ਘਰੋਂ ਲਾਪਤਾ ਹੋਇਆ 5 ਸਾਲਾ ਬੱਚਾ, 24 ਘੰਟਿਆਂ ਬਾਅਦ ਕਾਰ ‘ਚੋਂ ਮਿਲੀ ਲਾਸ਼, ਦੇਖ ਕੇ ਪੁਲਸ ਵੀ ਹੈਰਾਨ

ਰਾਜਧਾਨੀ ਜੈਪੁਰ ਦੇ ਖੋਹ ਨਾਗੋਰੀਆ ਥਾਣਾ ਖੇਤਰ ‘ਚ ਵੀਰਵਾਰ ਨੂੰ ਉਸ ਸਮੇਂ ਸਨਸਨੀ ਫੈਲ ਗਈ ਜਦੋਂ ਲਾਪਤਾ 5 ਸਾਲਾ ਬੱਚੇ ਦੀ ਲਾਸ਼ ਇਕ ਲਾਵਾਰਸ ਕਾਰ ‘ਚੋਂ ਮਿਲੀ। ਇਹ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਖ਼ੋਹ ਨਗਰੋਰੀਆ ਦੇ ਲੁਨੀਆਵਾਸ ਦੀ ਨੂਰ ਕਲੋਨੀ ਵਿੱਚ ਸਾਹਮਣੇ ਆਈ ਹੈ। ਇਹ ਬੱਚਾ ਆਪਣੇ ਨਾਨਕੇ ਘਰ ਰਹਿ ਰਿਹਾ ਸੀ। ਮਾਸੂਮ ਅਲਫੇਜ ਬੁੱਧਵਾਰ ਦੁਪਹਿਰ ਕਰੀਬ 12 ਵਜੇ ਘਰ ਦੇ ਬਾਹਰ ਖੇਡਦਾ ਹੋਇਆ ਅਚਾਨਕ ਲਾਪਤਾ ਹੋ ਗਿਆ। ਕਾਫੀ ਦੇਰ ਤੱਕ ਉਸ ਦੀ ਭਾਲ ਕਰਨ ਤੋਂ ਬਾਅਦ ਪਰਿਵਾਰ ਨੇ ਬੁੱਧਵਾਰ ਰਾਤ ਥਾਣਾ ਖੋਨਾਗੋਰੀਆਂ ਨੂੰ ਸੂਚਨਾ ਦਿੱਤੀ। ਇਸ ਤੋਂ ਬਾਅਦ ਪੁਲਸ ਨੇ ਬੱਚੇ ਦੀ ਭਾਲ ਸ਼ੁਰੂ ਕਰ ਦਿੱਤੀ।

ਵੀਰਵਾਰ ਨੂੰ ਜਦੋਂ ਪੁਲਸ ਨੇ ਘਟਨਾ ਵਾਲੀ ਥਾਂ ਦੇ ਨੇੜੇ ਸਥਿਤ ਇੱਕ ਨਿੱਜੀ ਸਕੂਲ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਨੂੰ ਸਕੈਨ ਕੀਤਾ ਤਾਂ ਉਸ ਵਿੱਚ ਲਾਪਤਾ ਬੱਚਾ ਦਿਖਾਈ ਦਿੱਤਾ। ਸ਼ੱਕ ਦੇ ਆਧਾਰ ‘ਤੇ ਵੀਰਵਾਰ ਦੁਪਹਿਰ ਕਰੀਬ 3 ਵਜੇ ਪੁਲਸ ਨੇ ਇਕ ਖਾਲੀ ਪਲਾਟ ‘ਚ ਕਈ ਦਿਨਾਂ ਤੋਂ ਖੜ੍ਹੀ ਇਕ ਕਾਰ ਨੂੰ ਦੇਖਿਆ। ਜਦੋਂ ਪੁਲਸ ਨੇ ਕਾਰ ਦੀ ਜਾਂਚ ਕੀਤੀ ਤਾਂ ਅਲਫੇਜ਼ ਦੀ ਲਾਸ਼ ਉਸ ਵਿੱਚ ਪਈ ਮਿਲੀ। ਇਹ ਦੇਖ ਕੇ ਪੁਲਸ ਅਤੇ ਪਰਿਵਾਰਕ ਮੈਂਬਰ ਹੈਰਾਨ ਰਹਿ ਗਏ।

ਬੱਚੇ ਦੀ ਲਾਸ਼ ਮਿਲਣ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ‘ਚ ਮੱਚ ਗਿਆ ਕੋਹਰਾਮ
ਬੱਚੇ ਦੀ ਲਾਸ਼ ਡਰਾਈਵਰ ਸੀਟ ਦੇ ਪਿੱਛੇ ਫਸੀ ਹੋਈ ਸੀ। ਸੂਚਨਾ ਮਿਲਣ ‘ਤੇ ਡੀਸੀਪੀ ਤੇਜਸਵਿਨੀ ਗੌਤਮ, ਏਸੀਪੀ ਆਦਿਤਿਆ ਪੂਨੀਆ ਅਤੇ ਸਟੇਸ਼ਨ ਇੰਚਾਰਜ ਸੁਰੇਸ਼ ਯਾਦਵ ਮੌਕੇ ‘ਤੇ ਪੁੱਜੇ। ਐਫਐਸਐਲ ਟੀਮ ਨੂੰ ਮੌਕੇ ’ਤੇ ਬੁਲਾਇਆ ਗਿਆ। ਪੁਲਸ ਨੇ ਜਾਂਚ ਤੋਂ ਬਾਅਦ ਲਾਸ਼ ਨੂੰ ਕਾਰ ‘ਚੋਂ ਕੱਢ ਕੇ ਸਥਾਨਕ ਹਸਪਤਾਲ ਦੀ ਮੋਰਚਰੀ ‘ਚ ਰਖਵਾਇਆ। ਬੱਚੇ ਦੀ ਲਾਸ਼ ਮਿਲਣ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ‘ਚ ਹੜਕੰਪ ਮੱਚ ਗਿਆ।

ਪੁਲਸ ਲਈ ਰਹੱਸ ਬਣ ਗਈ ਹੈ ਅਲਫੇਜ ਦੀ ਮੌਤ
ਅਲਫੇਜ ਕਾਰ ਵਿੱਚ ਕਿਵੇਂ ਆਇਆ? ਉਹ ਕਿਵੇਂ ਮਰਿਆ? ਫਿਲਹਾਲ ਪੁਲਸ ਇਨ੍ਹਾਂ ਸਵਾਲਾਂ ਦੇ ਜਵਾਬ ਨਹੀਂ ਲੈ ਸਕੀ ਹੈ। ਪੁਲਸ ਪੂਰੇ ਮਾਮਲੇ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ। ਇਸ ਲਾਵਾਰਸ ਕਾਰ ਦੇ ਦਰਵਾਜ਼ੇ ਵੀ ਟੁੱਟੇ ਦੱਸੇ ਜਾ ਰਹੇ ਹਨ। ਫਿਰ ਇਹ ਸਭ ਕਿਵੇਂ ਹੋਇਆ? ਅਲਫੇਜ ਦੀ ਮੌਤ ਪੁਲਸ ਲਈ ਰਹੱਸ ਬਣ ਗਈ ਹੈ। ਪੁਲਸ ਅਲਫੇਜ ਦੀ ਮੌਤ ਦਾ ਭੇਤ ਖੋਲ੍ਹਣ ਲਈ ਜ਼ੋਰਦਾਰ ਯਤਨ ਕਰ ਰਹੀ ਹੈ।