ਇੰਸਪੈਕਟਰ ਵਜੋਂ ਸਿਖਲਾਈ ਲੈ ਰਹੇ ਹਨ, ਵੀ ਇਨ੍ਹਾਂ ਵਿੱਚ ਸ਼ਾਮਲ ਹਨ। ਇਸ ਤੋਂ ਬਾਅਦ ਐਤਵਾਰ ਨੂੰ SOG ਨੇ ਦਿਨੇਸ਼ ਅਤੇ ਪ੍ਰਿਅੰਕਾ ਦਾ ਨਾਂ ਲਿਆ ਅਤੇ ਹੁਣ ਦੋਵਾਂ ਨੂੰ ਗ੍ਰਿਫਤਾਰ ਕਰ ਲਿਆ।

ਤਸਕਰ ਦਾ ਜੇਲ੍ਹ ਵਿੱਚ ਪੇਪਰ ਲੀਕ ਮਾਫੀਆ ਨਾਲ ਸੰਪਰਕ ਸੀ
ਐਸਓਜੀ ਸੂਤਰਾਂ ਅਨੁਸਾਰ ਪ੍ਰਿਅੰਕਾ ਅਤੇ ਦਿਨੇਸ਼ ਦਾ ਪਿਤਾ ਭਾਗੀਰਥ ਰਾਮ ਅਫੀਮ ਦਾ ਤਸਕਰ ਸੀ। ਫਿਲਹਾਲ ਉਹ ਫਰਾਰ ਹੈ। ਭਾਗੀਰਥ ਰਾਮ ਦਾ ਜੋਧਪੁਰ ਜੇਲ੍ਹ ਦੌਰਾਨ ਪੇਪਰ ਲੀਕ ਮਾਫੀਆ ਨਾਲ ਸੰਪਰਕ ਸੀ। ਉਸ ਤੋਂ ਬਾਅਦ ਉਸ ਨੇ ਪੇਪਰ ਲੀਕ ਮਾਫੀਆ ਨਾਲ ਮਿਲ ਕੇ ਕਰੀਬ 20 ਲੱਖ ਰੁਪਏ ‘ਚ ਪੇਪਰ ਹਾਸਲ ਕਰਕੇ ਆਪਣੇ ਲੜਕੇ ਅਤੇ ਬੇਟੀ ਨੂੰ ਥਾਣੇਦਾਰ ਬਣਾ ਲਿਆ।