ਦੇਸ਼ ਦਾ ਅਨੋਖਾ ਐਕਸਪ੍ਰੈੱਸ ਵੇਅ ਤਿਆਰ, ਹੁਣ ਟੌਲ ਲਈ ਗੱਡੀ ਰੋਕਣ ਦੀ ਲੋੜ ਨਹੀਂ, 100 ਦੀ ਸਪੀਡ ‘ਤੇ ਕੱਟੇ ਜਾਣਗੇ ਪੈਸੇ
ਤੁਸੀਂ ਹਾਈਵੇਅ ਅਤੇ ਐਕਸਪ੍ਰੈੱਸ ਵੇਅ ਉਤੇ ਸੈਂਕੜੇ ਟੋਲ ਪਲਾਜ਼ੇ ਦੇਖੇ ਹੋਣਗੇ ਪਰ ਦੇਸ਼ ‘ਚ ਅਜਿਹਾ ਅਨੋਖਾ ਐਕਸਪ੍ਰੈੱਸ ਵੇਅ ਤਿਆਰ ਕੀਤਾ ਜਾ ਰਿਹਾ ਹੈ, ਜਿੱਥੇ ਬਿਨਾਂ ਕਿਸੇ ਪਲਾਜ਼ਾ ਦੇ ਟੋਲ ਕੱਟਿਆ ਜਾਵੇਗਾ। ਇਸ ਐਕਸਪ੍ਰੈਸ ਵੇਅ ‘ਤੇ ਸਫ਼ਰ ਕਰਨ ਵਾਲੇ ਲੋਕਾਂ ਨੂੰ ਆਪਣੇ ਵਾਹਨ ਰੋਕਣ ਦੀ ਲੋੜ ਨਹੀਂ ਹੈ।
ਟੋਲ ਨੇੜੇ ਲਗਾਏ ਗਏ ਕੈਮਰੇ ਵਾਹਨ ਦੇ ਸ਼ੀਸ਼ੇ ‘ਤੇ ਲੱਗੇ ਫਾਸਟੈਗ ਨੂੰ ਸਕੈਨ ਕਰਨਗੇ ਅਤੇ ਟੋਲ ਕੱਟਣਗੇ। ਦਿਲਚਸਪ ਗੱਲ ਇਹ ਹੈ ਕਿ ਇਹ ਸਾਰਾ ਕੰਮ ਬੜੀ ਆਸਾਨੀ ਨਾਲ ਹੋ ਜਾਵੇਗਾ, ਭਾਵੇਂ ਤੁਸੀਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਨਾਲ ਗੱਡੀ ਚਲਾਉਂਦੇ ਹੋ।
ਦਰਅਸਲ, ਅਸੀਂ ਗੱਲ ਕਰ ਰਹੇ ਹਾਂ ਦਿੱਲੀ-ਗੁਰੂਗ੍ਰਾਮ ਦੇ ਵਿਚਕਾਰ ਬਣੇ ਦਵਾਰਕਾ ਐਕਸਪ੍ਰੈਸਵੇਅ ਦੀ। ਇਹ ਅਗਲੇ ਕੁਝ ਮਹੀਨਿਆਂ ਵਿੱਚ ‘ਫ੍ਰੀ ਫਲੋ ਟੋਲਿੰਗ ਸਿਸਟਮ’ ਨਾਲ ਲੈਸ ਹੋ ਜਾਵੇਗਾ। ਇਸ ਨਾਲ ਇਹ ਦੇਸ਼ ਦਾ ਪਹਿਲਾ ਐਕਸਪ੍ਰੈੱਸ ਵੇਅ ਬਣ ਜਾਵੇਗਾ, ਜਿੱਥੇ ਟੋਲ ਕੱਟਣ ਲਈ ਪਲਾਜ਼ਾ ਜਾਂ ਬੈਰੀਅਰ ਲਗਾਉਣ ਦੀ ਕੋਈ ਲੋੜ ਨਹੀਂ ਹੋਵੇਗੀ। ਇੱਥੇ ਸਥਾਪਿਤ ਐਡਵਾਂਸਡ ਫਾਸਟੈਗ ਰੀਡਰ ਵਾਹਨ ਉਤੇ ਲਗਾਏ ਗਏ ਟੈਗ ਨੂੰ ਸਕੈਨ ਕਰੇਗਾ ਅਤੇ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ‘ਤੇ ਵੀ ਟੋਲ ਮਨੀ ਕੱਟੀ ਜਾਵੇਗੀ।
ਇਸ ਤੋਂ ਇਲਾਵਾ ਹਾਈ ਪਾਵਰ ਕੈਮਰੇ ਤੁਹਾਡੇ ਵਾਹਨ ਦੇ ਰਜਿਸਟ੍ਰੇਸ਼ਨ ਨੰਬਰ ਨੂੰ ਵੀ ਸਕੈਨ ਕਰਨਗੇ। ਨੈਸ਼ਨਲ ਹਾਈਵੇਅ ਅਥਾਰਟੀ ਨੇ 28 ਕਿਲੋਮੀਟਰ ਲੰਬੇ ਐਕਸਪ੍ਰੈਸ ਵੇਅ ‘ਤੇ ਇਹ ਸਿਸਟਮ ਲਗਾਉਣਾ ਸ਼ੁਰੂ ਕਰ ਦਿੱਤਾ ਹੈ।
ਸਮਾਂ ਅਤੇ ਤੇਲ ਦੋਵਾਂ ਦੀ ਬੱਚਤ ਹੋਵੇਗੀ
ਭਾਵੇਂ ਭਾਰਤ ਵਿਚ ਪਹਿਲੀ ਵਾਰ ‘ਫ੍ਰੀ ਫਲੋ ਟੋਲਿੰਗ ਸਿਸਟਮ’ ਲਾਗੂ ਕੀਤੀ ਜਾ ਰਹੀ ਹੈ, ਪਰ ਇਹ ਸਹੂਲਤ ਪਹਿਲਾਂ ਹੀ ਦੁਨੀਆ ਦੇ ਕਈ ਦੇਸ਼ਾਂ ਵਿੱਚ ਦਿੱਤੀ ਜਾ ਰਹੀ ਹੈ। ਇਸ ਪ੍ਰਣਾਲੀ ਨਾਲ ਸੈਟੇਲਾਈਟ ਆਧਾਰਿਤ ਟੋਲਿੰਗ ਪ੍ਰਣਾਲੀ ਨੂੰ ਵੀ ਬਿਹਤਰ ਢੰਗ ਨਾਲ ਲਾਗੂ ਕੀਤਾ ਜਾ ਸਕਦਾ ਹੈ। ਇਸ ਨਾਲ ਡਰਾਈਵਰਾਂ ਨੂੰ ਟੋਲ ਕੱਟਣ ਲਈ ਰੁਕਣ ਦੀ ਲੋੜ ਨਹੀਂ ਪਵੇਗੀ। ਜ਼ਾਹਿਰ ਹੈ ਕਿ ਨਵੀਂ ਪ੍ਰਣਾਲੀ ਸਮੇਂ ਅਤੇ ਟੋਲ ਦੋਵਾਂ ਦੀ ਬਚਤ ਕਰੇਗੀ।
ਜੇਕਰ ਫਾਸਟੈਗ ਕੰਮ ਨਹੀਂ ਕਰਦਾ…
ਜੇਕਰ ਪਲਾਜ਼ੇ ਤੋਂ ਬਿਨਾਂ ਟੋਲ ਕੱਟਣ ਦੀ ਵਿਵਸਥਾ ਕੀਤੀ ਜਾਂਦੀ ਹੈ, ਤਾਂ ਇਸ ਦੀ ਸਭ ਤੋਂ ਵੱਡੀ ਚੁਣੌਤੀ ਇਹ ਹੋਵੇਗੀ ਕਿ ਉਨ੍ਹਾਂ ਡਰਾਈਵਰਾਂ ਤੋਂ ਟੋਲ ਕਿਵੇਂ ਕੱਟਿਆ ਜਾਵੇ ਜਿਨ੍ਹਾਂ ਦਾ ਫਾਸਟੈਗ ਕੰਮ ਨਹੀਂ ਕਰਦਾ ਜਾਂ ਬਲੈਕਲਿਸਟ ਕੀਤਾ ਗਿਆ ਹੈ। ਇਸ ਲਈ NHAI ਅਤੇ ਟਰਾਂਸਪੋਰਟ ਵਿਭਾਗ ਮਿਲ ਕੇ ਨਵੀਂ ਪ੍ਰਣਾਲੀ ਸ਼ੁਰੂ ਕਰ ਰਹੇ ਹਨ। ਇਸ ਰਾਹੀਂ ਐਕਸਪ੍ਰੈਸ ਵੇਅ ‘ਤੇ ਬਿਨਾਂ ਟੋਲ ਦੇ ਗੱਡੀ ਚਲਾਉਣ ਵਾਲੇ ਡਰਾਈਵਰਾਂ ਤੋਂ ਟੋਲ ਵਸੂਲਿਆ ਜਾਵੇਗਾ। NHAI ਨੇ ਟਰਾਂਸਪੋਰਟ ਮੰਤਰਾਲੇ ਨੂੰ ਵਾਹਨ ਪ੍ਰਣਾਲੀ ਵਿੱਚ ਬਦਲਾਅ ਕਰਨ ਦੀ ਵੀ ਅਪੀਲ ਕੀਤੀ ਹੈ।
ਜਾਣਕਾਰੀ ਵਾਹਨ ਪੋਰਟਲ ‘ਤੇ ਦਿਖਾਈ ਦੇਵੇਗੀ
ਜਿਨ੍ਹਾਂ ਡਰਾਈਵਰਾਂ ਦਾ ਫਾਸਟੈਗ ਬਲੈਕਲਿਸਟ ਕੀਤਾ ਗਿਆ ਹੈ ਜਾਂ ਟੋਲ ਨਹੀਂ ਕੱਟਿਆ ਗਿਆ ਹੈ, ਉਨ੍ਹਾਂ ਲਈ ਇਹ ਜਾਣਕਾਰੀ ਵਾਹਨ ਪੋਰਟਲ ‘ਤੇ ਦਿਖਾਈ ਦੇਵੇਗੀ। ਪੋਰਟਲ ‘ਤੇ ਬਕਾਇਆ ਰਕਮ ਦੇ ਨਾਲ ਵਾਹਨ ਦੀ ਫੋਟੋ ਦਿਖਾਈ ਜਾਵੇਗੀ। ਅਜਿਹੇ ਡਰਾਈਵਰਾਂ ਨੂੰ ਬਕਾਇਆ ਅਦਾ ਕੀਤੇ ਜਾਣ ਤੱਕ ਆਪਣੀ ਰਜਿਸਟ੍ਰੇਸ਼ਨ ਟ੍ਰਾਂਸਫਰ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ। ਇੰਨਾ ਹੀ ਨਹੀਂ, ਫਿਟਨੈਸ ਸਰਟੀਫਿਕੇਟ ਲਈ ਐਨਓਸੀ ਵੀ ਨਹੀਂ ਦਿੱਤੀ ਜਾਵੇਗੀ। ਡਰਾਈਵਰਾਂ ਨੂੰ ਪੋਰਟਲ ‘ਤੇ ਹੀ ਬਕਾਇਆ ਅਦਾ ਕਰਨ ਜਾਂ ਇਤਰਾਜ਼ ਉਠਾਉਣ ਦੀ ਸਹੂਲਤ ਦਿੱਤੀ ਜਾਵੇਗੀ।
