BMW ‘ਚ ਕੂੜਾ ਸੁੱਟਣ ਜਾ ਰਿਹਾ ਸੀ ਸ਼ਖ਼ਸ, ਪੁਲਿਸ ਨੇ ਵੇਖਦਿਆਂ ਹੀ ਕਰ ਲਿਆ ਗ੍ਰਿਫਤਾਰ, ਹੈਰਾਨ ਕਰਨ ਵਾਲਾ ਮਾਮਲਾ

ਜੈਪੁਰ ਦੀ ਮੁਹਾਣਾ ਥਾਣਾ ਪੁਲਿਸ ਨੇ ਇਕ ਨਟਵਰਲਾਲ ਦੇਵੇਂਦਰ ਸਿੰਘਲ ਉਰਫ ਦੇਵੇਂਦਰ ਸਿੰਘ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਸ ਨੇ 3 ਵੱਖ-ਵੱਖ ਲੋਕਾਂ ਨੂੰ ਇਕ ਫਲੈਟ ਵੇਚ ਕੇ ਰਜਿਸਟਰੀ ਕਰਵਾ ਕੇ ਕਰੋੜਾਂ ਰੁਪਏ ਦਾ ਗਬਨ ਕੀਤਾ ਸੀ। ਜਦੋਂ ਪੁਲਿਸ ਮੁਲਜ਼ਮ ਨੂੰ ਗ੍ਰਿਫਤਾਰ ਕਰਨ ਲਈ ਪਹੁੰਚੀ ਤਾਂ ਉਹ BMW ਰਾਹੀਂ ਕੂੜਾ ਸੁੱਟਣ ਜਾ ਰਿਹਾ ਸੀ। ਪੁਲਿਸ ਕਾਫੀ ਸਮੇਂ ਤੋਂ ਉਸ ਦੀ ਭਾਲ ਕਰ ਰਹੀ ਸੀ। ਲਕਸ਼ਮਣ ਪ੍ਰਸਾਦ ਸ਼ਰਮਾ ਨੇ ਮੁਹਾਣਾ ਥਾਣੇ ਵਿੱਚ ਫਲੈਟ ਖਰੀਦਣ ਵਿੱਚ ਧੋਖਾਧੜੀ ਦਾ ਕੇਸ ਦਰਜ ਕਰਵਾਇਆ ਸੀ।

ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਮੁਹਾਣਾ ਥਾਣੇ ਦੇ ਸੀਆਈ ਮਦਨਲਾਲ ਕੜਵਾਸਰਾ ਨੇ ਦੱਸਿਆ ਕਿ ਦੇਵੇਂਦਰ ਸਿੰਘਲ ਨੂੰ ਫਲੈਟ ਵੇਚਣ ਦੇ ਨਾਂ ‘ਤੇ 50 ਲੱਖ ਰੁਪਏ ਦੀ ਧੋਖਾਧੜੀ ਦੇ ਮਾਮਲੇ ‘ਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਲਕਸ਼ਮਣ ਪ੍ਰਸਾਦ ਸ਼ਰਮਾ ਨੇ ਇੱਕ ਮਹੀਨਾ ਪਹਿਲਾਂ ਦੇਵੇਂਦਰ ਸਿੰਘਲ ਖ਼ਿਲਾਫ਼ ਐਫਆਈਆਰ ਦਰਜ ਕਰਵਾਈ ਸੀ। ਉਸ ਨੇ ਆਪਣੀ ਸ਼ਿਕਾਇਤ ‘ਚ ਦੱਸਿਆ ਸੀ ਕਿ ਦੇਵੇਂਦਰ ਨੇ ਉਸ ਨੂੰ 50 ਲੱਖ ਰੁਪਏ ‘ਚ ਫਲੈਟ ਦਿੱਤਾ ਪਰ ਮੁਲਜ਼ਮ ਨੇ ਉਹ ਫਲੈਟ ਹੋਰ ਲੋਕਾਂ ਨੂੰ ਵੀ ਵੇਚ ਦਿੱਤਾ।

ਉਨ੍ਹਾਂ ਅੱਗੇ ਕਿਹਾ- ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਦੇਵੇਂਦਰ ਸਿੰਘ ਪਹਿਲਾਂ ਹੀ ਇਹ ਫਲੈਟ ਤਿੰਨ ਲੋਕਾਂ ਨੂੰ ਵੇਚ ਚੁੱਕਾ ਹੈ। ਦੇਵੇਂਦਰ ਨੇ ਉਸ ਤੋਂ ਪੈਸੇ ਵੀ ਲਏ ਹਨ। ਦੇਵੇਂਦਰ ਦੇ ਕਾਰਨਾਮੇ ਇੱਥੇ ਹੀ ਨਹੀਂ ਰੁਕੇ। ਉਸ ਨੇ ਵੇਚੇ ਫਲੈਟ ‘ਤੇ ਚਾਰ ਬੈਂਕਾਂ ਅਤੇ ਇਕ ਫਾਈਨਾਂਸ ਕੰਪਨੀ ਤੋਂ ਕਰੋੜਾਂ ਰੁਪਏ ਦਾ ਕਰਜ਼ਾ ਵੀ ਲਿਆ ਹੋਇਆ ਹੈ। ਦੇਵੇਂਦਰ ਪੂਰੇ ਗੈਂਗ ਨੂੰ ਚਲਾਉਂਦਾ ਸੀ। ਇਸ ਗਰੋਹ ਨੇ ਕਈ ਵਾਰ ਹੋਰ ਲੋਕਾਂ ਦੇ ਨਾਂ ‘ਤੇ ਫਲੈਟ ਰਜਿਸਟਰਡ ਕਰਵਾ ਕੇ ਵੱਖ-ਵੱਖ ਬੈਂਕਾਂ ਤੋਂ ਕਰੋੜਾਂ ਰੁਪਏ ਦਾ ਕਰਜ਼ਾ ਲਿਆ ਹੋਇਆ ਹੈ। ਮੁਲਜ਼ਮ ਨੇ 10 ਤੋਂ ਵੱਧ ਫਾਈਨਾਂਸ ਕੰਪਨੀਆਂ ਨਾਲ ਵੀ ਧੋਖਾਧੜੀ ਕੀਤੀ ਹੈ।